តំណាងកូរ៉េខាងត្បូង អាមេរិកពិភាក្សាស្វែងរកផ្លូវក្នុងការផ្ដល់ជំនួយមនុស្សធម៌ទៅកូរ៉េខាងជើង
តំណាងពិសេសរបស់សហរដ្ឋអាមេរិកទទួលបន្ទុកលើគោលនយោបាយកូរ៉េខាងជើង លោក Sung Kim បានជួបពិភាក្សាជាមួយសមភាគីរបស់លោកគឺ លោក Noh Kyu-duk តំណាងរបស់កូរ៉េខាងត្បូងទទួលបន្ទុកលើកិច្ចការសន្តិភាព និងសន្តិសុខឧបទ្វីបកូរ៉េ នៅឯរដ្ឋធានីសេអ៊ូល ប្រទេសកូរ៉េខាងត្បូងកាលពីថ្ងៃច័ន្ទនេះ។ មន្ត្រីការទូតទាំងពីររូបបានពិភាក្សាគ្នាលើប្រធានបទនានាពាក់ព័ន្ធនឹងដំណោះស្រាយនៅវិបត្តិនុយក្លេអ៊ែរឧបទ្វីបកូរ៉េ។
ក្រោយជំនួបបានបញ្ចប់ លោក Noh បានប្រាប់អ្នកសារព័ត៌មានថា «យើងបានពិភាក្សាអំពីលទ្ធភាពក្នុងការផ្ដល់ជំនួយមនុស្សធម៌ទៅកាន់កូរ៉េខាងជើង»។ លោកបានបន្តថា ភាគីសហរដ្ឋអាមេរិកបន្តផ្ដល់ការគាំទ្រមកកាន់កូរ៉េខាងត្បូង លើគម្រោងកិច្ចសហប្រតិបត្តិការមនុស្សធម៌អន្តរកូរ៉េ។
បើតាមការចុះផ្សាយរបស់សារព័ត៌មាន Yonhap ខាងអាមេរិក និងកូរ៉េបានគិតគូរលើកិច្ចសហប្រតិបត្តិការលើជំនួយមនុស្សធម៌ក្នុងផ្នែកនានា ដែលរាប់បញ្ចូលទាំងផ្នែកសុខាភិបាល។ លោក Noh ក៏បន្ថែមថា ការផ្ដល់ជំនួយទៅកាន់កូរ៉េខាងជើង អាចនឹងសហការជាមួយអង្គការអន្តររដ្ឋាភិបាល ក៏ដូចជាអង្គការក្រៅរដ្ឋាភិបាលនានា។
ជាមួយគ្នានេះដែរ ភាគីទាំងពីរក៏បង្ហាញពីការប្ដេជ្ញាចិត្តចំពោះកិច្ចសន្ទនាណាមួយ ជាមួយកូរ៉េខាងជើងផងដែរ។
លោក Sung Kim បាននិយាយក្នុងឱកាសនោះថា «ខ្ញុំបន្តត្រៀមខ្លួនក្នុងការជួបជាមួយសមភាគីកូរ៉េខាងជើងរបស់ខ្ញុំ នៅគ្រប់ទីកន្លែង និងគ្រប់ពេលវេលា»៕
ប្រភព៖ YNA