ថៃ៖ សិស្ស២ពាន់នាក់ដំបូង បានចាក់វ៉ាក់សាំងស៊ីណូហ្វាម
កាលពីថ្ងៃទី២០ កញ្ញាម្សិលមិញថា ស្ថាប័នមួយនៅថៃបានចាប់ផ្តើមចាក់វ៉ាក់សាំងចិន ប្រភេទស៊ីណូហ្វាម ដល់សិស្សានុសិស្សដំបូង ចំនួន២ពាន់នាក់ នៅបាងកក និងបណ្តាខេត្តជិតខាង មុនពេលបើកទ្វារសាលារៀនឡើងវិញ នេះបើតាមការទីភ្នាក់ងារព័ត៌មានបាងកកប៉ុស្តិ៍។
ប្រភពថា សិស្សសាលាទាំងនោះមានអាយុ ចន្លោះពី១០ ទៅ១៨ ឆ្នាំ មកពីសាលារៀន មួយចំនួនដោយមានការអនុញ្ញាតពីមាតាបិតារបស់ពួកគេ។ ទីតាំងចាក់គឺធ្វើឡើង នៅរាជបណ្ឌិត្យសភា ជូឡាបូន ដោយស្ថាប័នមួយនេះគ្រោងនឹងចាក់ជូនសិស្ស ១៨០០០០នាក់ មកពី១៣២សាលា នៅបាងកក ដែលឳពុកម្តាយសិស្សបានស្នើសុំមក ដោយមិនគិតថ្លៃ។
បើតាមទីភ្នាក់ងារព័ត៌មាននេះដដែល វ៉ាក់សាំងស៊ីណូហ្វាមមិនទាន់ត្រូវបានអនុម័តឲ្យប្រើប្រាស់សម្រាប់សិស្សសាលា ដោយរដ្ឋបាលអាហារនិងឳសថរបស់ថៃនៅឡើយទេ។ ប៉ុន្តែអគ្គលេខាធិការរាជបណ្ឌិត្យសភា ជូឡាបូន បានអះអាងថា ស៊ីណូហ្វាម មានសុវត្ថិភាពដល់មនុស្សវ័យជំទង់ ដែលត្រូវបានចាក់ជូនវ័យទាំងនេះរូចហើយ នៅប្រទេសចិន ឈីលី ស្រី លង្កា និងអេមីរ៉ាត់ អារ៉ាប់រួម៕
