ឥណ្ឌូនេស៊ី៖ ឆេះគុក ស្លាប់អ្នកទោសយ៉ាងតិច៤១នាក់
អគ្គិភ័យបានឆាបឆេះក្នុងអគារមានមនុស្សច្រើន នៃពន្ធនាគារមួយកន្លែង ក្នុងខេត្ត Banten ប្រទេសឥណ្ឌូនេស៊ី នៅព្រឹកថ្ងៃទី៨ កញ្ញានេះ បណ្តាលឲ្យស្លាប់មនុស្សយ៉ាងតិច៤១នាក់ របួសមនុស្សរាប់សិបនាក់ទៀត នេះបើតាមមន្ត្រីផ្លូវការបញ្ជាក់។
អ្នកនាំពាក្យនាយកដ្ឋានពន្ធនាគារ នៃក្រសួងច្បាប់និងសិទ្ធិមនុស្ស លោកស្រី Rika Aprianti បាននិយាយថា អគ្គិភ័យ ដែលបានកើតឡើង នៅវេលាម៉ោង ១និង២យប់ រំលងអធ្រាត នៅអគារ Tangerang ត្រូវបានអាជ្ញាធរបាញ់ពន្លត់ហើយ តែអាជ្ញាធរកំពុងស្វែងរកអ្នកបាត់ខ្លួនបន្តទៀត។
លោកស្រី Rika បន្តថា មូលហេតុនៃគ្រោះអគ្គិភ័យនេះស្ថិតក្រោមការស៊ើបអង្កេត។ អ្នកស្លាប់សុទ្ធតែជាអ្នកទោស ហើយមនុស្ស៨នាក់ទៀតរងរបួសធ្ងន់ធ្ងរ និង៧២នាក់ រងរបួសស្រាល៕