រាជធានីភ្នំពេញ៖ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ បានទទួលជួបសម្តែងការគួរសមនិងពិភាក្សាការងារជាមួយ លោក Rho Hyunjun នាយកទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំប្រទេសកម្ពុជា តាមប្រព័ន្ធសន្និសីទវីដេអូ (Zoom)។

ក្នុងជំនួបនោះនេះ ឯកឧត្តមរដ្ឋមន្រ្តី បានមានប្រសាសន៍ស្វាគមន៍ចំពោះកិច្ចសហការល្អនិងការគាំទ្ររបស់ទីភ្នាក់ងារ KOICA នាពេលកន្លងមក។ លើសពីនេះ ឯកឧត្តមរដ្ឋមន្រ្តី បានបង្ហាញអំពីការងារអាទិភាព ចក្ខុវិស័យរបស់ក្រសួង ក៏ដូចជាការបណ្តុះបណ្តាលធនធានមនុស្ស និងមន្ត្រីរាជការនៅក្នុងក្រសួងលើជំនាញឌីជីថល ដើម្បីត្រៀមខ្លួនលើការអភិវឌ្ឍរដ្ឋាភិបាលឌីជីថល នាពេលខាងមុខ។ ឯកឧត្តមរដ្ឋមន្រ្តី ក៏បានស្នើសុំទៅភាគីកូរ៉េឱ្យជួយលើការអភិវឌ្ឍធនធានមនុស្ស ជាពិសេសការប្រើប្រាស់បច្ចេកវិទ្យាសម្រាប់គាំទ្រដល់ការរៀបចំរដ្ឋាភិបាលឌីជីថល។

ក្នុងជំនួបនេះដែរ លោក Rho Hyunjun បានសម្តែងនូវការសាទរ និងស្វាគមន៍កិច្ចសហប្រតិបត្តិការជាមួយក្រសួងលើការងារបណ្តុះបណ្តាលធនធានមនុស្ស និងការចែករំលែកបទពិសោធន៍ លើវិស័យទូរគមនាគមន៍ បច្ចេកវិទ្យាគមនាគមន៍និងព័ត៌មាន និងវិស័យសំខាន់ៗ ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ ផងដែរ៕ដោយ៖ម៉ាដេប៉ូ