តៃវ៉ាន់គ្រោងនឹងបង្កើតអង្គភាពយោធាថ្មីមួយ ដើម្បីឱ្យកងទ័ពបម្រុងត្រៀមខ្លួននឹងសង្គ្រាមបានល្អជាងមុន
ដែនដីកោះតៃវ៉ាន់គ្រោងនឹងបង្កើតអង្គភាពកងទ័ពថ្មីមួយ ដើម្បីបំពាក់បំប៉នសមត្ថភាពកងទ័ពបម្រុងរបស់ខ្លួនឱ្យត្រៀមខ្លួននឹងសង្គ្រាមណាមួយ កើតឡើងជាយថាហេតុ។គម្រោងក្នុងការពង្រឹងសមត្ថភាពកងកម្លាំងដូច្នេះ ត្រូវបានដាក់ទៅជាមួយនឹងសំណើស្នើសុំកញ្ចប់ថវិកាទៅកាន់សភាតៃវ៉ាន់កាលពីថ្ងៃអង្គារកន្លងទៅ សម្រាប់ធ្វើការចំណាយលើវិស័យយោធាសម្រាប់ឆ្នាំ២០២២ ដោយក្រសួងការពារជាតិតៃវ៉ាន់។
បើយោងតាមសំណើខាងលើនេះ ក្រសួងការពារជាតិតៃវ៉ាន់មានបំណងប្រើប្រាស់កញ្ចប់ថវិកាជាតិសរុប ៤១៧,៥ប៊ីលានដុល្លារតៃវ៉ាន់ថ្មី ឬ ប្រហាក់ប្រហែលនឹងទឹកប្រាក់ប្រមាណ ១៧ប៊ីលានដុល្លារសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានជាតិតៃវ៉ាន់។
ថវិកាជាង ១៧ប៊ីលានដុល្លារនេះត្រូវតែទទួលបានការអនុម័តពីសភាតៃវ៉ាន់ ទើបខាងក្រសួង និងអង្គភាពពាក់ព័ន្ធអាចប្រើប្រាស់បាន ដោយថវិកាទាំងនេះនឹងយកមកប្រើប្រាស់សម្រាប់ការទិញអាវុធ និងតម្រូវការផ្នែកការពារជាតិផ្សេងៗ ដែលរួមមានមីស៊ីលទំនើបៗជាដើម។
ចំណែកឯថវិកាយកទៅទ្រទ្រង់អង្គភាពកងទ័ពបម្រុងថ្មីមានប្រមាណ ៩,៣លានដុល្លារ ដោយអង្គភាពនេះនឹងជំនួសបញ្ជាការដ្ឋានកងកម្លាំងប្រដាប់អាវុធបម្រុង ដែលអង្គភាពនេះនឹងដាក់ដំណើរការនៅថ្ងៃទី១ ខែមករា ខាងមុខនេះ។
យោងតាមសំណើស្នើសុំប្រើប្រាស់ថវិកា អង្គភាពនេះនឹងប្រើប្រាស់យន្តការនៃការផ្លាស់ប្ដូរផ្នែកយោធា ដែលមានស្រាប់ ដើម្បីបញ្ជូនសិក្ខាកាម ដើម្បីទៅទស្សនកិច្ច និងទៅហ្វឹកហាត់ក្នុងលក្ខណៈជាក្រុមតូចៗនៅសហរដ្ឋអាមេរិក ដែលជាកិច្ចខិតខំប្រឹងប្រែងមួយក្នុងការបង្កើនសមត្ថភាពក្នុងការកេណ្ឌទ័ព និងការកសាងកម្លាំងទ័ពបម្រុងតៃវ៉ាន់។
កន្លងមកកងទ័ពបម្រុងរបស់តៃវ៉ាន់ត្រូវបានអ្នកជំនាញមើលឃើញថា មានភាពខ្វះខាត និងមិនមានសមត្ថភាពគ្រប់គ្រាន់ក្នុងការជំនួសទាហានសកម្មនោះឡើយ ក្នុងអំឡុងពេលមានសង្គ្រាមណាមួយ ដោយសារតែភាពខ្វះខាតក្នុងការហ្វឹកហាត់។
ការសិក្សារបស់ស្ថាប័នសិក្សាស្រាវជ្រាវផ្នែកយោធារបស់អាមេរិក RAND Corporation កាលពីឆ្នាំ២០១៧ បានឱ្យដឹងថា តៃវ៉ាន់មានសមត្ថភាពក្នុងការកេណ្ឌកងទ័ព និងប្រជាជនរបស់ខ្លួន ដើម្បីទប់ទល់នឹងគ្រោះមហន្តរាយបង្កឡើងដោយធម្មជាតិ និងបង្កឡើងដោយមនុស្ស។
ទោះជាយ៉ាងណាក៏ដោយ ការសិក្សានេះបានព្រមានថា វិធីសាស្ត្រក្នុងការបង្វឹកកងទ័ពបម្រុងរបស់តៃវ៉ាន់ «ហាក់បីដូចជាមិនគ្រប់គ្រាន់សម្រាប់ការត្រៀមខ្លួនរបស់កងកម្លាំងបម្រុងទាំងនោះ ដែលអាចនឹងចូលប្រយុទ្ធតតាំងនឹងការឈ្លានពានពេញទីរបស់ចិន»។
របាយការណ៍ខាងលើបានបន្ថែមថា ខណៈខាងចិនដីគោកខិតខំធ្វើទំនើបកម្មខាងយោធា តៃវ៉ាន់ចេះតែកាត់បន្ថយចំនួនកងទ័ពសកម្មពីមួយឆ្នាំទៅមួយឆ្នាំ។ ជាច្រើនឆ្នាំកន្លងទៅ តៃវ៉ាន់កាត់បន្ថយកងទ័ពសកម្មពីប្រមាណ ៣៨ម៉ឺននាក់នៅឆ្នាំ២០០១ មកត្រឹម ១៧ម៉ឺននាក់។
ជាមួយនឹងស្ថានភាពនេះដែរ ក្រសួងការពារជាតិក៏បានធ្វើការបង្កើតច្បាប់ថ្មី ក្នុងការកោះហៅកងទ័ពបម្រុង ដើម្បីពង្រឹងភាពត្រៀមខ្លួនក្នុងការប្រយុទ្ធ។ បើតាមផែនការថ្មីនេះ កងទ័ពបម្រុងនឹងចូលហាត់រយៈពេល ២សប្ដាហ៍ ខណៈនៅពេលបច្ចុប្បន្នហាត់តែ ៥ ទៅ ៧ថ្ងៃប៉ុណ្ណោះ ហើយកងទ័ពបម្រុងអាចនឹងកោះហៅរាល់ឆ្នាំ ដោយនៅពេលឥលូវនេះកោះហៅ ២ឆ្នាំម្ដង។
គោលនយោបាយថ្មីនេះនឹងអនុវត្តសាកល្បងនៅឆ្នាំ២០២២-២៣ មុននឹងអនុវត្តពេញលេញនៅឆ្នាំ២០២៤។
បន្ថែមនឹងការស្នើសុំថវិកាសម្រាប់ចំណាយឆ្នាំថ្មី ក្រសួងការពារជាតិតៃវ៉ាន់ក៏ធ្វើការជម្រាបសភាថា កងទ័ពរំដោះប្រជាជនចិន (PLA) នៅពេលនេះបង្កជាការគំរាមកំហែងខ្លាំងដល់ដែនកោះរបស់ខ្លួន ដោយកងកម្លាំង PLA កំពុងតែបង្កើនអានុភាពយោធាផ្នែកសង្គ្រាមបែបអ៊ីនធឺណិត និងអេឡិចត្រូនិក ក៏ដូចជាការបង្កកប្រព័ន្ធទំនាក់ទំនងគ្នាទៀតផង។ ចាប់តាំងពីអ្នកស្រី Tsai Ing-wen ឡើងធ្វើជាប្រធានាធិបតីនៅឆ្នាំ២០១៦ ចិន និងតៃវ៉ាន់ហាក់មើលមុខគ្នាមិនត្រូវ។ ជាប្រពៃណីទៅហើយ ចិនដីគោកចាត់ទុកតៃវ៉ាន់ជាខេត្តមួយរបស់ខ្លួន ដោយផ្អែកលើការដឹកនាំប្រទេសបែប «ប្រទេស ១ ប្រព័ន្ធ ២» ប៉ុន្តែរដ្ឋាភិបាលរបស់អ្នកស្រី Tsai ចាប់ផ្ដើមបង្ហាញពីភាពជំទាស់នឹងការប្រកាសយករបស់ចិនដីគោក ហើយចង់បន្តដឹកនាំបែបស្វ័យភាព៕
