ភាពឡើងចុះនៃទំនាក់ទំនងការទូត របស់អ្នកស្រី Angela Merkel ជាមួយប្រទេសចិន
កាលពីឆ្នាំ ២០០៧ លោកស្រី Angela Merkel បានបញ្ចប់ដំណើរទស្សនកិច្ចក្នុងនាមជាថ្នាក់ដឹកនាំប្រទេស ជាលើកទីពីររបស់លោកស្រី ទៅកាន់ប្រទេសចិនក្នុងនាម ជាអធិការបតីអាល្លឺម៉ង់។ នាឆ្នាំដដែល លោកស្រីក៏បានទទួលស្វាគមន៏ព្រះសង្ឃដាឡៃ ឡាម៉ាដែលជាមេដឹកនាំសាសនាដែលកំពុងនិរទេសខ្លួនរបស់ទីបេ នៅឯអធិការកិច្ចដ្ឋានរបស់លោកស្រី នៅទីក្រុងប៊ែរឡាំង ដែលសកម្មភាពទទួលស្វាគមន៏ព្រះសង្ឃ Dalai Lama នេះ ត្រូវបានគេមើលឃើញថាជាកត្តាដែលធ្វើឲ្យល្អក់កករចំពោះទំនាក់ទំនងរបស់អាល្លឺម៉ង់ជាមួយទីក្រុងប៉េកាំង។
លុះក្រោយមកទៀតអ្នកស្រី Merkel មិនបានផ្តល់ ជាសារព្រមានធអ្វីដល់ចិនជាម្ចាស់ផ្ទះឡើយក្នុងអំឡុងដំណើរទស្សនកិច្ចផ្លូវរដ្ឋ រយៈពេល ៤ ថ្ងៃរបស់លោកស្រី ទៅកាន់ប្រទេសចិនចំខួបលើកទី ៣៥ នៃចំណងការទូតរបស់ប្រទេសទាំងពីរ។ ប៉ុន្តែ មិនបានយូរប៉ុន្មានផង ទំនាក់ទំនងរវាងប្រទេសទាំងពីរបានបន្តដោយការមើលមុខ មិនចំ ដោយទីក្រុងប៉េកាំង បានលុបចោលការសន្ទនាស្តីពីសិទ្ធិមនុស្ស នៅទីក្រុងប៊ែរឡាំងនៅចុងឆ្នាំនោះ។ អ្នកស្រី Merkel ក៏បានបដិសេធមិនចូលរួមក្នុងពិធី បើកការប្រកួតកីឡាអូឡាំពិកនោប៉េកាំង នៅខែសីហាឆ្នាំ ២០០៨ផងដែរ។ នេះបង្ហាញឲ្យឃើញ ពីភាព មិនប្រាកដប្រជា និងភាពឡើងចុះ នៃចំណងការទូត របស់ប្រទេសទាំងពីរ។
គួរឲ្យចាប់អារម្មណ៏ផងដែរថា គ្មានមេដឹកនាំបស្ចិមប្រទេសណាម្នាក់ធ្លាប់បានធ្វើដំណើរទៅប្រទេសចិនច្រើនដងដូច អ្នកស្រី Merkel ទេ ដែលលោកស្រីបានទៅប្រទេសចិន ១២ដង ក្នុងរយៈពេល ១៦ ឆ្នាំនៃការធ្វើជាអធិការបតីរបស់លោកស្រីហើយ អតីតនាយករដ្ឋមន្ត្រីវចិន លោក Wen Jianbao ធ្លាប់ពណ៌នាអ្នកស្រី Angela Merkel ថាជាអ្នកនយោបាយដែលលោកទុកចិត្តបំផុត « ព្រោះលោកស្រីតែងតែនិយាយការពិត» ។
ថ្វីបើមានការរិះគន់ នាពេលថ្មីៗនេះ ពីសំណាក់លោកខាងលិច ដោយពួកគេបានសម្តែងការមិនពេញចិត្តចំពោះគោលនយោបាយគាំទ្រ និងការងាកទៅរកចិនរបស់ លោកស្រីក៏ដោយ ក៏នៅតែមានការកោតសរសើរចំពោះអ្នកស្រី Merkel ដែលមន្រ្តីនិងអ្នកជំនាញបានដាក់ឈ្មោះ លោកស្រីថាជាមេដឹកនាំបរទេស តែម្នាក់គត់ដែលស្គាល់ប្រទេសចិនច្បាស់ជាងគេ។
លោក Wang Yiwei សាស្ត្រាចារ្យផ្នែកការសិក្សាពីអឺរ៉ុប នៅសាកលវិទ្យាល័យ Renmin បាននិយាយថា « អ្នកស្រី Merkel បានប្រកាន់ខ្ជាប់ខ្ជួននូវវិធីរក្សាស្ថិរភាព និងតុល្យភាពប្រកបដោយប្រសិទ្ធភាពក្នុងការដោះស្រាយ ជាមួយប្រទេសចិន ហើយអ្នកស្រីមានការប៉ិនប្រសប់ក្នុងការគ្រប់គ្រងទំនាក់ទំនងដែលពោរពេញដោយការរិះគន់ដោយសារភាព ខុសគ្នាខាងមនោគមន៍វិជ្ជា ដែលទាំងនេះធ្វើឲ្យចិនទទួលយកបាននិងកោតសរសើរលោកស្រីយ៉ាងខ្លាំង» ។
ជាមួយនឹងការចូលនិវត្តន៍របស់លោកស្រី ពីជីវិតនយោបាយ បន្ទាប់ពីការបោះឆ្នោត អាល្លឺម៉ង់នៅថ្ងៃទី ២៦ ខែកញ្ញាខាងមុខនេះ ប្រទេសចិន កំពុងមើលឃើញពីការការបញ្ចប់នៃ « យុគសម័យមាស» របស់ទំនាក់ទំនងទ្វេភាគី នេះ ។លោក Wang បាននិយាយបន្តថា «យើង ប្រហែលជាមិនអាចឃើញមេដឹកនាំណាម្នាក់ទៀតដូចលោកស្រីទៀតទេ» ។
ការនាំចេញរបស់អាល្លឺម៉ង់ ទៅកាន់ប្រទេសចិនបានកើនឡើងដល់ចំនួន ១១២ ពាន់លានដុល្លារនៅឆ្នាំ ២០២០ គឺកើនឡើង ៥ ដងបើធៀបនឹងឆ្នាំ ២០០៥ នៅពេលដែល លោកស្រីឡើងកាន់តំណែងដំបូង ហើយចិនគឺជាដៃគូពាណិជ្ជកម្មតែមួយគត់ដ៏ធំបំផុត របស់អាល្លឺម៉ង់ចាប់តាំងពីឆ្នាំ ២០១៦ ។ ប្រទេសអាល្លឺម៉ង់ ក៏ជាប់ចំណាត់ថ្នាក់កំពូលជាប្រទេសដែលបានរផ្ទេរបច្ចេកវិទ្យាបរទេសទៅប្រទេសចិនផងដែរ ដោយមានទឹកប្រាក់សរុប ៨៨,៩ ពាន់លានដុល្លារគិតត្រឹមខែកក្កដាឆ្នាំមុន។
ប្រភព៖ SCMP
