ក្រុមអ្នកលេងហៃទីប្រកាសផ្តល់ជំនួយ ខណៈចំនួនអ្នកស្លាប់ដោយសារគ្រោះរញ្ជួយដីកើនដល់ជាង ២ពាន់ ២០០ នាក់
ក្រុមអ្នកលេងដ៏ល្បីឈ្មោះនៅហៃទីកាលពីថ្ងៃអាទិត្យបានប្រកាសថា ខ្លួននិងសម្ព័ន្ធមិត្តបានសម្រេចលើកិច្ចព្រមព្រៀងសន្តិភាពមួយ ហើយនឹងជួយដល់ប្រតិបត្តិការជួយសង្គ្រោះនានា ខណៈទីភ្នាក់ងារការពារស៊ីវិលរបស់ប្រទេសចេញរបាយការណ៍ថ្មីលើតួរលេខអ្នកស្លាប់ដោយសារគ្រោះរញ្ជួយដីកម្រិត ៧,២ រ៉ិចទ័រ ដែលកើនឡើងរហូតដល់ ២ ២០៧ នាក់។
លោក Jimmy Cherizier មេដឹកនាំកងកម្លាំងបដិវត្តន៍ G9 និយាយក្នុងវីដេអូដែលបង្ហោះលើបណ្ដាញសង្គមហ្វេសប៊ុកលើបញ្ហាដែលបន្សល់ក្រោយរញ្ជួយដីកាលពីចុងសប្ដាហ៍ទី២ ខែនេះ ថា៖ «យើងចង់ប្រាប់ពួកគេថា កងកម្លាំងបដិវត្តន៍ G9 និងសម្ព័ន្ធមិត្តរួមគ្នា សូមសម្ដែងការអាណិតអាសូរចំពោះការឈឺចាប់ និងទុក្ខព្រួយរបស់យើង»។ លោកបន្ថែមថា៖ «កងកម្លាំងបដិវត្តន៍ G9 និងសម្ព័ន្ធមិត្ត នឹងចូលរួមក្នុងការជួយសង្គ្រោះ។ យើងសូមអញ្ជើញជនរួមជាតិទាំងអស់ បង្ហាញសាមគ្គីភាពជាមួយជនរងគ្រោះ ដោយព្យាយាមចែករំលែកនូវអ្វីដែលមានតិចតួចជាមួយពួកគេ»។
ការប្ដេជ្ញាថ្មីធ្វើឡើង នៅពេលដែលចំនួនអ្នកស្លាប់កើនឡើង ហើយប្រតិបត្តិការជួយសង្គ្រោះកំពុងពង្រីក ខណៈដែលអាជ្ញាធរប្រឈមមុខជាមួយសន្តិសុខនៅតំបន់ចែកចាយ ដោយក្រុមអ្នកលេងបានប្លន់យករថយន្តផ្ដល់ជំនួយ និងសូម្បីតែរថយន្តសង្គ្រោះបន្ទាន់ ដោយបង្ខំឲ្យអ្នកជួយសង្គ្រោះដឹកជញ្ជូនសម្ភារៈតាមឧទ្ធម្ភាគចក្រ។ ទន្ទឹមជាមួយគ្នានោះ កិច្ចខិតខំប្រឹងប្រែងក៏ត្រូវបានរាំងស្ទះដោយសារទឹកជំនន់ និងការខូចខាតផ្លូវថ្នល់ ដែលផ្តល់ភាពតានតឹងបន្ថែមទៀតនៅក្នុងតំបន់ដែលរងផលប៉ះពាល់ធ្ងន់ធ្ងរ។
រដ្ឋាភិបាលហៃទីនិយាយកាលពីថ្ងៃអាទិត្យថា មនុស្សយ៉ាងហោចណាស់ចំនួន ៣៤៤ នាក់បានបាត់ខ្លួន ខណៈ ១២ ២៦៨ នាក់បានរងរបួស និងផ្ទះជិត ៥៣ ០០០ ខ្នងត្រូវបានបំផ្លាញដោយសារគ្រោះរញ្ជួយដីនេះ។ គ្រោះមហន្តរាយលើកនេះ កើតឡើងបន្ទាប់ពីការរញ្ជួយដីដ៏ប្រល័យនៅឆ្នាំ ២០១០ ដែលបានសម្លាប់ប្រជាជនហៃទីជាង ២២០ ០០០ នាក់។
ប្រភព៖ Aljazeera