ប៉ូឡូញនឹងសាងសង់របង ហើយបង្កើនចំនួនទាហានទ្វេដងនៅព្រំដែនជាមួយបេឡារូស
កាលពីថ្ងៃចន្ទទី២៣សីហា រដ្ឋមន្ត្រីក្រសួងការពារជាតិរបស់ប៉ូឡូញបាននិយាយថាប្រទេសរបស់លោកនឹងសាងសង់របងនៅព្រំដែនជាមួយប្រទេសប៉ូឡូញ ហើយនឹងបង្កើនការដាក់ពង្រាយទាហាននៅទីនោះទ្វេដង ដើម្បីបញ្ឈប់លំហូរជនអន្តោប្រវេសន៍ដែលសហភាពអឺរ៉ុបនិយាយថាកំពុងត្រូវបានជំរុញដោយបេឡារូស ក្នុងការសងសឹកចំពោះការដាក់ទណ្ឌកម្មរបស់សហភាពអឺរ៉ុប។
ក្នុងរយៈពេលប៉ុន្មានសប្ដាហ៍ចុងក្រោយនេះ ប្រទេសប៉ូឡូញ ជាមួយនិងសមាជិកសហភាពអឺរ៉ុបដទៃទៀតដូចជាលីទុយអានី និងឡាតវីបានរាយការណ៍ពីការកើនឡើងយ៉ាងខ្លាំងនៃជនអន្តោប្រវេសន៍មកពីប្រទេសដូចជាអ៊ីរ៉ាក់ និងអាហ្វហ្គានីស្ថាន ដែលព្យាយាមឆ្លងព្រំដែនពីប្រទេសបេឡារូសចូលប្រទេសពួកគេ។ សហភាពអឺរ៉ុបបានចោទប្រកាន់បេឡារូសថាបានជំរុញលំហូរនេះ ដើម្បីដាក់សម្ពាធឱ្យសហភាពអឺរ៉ុបដកទណ្ឌកម្ម។
នៅក្នុងសន្និសីទសារព័ត៌មានមួយនៅតំបន់ព្រំដែន រដ្ឋមន្ត្រីក្រសួងការពារជាតិប៉ូឡូញលោកម៉ារីយូស ប្លាសហ្សាក់បាននិយាយថារបងរឹងថ្មីកម្ពស់ ២,៥ ម៉ែត្រនឹងត្រូវសាងសង់នៅទីនោះ។ លោកបន្ថែមទៀតថា៖ «វាចាំបាច់ក្នុងការបង្កើនចំនួនទាហាន។ឆាប់ៗនេះយើងនឹងបង្កើនចំនួនទាហានទ្វេដងដល់ ២.០០០ នាក់»។
រដ្ឋាភិបាលប៉ូឡូញបានរងការរិះគន់យ៉ាងខ្លាំងពីក្រុមការពារសិទ្ធមនុស្សជុំវិញស្ថានភាពជនអន្តោប្រវេសន៍មួយក្រុម ដែលជាប់នៅក្នុងតំបន់សរវាងប៉ុស្តិ៍ឆ្មាំព្រំដែនប៉ូឡូញ និងបេឡារូសអស់រយៈពេលពីរសប្ដាហ៍។
អធិការសិទ្ធមនុស្សប៉ូឡូញបាននិយាយថាឆ្មាំប៉ូឡូញឆ្មាំព្រំដែនបានរំលោភលើអនុសញ្ញាទីក្រុងហ្សឺណែវដោយមិនទទួលយកសេចក្តីប្រកាសដោយផ្ទាល់មាត់ពីជនអន្តោប្រវេសន៍មួយចំនួនដែលពួកគេចង់ដាក់ពាក្យស្នើសុំការការពារអន្តរជាតិនៅប៉ូឡូញ។
ប៉ូឡូញនិយាយថាការអនុញ្ញាតឱ្យជនអន្តោប្រវេសន៍ចូលទឹកដីប៉ូឡូញតាមរយៈបេឡារូស នឹងជំរុញឱ្យមានការអន្តោប្រវេសន៍ ហើយនឹងដើរចូលក្នុងអន្ទាក់របស់ប្រធានាធិបតីបេឡារូសអាឡិចសាន់ឌឺ លូកាសិនកូ។ អនុរដ្ឋមន្ត្រីការបរទេសប៉ូឡូញបាននិយាយថា៖ «ទាំងនេះមិនមែនជាជនភៀសខ្លួនទេពួកគេគឺជាជនចំណាកស្រុកសេដ្ឋកិច្ចដែលត្រូវបាននាំមកដោយរដ្ឋាភិបាលបេឡារូស»។
ប្រទេសលីទុយអានីបាននិយាយថាពួកគេមានបំណងសាងសង់របងចម្ងាយ ៥០៨ គីឡូម៉ែត្រតាមបណ្ដោយព្រំដែនរបស់ខ្លួនជាមួយបេឡារូសឱ្យបានត្រឹមខែកញ្ញាឆ្នាំក្រោយ៕
ប្រភព៖ Reuters