លោកស្រីមឺកែល៖ រុស្ស៊ីមិនអាចប្រើបំពង់បង្ហូរឧស្ម័ន Nord Stream 2 ជាអាវុធបានទេ
អធិការបតីអាល្លឺម៉ង់ លោកស្រី អេនជេឡា មឺកែល (Angela Merkel) ស្រាយចម្ងល់របស់អ៊ុយក្រែនជុំវិញគម្រោងបំពង់បង្ហូរឧស្ម័នធម្មជាតិ Nord Stream 2 (NS2) ដែលជិតបញ្ចប់ការសាងសង់ ដោយនិយាយថាអាល្លឺម៉ង់នឹងមិនអនុញ្ញាតឱ្យរុស្ស៊ីយកបំពង់ឧស្ម័ននេះធ្វើជាអាវុធឡើយ។
លោកស្រីមឺកែលថ្លែងកាលពីថ្ងៃអាទិត្យបន្ទាប់ពីជួបជាមួយប្រធានាធិបតីអ៊ុយក្រែនលោក Volodymyr Zelensky ក្នុងទីក្រុងកៀវថា៖ «ឧស្ម័នមិនអាចប្រើជាអាវុធបានទេ»។ លោកស្រីបន្ថែមថា៖ «យើងនឹងដាក់ទណ្ឌកម្មថ្មី ប្រសិនបើរុស្ស៊ីប្រើបំពង់បង្ហូរឧស្ម័ននេះជាអាវុធ»។
ការសាងសង់បំពង់ NS2 ដែលបង្ហូរឧស្ម័នពីរុស្ស៊ីទៅកាន់អឺរ៉ុបខាងលិច ឆ្លងកាត់សមុទ្របាល់ទិកគឺជាការព្រួយបារម្ភមួយ ជាពិសេសសម្រាប់ទីក្រុងកៀវដែលនឹងខាតបង់ប្រាក់ចំនួន ២ ប៊ីលានដុល្លារ ប្រសិនបើក្រុងម៉ូស្គូកាត់ផ្ដាច់ការផ្គត់ផ្គង់តាមរយៈអ៊ុយក្រែន។ ក្រុមប្រឆាំងនិយាយថា បំពង់បង្ហូរដែលចំណាយទឹកប្រាក់សាងសង់ ១១ ប៊ីលានដុល្លារនេះ ក៏ជាផលប្រយោជន៍មួយរបស់រុស្ស៊ីក្នុងការនាំចេញថាមពលដោយបង្កើនខ្នងបង្អែករបស់ខ្លួនសម្រាប់អឺរ៉ុប។ ប៉ុន្តែក្រុមអ្នកគាំទ្រនិយាយថា បំពង់នេះនឹងគាំទ្រដល់តម្រូវការថាមពលរបស់ប្រទេសនៅពេលថាមពលធ្យូងថ្ម និងរោងចក្រនុយក្លេអ៊ែរត្រូវបានបិទ។
ដោយហៅ NS2 ថាជាគ្រោះថ្នាក់សម្រាប់ប្រទេសរបស់ខ្លួន លោក Zelensky និយាយថា លោកចង់មើលថាតើអ៊ុយក្រែននឹងទទួលបានអ្វីខ្លះ ហើយអ្នកណានឹងផ្តល់ការធានាច្បាស់លាស់លើបំពង់បង្ហូរឧស្ម័ននេះ។ លោកបន្ថែមថា៖ «ខ្ញុំជាប្រធានាធិបតីនៃប្រទេសដែលមានសង្គ្រាម។ យើងចាត់ទុកថាគម្រោងនេះ គឺជាអាវុធភូមិសាស្ត្រនយោបាយដ៏គ្រោះថ្នាក់ពីវិមានក្រឹមឡាំង»។
ជំនួបរវាងមេដឹកនាំក្រុងកៀវ និងប៊ែកឡាំង ធ្វើឡើងតែប្រមាណពីរថ្ងៃប៉ុណ្ណេះបន្ទាប់ពីលោកស្រីមឺកែល ធ្វើកិច្ចចរចានៅទីក្រុងម៉ូស្គូជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន (Vladimir Putin )។ ក្នុងជំនួបនេះ លោកស្រីក៏បានសង្កត់ធ្ងន់ថា ប្រទេសរុស្ស៊ីបានចុះហត្ថលេខាលើកិច្ចសន្យាបន្តបញ្ជូនឧស្ម័នតាមរយៈអ៊ុយក្រែនរហូតដល់ឆ្នាំ ២០២៤ ហើយបានទទូចថាកិច្ចព្រមព្រៀងនេះ «អាច និងគួរតែត្រូវបានពង្រីក»។
ក្នុងអំឡុងសន្និសីទកាសែតកាលថ្ងៃសុក្រជាមួយលោកស្រីមឺកែល លោកពូទីនបានស្តីបន្ទោសទីក្រុងកៀវដោយនិយាយថា៖ «វាហាក់ដូចជាថ្នាក់ដឹកនាំនៃប្រទេសនេះ បានសម្រេចចិត្តជាគោលការណ៍បោះបង់ចោលដំណោះស្រាយដោយសន្តិវិធីចំពោះស្ថានភាពនេះ»។
ប្រភព៖ FT