លោក វ៉្លាឌីមៀ ពូទីន ធ្វើចត្តាឡីស័ក បន្ទាប់ពីទាក់ទងជាមួយអ្នកឆ្លងជំងឺកូវីដ១៩
ក្រឹមឡាំង៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានប្រាប់គណៈរដ្ឋមន្ត្រីថាលោកកំពុងធ្វើចត្តាឡីស័ក (ដាក់ខ្លួននៅដាច់ពីគេ) បន្ទាប់ពីបានទាក់ទងជាមួយអ្នកឆ្លងជំងឺកូវីដ១៩ជាច្រើននាក់ ហើយថា ម្នាក់ក្នុងចំណោមពួកគេបានចាក់វ៉ាក់សាំងបង្ការរួចហើយ តែមិនបានបានចាក់ដូសបន្ថែមអោយទាន់ពេល។
លោក វ្ល៉ាឌីមៀ ពូទីន បាននិយាយដូច្នេះថា ខ្ញុំត្រូវតែពន្យារពេលដំណើរទស្សនកិច្ចរបស់ខ្ញុំទៅកាន់ប្រទេសតាហ្ស៊ីគីស្ថាន ដោយសារមនុស្សជាច្រើនក្នុងក្រុមរបស់ខ្ញុំធ្លាក់ខ្លួនឈឺ។ ម្នាក់ក្នុងចំណោមពួកគេធ្វើការទាក់ទងជិតដិតជាមួយខ្ញុំ… ខ្ញុំបានទាក់ទងគាត់ពេញមួយថ្ងៃ។ លោក ពូទីន បន្ថែមថា កំរិតអង្គបដិបក្ខប្រាណប្រឆាំងមេរោគនៅក្នុងខ្លួនរបស់លោកនៅខ្ពស់នៅឡើយ។
សូមរំលឹកផងដែរថា ប្រធានាធិបតីរុស្ស៊ីរូបនេះ កាលពីថ្ងៃចន្ទដើមសប្តាហ៍នេះបានចូលរួមព្រឹត្តិការណ៍ជាច្រើន ភាគច្រើននៅក្នុងសាលបិទជិត និងក្នុងពិធីមួយបង្ហាញថា មិនមានអ្នកពាក់ម៉ាស់ទេ។ លោកបានចាប់ដៃជាមួយអត្តពលិកប៉ារ៉ាអូឡាំពិក និង ចូលរួមទស្សនាសមយុទ្ធយោធាជាមួយមន្ត្រីផ្សេងៗ និងបានជួបប្រធានាធិបតីស៊ីរី លោក បាសា អាល់អាសាត ផងដែរ៕ ប្រភព៖ RT
