ដើម្បីជំរុញញលើកទឹកចិត្ត ឲ្យការប្រព្រឹត្តទៅទទួលបានលទ្ធផលរលូនល្អប្រសើរ នៅព្រឹកថ្ងៃទី២៥ ខែសីហា ឆ្នាំ២០២១ ឯកឧត្តម ជាវ តាយ អភិបាល នៃគណៈអភិបាលខេត្តកំពត បានអញ្ជើញជួបសំណេះសំណាលជាមួយកុមារ យុវវ័យ មាតា បិតា អាណាព្យាបាល និងក្រុមគ្រូពេទ្យ នៅមន្ទីរពេទ្យបង្អែកខេត្តកំពត ។

ឯកឧត្តម ជាវ តាយ បានថ្លែងអំណរគុណ និងកោតសរសើរដល់ក្រុមគ្រូពេទ្យ ដែលបានយកចិត្តទុកដាក់ក្នុងស្មារតីទទួលខុសត្រូវខ្ពស់អស់ពីកម្លាំងកាយចិត្ត ក្នុងការចាក់វ៉ាក់សាំងការពាជំងឺកូវីដ១៩ ជូនដល់ប្រជាពលរដ្ឋទូទៅនាពេលកន្លងមក ក្នុងការរួមចំណែក ជាមួយរាជរដ្ឋាភិបាលដើម្បីការពារសុខភាពនិងអាយុជីវិតរបស់ប្រជាពលរដ្ឋឲ្យជៀសផុតពីការស្លាប់ដោយសារជំងឺកូវីដ១៩ដ៏កាចសាហាវនេះ។

ពិសេសថ្ងៃនេះការបន្តចាក់ជូនដល់កុមារ និងយុវវ័យ ដែលមានអាយុចាប់ពី១២ឆ្នាំដល់អាយុក្រោម១៨ឆ្នាំ ក៏ជាគោលដៅមួយយ៉ាងសំខាន់ផងដែរ របស់ប្រមុខរាជរដ្ឋាភិបាលសម្ដេចតេជោហ៊ុន សែន ដើម្បីឲ្យកុមារនិងយុវវ័យមានភាពសាំ បានចូលសិក្សារៀនសូត្រនៅពេលបើកដំណើរការសាលារៀនឡើងវិញខាងមុខនេះ។
ឯកឧត្តមអភិបាលខេត្តក៏បានអំពាវនាវ ដល់ពលរដ្ឋ ពិសេសមាតា បិតាអាណាព្យាបាល ព្រមទាំងកុមារនិងយុវវ័យទាំងអស់ ដែលមានអាយុអាចទទួលការចាក់វ៉ាក់សាំងបាន សូមមកទទួលឲ្យបានគ្រប់គ្នាៗទាំងអស់ ។

កុមារ និងយុវវ័យ នៃខេត្តកំពត បានថ្លែងអំណរគុណនិងជូនពរសម្ដេចតេជោ ហ៊ុន សែន ឱ្យមានសុខភាពល្អ អាយុយឺនយូរដើម្បីជាម្លប់ដឹកនាំនិងការអភិវឌ្ឍប្រទេសជាតិឲ្យបានកាន់តែរីកចម្រើនថែមទៀត និងបានសម្ដែងក្ដីរីករាយដែលបានទទួលវ៉ាក់សាំងការពារជំងឺកូវីដ១៩នៅពេលនេះ ៕ Sila Sarin