អ៊ីស្រាអែលកំពុងព្រួយបារម្ភរលកទីបួននៃជំងឺកូវីដ១៩
តាំងពីចុងឆ្នាំមុន អ៊ីស្រាអែលបានក្លាយជាមន្ទីរពិសោធន៍សម្រាប់ពិភពលោកដើម្បីតាមដានពីប្រសិទ្ធិភាពនៃការចាក់វ៉ាក់សាំង។ បន្ទាប់ពីទទួលបាន ការផ្គត់ផ្គង់ វ៉ាក់សាំង យ៉ាងច្រើននិងរហ័សពី ក្រុមហ៊ុនBioNTech/Pfizer ជាថ្នូរនឹងការចែករំលែកទិន្នន័យស្តីពីផលប៉ះពាល់របស់ វ៉ាក់សាំង លើសុខភាព ប្រជាជន។ អ៊ីស្រាអែលគឺជាប្រទេសដំបូងគេដែលបាន បើកដំណើរការសេដ្ឋកិច្ចទាំងមូលឡើងវិញបន្ទាប់ពីការវាយលុកពីជំងឺកូវីដ១៩។ ឥឡូវនេះអ៊ីស្រាអែល ជា ប្រទេសមួយក្នុងចំណោមប្រទេសដែលមានការចាក់វ៉ាក់សាំង ដល់ប្រជាជនច្រើនជាងគេបំផុតនៅលើពិភពលោក ដែលបានចាក់ជូន ប្រមាណ ៧០% នៃប្រជាជនសរុប។ ហើយបច្ចុប្បន្ននេះអ៊ីស្រាអែល ក៏ ស្ថិតក្នុងចំណោមប្រទេសដំបូងៗដែលជួបប្រទះរលកទីបួននៃការឆ្លងមេរោគនេះ ផងដែរ។
ការឆ្លងថ្មីៗនៅអ៊ីស្រាអែល បានកើនឡើងដល់កម្រិតខ្ពស់បំផុត ក្នុងរយៈពេលប្រាំមួយខែចុងក្រោយនេះ ដោយមានការបង្ហាញសញ្ញាថាមានការការពារប្រឆាំងនឹង មេរោគ បានធ្លាក់ចុះយ៉ាងខ្លាំងចំពោះមនុស្សចាស់ដែលបានចាក់វ៉ាក់សាំង នៅដើមឆ្នាំនេះ។ ទិន្នន័យនេះ បានបង្ហាញថា៖ ពី ៦ ទៅ ៨ ខែបន្ទាប់ពីការចាក់វ៉ាក់សាំង លើកទីពីរ ភាពស៊ាំបានចាប់ផ្តើមថយចុះ។
នាពេលថ្មីៗនេះ ក្រសួងសុខាភិបាលបានរកឃើញថាចំពោះមនុស្សដែលមានអាយុលើសពី ៦៥ ឆ្នាំដែលបានទទួលការចាក់វ៉ាក់សាំងលើកទី ២ នៅខែមករា ការការពារប្រឆាំងនឹង វ៉ារ្យ៉ង់ ដែលតា គឺមានត្រឹមតែ ៥៥ ភាគរយតែប៉ុណ្ណោះ។
រដ្ឋាភិបាល ក៏បានប៉ាន់ប្រមាណនាពេលថ្មីៗនេះ ថា ប្រសិទ្ធភាពវ៉ាក់សាំងក្នុងការបញ្ឈប់ការឆ្លងថ្មីក្នុងចំណោមមនុស្សដែល ទទួល បានការចាក់លើកទី ២ នៅក្នុងខែមករាបានធ្លាក់ចុះយ៉ាងខ្លាំង។
នៅសហរដ្ឋអាមេរិក ខណះដែលវ៉រ្យ៉ង់ដែលតា បានកើនឡើងយ៉ាងខ្លាំង កាលពីខែមុន រដ្ឋបាលលោកបៃដិន បានសំរេចផ្តល់អនុសាសន៍ឱ្យមានការចាក់វ៉ាក់សាំង ដូសទី ៣ នៅ ៨ ខែ បន្ទាប់ពីការចាក់លើកទីពីរ ក្រោយសង្កេតមើលទិន្នន័យប្រសិទ្ធភាពវ៉ាក់សាំង ពីអ៊ីស្រាអែល។
