អាមេរិកគិតគូរស្នើយកជនភៀសខ្លួនពីអាហ្វហ្គានីស្ថាន មកសំចតនៅកូរ៉េខាងត្បូង
រដ្ឋាភិបាលសហរដ្ឋអាមេរិកគិតគូរចង់ស្នើយកជនភៀសខ្លួន ដែលភៀសខ្លួនចេញពីប្រទេសអាហ្វហ្គានីស្ថានមកសំចតនៅមូលដ្ឋានទ័ពនៅប្រទេសកូរ៉េខាងត្បូង។ នេះបើតាមការបំភ្លឺទៅកាន់សភារបស់លោក Chung Eui-yong រដ្ឋមន្ត្រីការបរទេសកូរ៉េខាងត្បូង។ នេះបើតាមអង្គភាពសារព័ត៌មានកូរ៉េខាងត្បូង Yonhap។
ដំណឹងនេះត្រូវបានលេចឮដំបូងចេញពីសារព័ត៌មានសហរដ្ឋអាមេរិក Wall Street Journal ដែលចុះផ្សាយកាលពីថ្ងៃសៅរ៍កាលពីសប្ដាហ៍មុន ដោយផ្អែកលើប្រភពមន្ត្រីក្រសួងការពារជាតិសហរដ្ឋអាមេរិក។
«វាជាការពិតណាស់ ដែលសម្ព័ន្ធមិត្តរបស់យើងបានពិភាក្សាក្នុងកម្រិតបឋមមួយ អំពីលទ្ធភាពលើរឿងនេះ ប៉ុន្តែរឿងនេះមិនទាន់ពិភាក្សាស៊ីជម្រៅនោះទេ»។ នេះបើតាមការលើកឡើងរបស់លោក Chung។ លោករដ្ឋមន្ត្រីបានបន្ថែមថា ការប្រើប្រាស់មូលដ្ឋានទ័ពអាមេរិកនៅកូរ៉េខាងត្បូង សម្រាប់ជនភៀសខ្លួនជម្លៀសចេញពីអាហ្វហ្គានីស្ថាន ត្រូវតែមានការអនុញ្ញាតពីសំណាក់រដ្ឋាភិបាលរដ្ឋធានីសេអ៊ូល។
ក្នុងការបំភ្លឺសភាដោយឡែកពីគ្នា ទីប្រឹក្សាសន្តិសុខជាតិកូរ៉េខាងត្បូងលោក Suh Hoon ក៏បានប្រាប់សភាថា ខាងរដ្ឋាភិបាលកំពុងត្រួតពិនិត្យអំពីលទ្ធភាពក្នុងការទៅយកជនជាតិអាហ្វហ្គានីស្ថានមួយចំនួន ដែលធ្លាប់ជួយកូរ៉េខាងត្បូងនៅក្នុងគម្រោងមនុស្សធម៌នារយៈពេល ២០ឆ្នាំកន្លងមក។
អនុបញ្ជាការដ្ឋានកងទ័ពអាមេរិកប្រចាំប្រទេសកូរ៉េខាងត្បូងបានអះអាងថា ខ្លួនមិនទាន់ទទួលបានបញ្ជាណាមួយពាក់ព័ន្ធនឹងរឿងនេះទេ៕
ប្រភព៖ YNA
