អាជ្ញាធរវៀតណាមស្ទាក់បានមនុស្ស ១៥នាក់ ដែលគេចចេញពីតំបន់រាលដាលជំងឺកូវីដ-១៩តាមរថយន្តទូទឹកកក
អាជ្ញាធរវៀតណាមបានធ្វើការស្ទាក់បានមនុស្សចំនួន ១៥នាក់ ដោយក្នុងនោះក៏មានកុមារាវ័យ ៧ឆ្នាំ នៅក្នុងរថយន្តទូទឹកកក ខណៈពួកគេមានបំណងគេចចេញពីតំបន់ភាគខាងត្បូង ដែលកំពុងមានការផ្ទុះរាលដាលខ្លាំងនូវជំងឺកូវីដ-១៩។ នេះបើតាមការចុះផ្សាយរបស់សារព័ត៌មានក្នុងស្រុកវៀតណាម។
ប៉ូលិសខេត្ត Binh Thuan ដែលនៅជាប់នឹងសមុទ្រចិនខាងត្បូង ចម្ងាយប្រមាណ ២០០គីឡូម៉ែត្រពីទីក្រុងហូជីមិញ បានរកឃើញឡានទូទឹកកកមួយបង្កជាការសង្ស័យ ក្រោយពេលដែលព្យាយាមឆ្លងកាត់ប៉ុស្តិ៍ត្រួតពិនិត្យច្រកចេញ-ចូលទៅកាន់តំបន់ភាគខាងជើងវៀតណាម។
បើតាមប្រភពដដែល រថយន្តនោះបានបរបានរាប់សិបគីឡូម៉ែត្រមកហើយ ដោយចេញពីខេត្ត Dong Nai ដែលជាតំបន់ឧស្សាហកម្មក្បែរទីក្រុងហូជីមិញ ដោយអ្នកដំណើរទាំងនោះព្យាយាមទៅស្រុកកំណើតរបស់ពួកគេនៅភាគកណ្ដាលវៀតណាម។ អ្នកដំណើរមួយទៀតសោតក៏មានវិជ្ជមានជំងឺកូវីដ-១៩ផងដែរ ដោយខ្លះមានអាការៈបែកញើស និងដកដង្ហើមខ្លី។
«យើងដឹងហើយថា ជ្រកនៅក្នុងឡានទឹកកកមានហានិភ័យខ្ពស់ និងគ្រោះថ្នាក់ខ្លាំងណាស់ តែយើងនឹងប្រឈមនឹងហានិភ័យខ្លាំងជាងនេះទៀត បើយើងឆ្លងជំងឺនេះ»។ នេះជាការលើកឡើងរបស់បុរសម្នាក់ ដែលធ្វើដំណើរជាមួយកូនប្រុសអាយុ ៧ឆ្នាំរបស់លោក។
ខេត្ត Dong Nai កត់ត្រាអ្នកឆ្លងកូវីដ-១៩សរុប ៣៥ ០០០ករណី ជាមួយនឹងការស្លាប់ ៣២០កណី។ ខេត្តនេះកំពុងស្ថិតក្នុងការបិទខ្ទប់ចាប់តាំងពីខែកក្កដាមកម្ល៉េះ។
វៀតណាមរកឃើញករណីវិជ្ជមានកូវីដ-១៩សរុប ៦១ម៉ឺនករណីហើយ ដោយក្នុងនោះមានអ្នកស្លាប់ប្រមាណ ១១ ៤០០នាក់៕