សម្តេចតេជោ ហ៊ុនសែន ឱ្យរដ្ឋមន្ត្រីកសិកម្ម និង អភិបាលខេត្តបំភ្លឺតាមហ្វេសប៊ុករឿងហាមឃាត់ប្រជាជនមិនឱ្យសម្លាប់សត្វពពែយកសាច់,រដ្ឋមន្រ្តីបំភ្លឺជូនភ្លាមៗ
ភ្នំពេញៈ ជាមួយនឹងរូបថតវីដេអូឃ្លីបដែលមានរយៈពេលជាងមួយនាទីនៅព្រឹកថ្ងៃទី១៨ខែកញ្ញាឆ្នាំ២០២១នេះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានដាក់សំណួរទៅរដ្ឋមន្ត្រីក្រសួងកសិកម្ម និង អភិបាលខេត្តបំភ្លឺជូនសម្តេចលបណ្តាញសង្គមហ្វេសប៊ុកចំពោះសកម្មភាពហាមឃាត់ប្រជាជនមិនឱ្យប្រជាជនសម្លាប់ពពែយកសាច់។
បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាប្រតិកម្មបែបនេះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបំភ្លឺតបជូនសម្តេចតេជោភ្លាមៗផងដែរនៅព្រឹកនេះ។
លោក វេង សាខុន បានគោរពជម្រាបជូនសម្តចតេជោ ហ៊ុន សែន ថា”ក្នុងនាមក្រសួងកសិកម្ម រុក្ខាប្រមាញ់ និងនេសាទ ខ្ញុំសូមអនុញ្ញាតគោរពជម្រាបជូនសម្តេចតេជោ មេត្តាជ្រាបដ៏ខ្ពង់ខ្ពស់ថា ៖ ការចិញ្ចឹមសត្វ និងការសម្លាប់សត្វក្នុងគោលបំណងដើម្បីផ្គត់ផ្គង់ជីវភាពក្នុងគ្រួសារគឺពុំមាន ទោសទណ្ឌនិងមានចែងនៅក្នុងច្បាប់ស្តីពីសុខភាពសត្វនិងផលិតកម្មសត្វនោះទេហើយក៏គ្មានជាប់ពាក់ព័ន្ធទៅការប្រព្រឹត្តបទល្មើសអ្វីដែរ លើកលែងតែការសម្លាប់សត្វក្នុងគោលបំណងធ្វើអាជីកម្មតែប៉ុណ្ណោះ ។ ដោយឡែកទាក់ទងទៅនឹងបញ្ហាខាងលើ ខ្ញុំសង្ឃឹមថា អាជ្ញាធរមូលដ្ឋានខេត្តកណ្តាល ដែលបានធ្វើការកិច្ចការនេះផ្ទាល់នឹងផ្តល់ជូនរបាយការណ៍លម្អិតជូនសម្តេចតេជោបានជ្រាបដ៏ខ្ពង់ខ្ពស់បន្ថែម។ ដោយក្តីគោរពដ៏ខ្ពង់ខ្ពង់បំផុតពីខ្ញុំបាទ”។
តាមអ្វីដែលលោករដ្ឋមន្ត្រីក្រសួងកសិកម្មបានបញ្ជាក់រួចមកហើយនេះគឺនៅសល់តែលោកអភិបាលខេត្តកណ្តាលប៉ុណ្ណោះ ដែលត្រូវបំភ្លឺជូនសម្តេចតេជោលើសកម្មភាពនេះ។
គួររំលឹកថា ជាមួយនឹងរូបថតវីដេអូឃ្លីបដែលមានរយៈពេល១:៤៦ នាទីនៅព្រឹកថ្ងៃទី១៨ខែកញ្ញាឆ្នាំ២០២១នេះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានបញ្ចេញប្រតិកម្មចំពោះសកម្មភាពមន្ត្រីជំនាញនៃក្រសួងកសិកម្ម រុក្ខាប្រមាញ់ និង នេសាទដែលចុះទៅហាមឃាត់មិនឱ្យប្រជាពលរដ្ឋសម្លាប់សត្វពពែ។សម្តេចក៏បានកំហិតឱ្យរដ្ឋមន្ត្រីក្រសួងកសិកម្ម និង អភិបាលខេត្តនោះបំភ្លឺជូនសម្តេចតាមហ្វេសប៊ុក ដើម្បីឱ្យប្រជាជនបានដឹងទូទៅវិញ។
លើបណ្តាញសង្គមហ្វេសប៊ុកផ្លូវការរបស់សម្តេចតេជោបានរសេរថា”តើមន្ត្រីយើងធ្វើដល់ថ្នាក់នេះជាមួយប្រជាជនមែនទេ? រដ្ឋមន្ត្រីក្រសួងកសិកម្មនិងអភិបាលខេត្តដឹងរឿងនេះឬទេ?តើរាជរដ្ឋាភិបាលមានដែលហាមឃាត់ប្រជាជនមិនឱ្យសម្លាប់ពពែយកសាច់ជាអាហារពីពេលណាមក ទើបបានជាមន្ត្រីយើងធ្វើមកលើប្រជាជនបែបនេះ?យើងលើកទឹកចិត្តឱ្យប្រជាជន ចិញ្ចឹមសត្វ មិនមែនទុកសម្រាប់ទុកតាំងពិពរណ៍ទេគឺសម្រាប់ជាចំណីអាហារ។ ហេតុអីបានប្រជាជនចិញ្ចឹមសត្វគ្មានសិទ្ធិសម្លាប់សត្វយកសាច់ទទួលទានហើយតម្រូវឱ្យសុំច្បាប់។ បើមានក្នុងច្បាប់គឺត្រូវធ្វើវិសោធនកម្មច្បាប់”។
សម្តេចសរសេរបមន្តថា”ខ្ញុំមិនដឹងថារូបភាពក្នុងវីដេអូនេះកើតនៅក្នុងខេត្តណាទេ។ សុំរដ្ឋមន្ត្រីក្រសួងកសិកម្ម និងអភិបាលខេត្តស្រាវជ្រាវហើយចូលមកបំភ្លឺអោយខ្ញុំតាមហ្វេសបុកនេះ ដើម្បីអោយប្រជាជនបានដឹងជាទូទៅ។ខ្ញុំហួសចិត្តនិងអាណិតប្រជាជនជាទី គោរពស្រលាញ់របស់ខ្ញុំ”៕ដោយៈពលជ័យ