ភ្នំពេញ៖ កាលពីសៀលថ្ងៃទី១៩ ខែកញ្ញា ឆ្នាំ២០២១ អង្គការ សមាគម សភាសហព័ន្ធ និងសហព័ន្ធនិស្សិត នៅកម្ពុជា ចំនួន៦ រួមមាន សមាជិកតំណាងមកពី សភាសម្ព័ន្ធសហជីពជាតិកម្ពុជា សហព័ន្ធ និស្សិត បញ្ញវ័ន្ត ប្រជាធិបតេយ្យកម្ពុជា អង្គការស្មារតីកីឡា សមាគមអ្នកស្រាវជ្រាវវឌ្ឍនភាពកម្ពុជា-ចិន សមាគមពុទ្ធសាសនិកកម្ពុជា-ចិន និងអង្គការពន្លឺអភិវឌ្ឍន៍ដើម្បីជនក្រីក្រ បានរៀបចំកម្មវិធីឈ្វេងយល់ពីវប្បធម៌ចិនស្តីពី ពិធីបុណ្យសែនព្រះខែ នៅមជ្ឈមណ្ឌលវប្បធម៌ចិនប្រចាំកម្ពុជា ស្វិតនៅក្នុងសង្កាត់បឹងកក់២ រាជធានីភ្នំពេញ។

លោក ឈាន យានកាង ប្រធានមជ្ឈមណ្ឌលវប្បធម៌ចិនប្រចាំកម្ពុជា   បានបញ្ជាក់ថា មជ្ឈមណ្ឌលវប្បធម៌ចិនត្រូវបានសម្ពោធស្លាកជាផ្លូវការនាថ្ងៃទី១៣ ខែតុលា ឆ្នាំ២០១៦ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម ស៊ី ជីនភីង ប្រធានាធិបតីនៃសាធារណរដ្ឋប្រជាមានិតចិន។ មជ្ឈមណ្ឌលនេះផ្តោតជាសំខាន់ក្នុងការចែករំលែកនូវពុទ្ធិនិងបទពិសោធន៍ពីវប្បធម៌ចិនជូនដល់ប្រជាជនកម្ពុជានិងមិត្តភក្តិបរទេសនៅក្នុងប្រទេសកម្ពុជា។ ថ្ងៃនេះ ជាការចូលរួមជាមួយគ្នាក្នុងការចែករំលែកពីជ្រុងមួយនៃវប្បធម៌ចិនស្តីពីពិធីសែនព្រះខែប្រពៃណីជនជាតិចិន។

 លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន បានថ្លែងអំណរគុណដល់បណ្តាសង្គមស៊ីវិលទាំងអស់ដែលបានចូលរួមក្នុងកម្មវិធីនេះក្នុងគោលបំណងពង្រឹងនិងពង្រីកចំណងទាក់ទងដែកថែបរវាងប្រជាជាតិយើងទាំងពីរ កម្ពុជានិងចិន ហើយក៏ជាការចូលរួមយល់ដឹងបន្ថែមក្រៅពីរឿងព្រេងទាក់ទងនឹងពិធីសែនព្រះខែ គឺការយល់ដឹងពីបច្ចេកវិទ្យាយានអវកាសចិនដែលកំពុងរីកលូតលាស់យ៉ាងខ្លាំងក្លា ដែលជាពិសេសរឿងរ៉ាវដែលយានអវកាសចិនទើបវិលត្រឡប់មកពីឋានព្រះចន្ទវិញ។

ព្រះតេជគុណ Zhao Xing អនុប្រធានសមាគមពុទ្ធសាសនិកកម្ពុជា-ចិនបានថ្លែងនូវការកោតសរសើរចំពោះសាមគ្គីភាពនិងការចែករំលែកឱ្យគ្នាទៅវិញទៅមកក្នុងនាមជាដៃគូសង្គមស៊ីវិលដើម្បីរួមចំណែកបម្រើដល់ផលប្រយោជន៍របស់ប្រជាជន។

លោក សួង ហួត ប្រធានសភាសម្ព័ន្ធសហជីពកម្ពុជាបានសាទរនឹងសមិទ្ធផលជាច្រើនដែលសម្រេចបានក្រោមកិច្ចសហការយ៉ាងល្អរវាងសង្គមស៊ីវិលនៃប្រទេសយើងទាំងពីរ ហើយក៏បន្តលើកទឹកចិត្តដល់សង្គមស៊ីវិលរបស់ចិនក្នុងការចូលរួមចំណែកចែករំលែកនិងជួយដល់សង្គមស៊ីវិលនានារបស់កម្ពុជាក្នុងការចូលរួមបំពេញនូវតម្រូវការជាក់ស្តែងរបស់ប្រជាជននៅមូលដ្ឋានផងដែរ៕