កង្វះនៃសេចក្ដីទុកចិត្តធ្វើឱ្យសម្ព័ន្ធភាពណាតូមិនចុះសម្រុងនឹងគ្នា ក្រោមទំនាស់នៃកិច្ចព្រមព្រៀងនាវាមុជទឹក
ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) កំពុងលេងល្បែងឈុតធំ ដោយលោកណែនាំឱ្យរដ្ឋមន្ត្រីការបរទេសរបស់ខ្លួនប្រើភាសាដែលមិនផ្សារភ្ជាប់ជាមួយនឹងការទូត លើកលែងជាមួយសម្ព័ន្ធមិត្តមួយចំនួន ដោយពិពណ៌នាអំពីសកម្មភាពរបស់អាមេរិកដូចជាការកុហក ចិត្តវៀចវេរ និងការមើលងាយជាដើម ហើយថែមទាំងកោះហៅឯកអគ្គរដ្ឋទូតបារាំងប្រចាំប្រទេសដែលជាសម្ព័ន្ធមិត្តយូរឆ្នាំរបស់ខ្លួនមួយនេះជាលើកដំបូងទៀតផង។
ជាមួយគ្នានោះ លោក Macron ក៏កោះហៅឯកអគ្គរដ្ឋទូតបារាំងប្រចាំប្រទេសអ៊ីតាលី បន្ទាប់ពីមេដឹកនាំប្រទេសនេះបញ្ចេញមតិរិះគន់ជាសាធារណៈលើរដ្ឋាភិបាលបារាំងកាលពីឆ្នាំ ២០១៩ និងក្រោយមកទៀតគឺឯកអគ្គរដ្ឋទូតប្រចាំប្រទេសតួកគីក្រោយប្រធានាធិបតីតួកគីលោក Recep Tayyip Erdogan និយាយថាលោក Macron ត្រូវការការព្យាបាលបញ្ហាចិត្តកាលពីឆ្នាំ ២០២០។
កាយវិការការទូតបែបនេះ ត្រូវបានគេហៅថាជាគោលនយោបាយការបរទេសកោងហួស។ លោកក៏បានកោះហៅឯកអគ្គរដ្ឋទូតប្រចាំប្រទេសអូស្រ្តាលី ដើម្បីការសម្រេចចិត្តលុបចោលកិច្ចព្រមព្រៀងនាវាមុជទឹករបស់ប្រទេសនេះជាមួយបារាំង ហើយងាកទៅចាប់អាមេរិក និងអង់គ្លេសវិញ។
សម្រាប់លោក Macron ការបរាជ័យ និងទំនាស់លើកិច្ចព្រមព្រៀងនេះបង្ហាញថាសម្ព័ន្ធភាពណាតូមានភាពទន់ខ្សោយរហូតដល់មានបញ្ហាដោយសារខ្វះការជឿទុកចិត្តគ្នា។ បារាំងចង់ឱ្យស្វ័យភាពយុទ្ធសាស្ត្រអឺរ៉ុប និងអធិបតេយ្យភាពអឺរ៉ុបក្លាយជាការពិត។ ករណីសម្រាប់អឺរ៉ុបដែលរួបរួមគ្នាដើម្បីរៀបចំផែនការរបស់ខ្លួនអាចនឹងកាន់តែខ្លាំង។
សម្រាប់លោក Jean-Yves Le Drian រដ្ឋមន្រ្តីទទួលបន្ទុកកិច្ចការអឺរ៉ុប និងបរទេសបារាំង ការនិយាយតាមលោក Macron គឺជាមធ្យោបាយតែមួយគត់សម្រាប់អឺរ៉ុបដែល នៅតែជាផ្នែកមួយនៃប្រវត្តិសាស្ត្រ។ បញ្ហាគឺថា សហភាពអឺរ៉ុបបានបែកបាក់គ្នា។ ការប្រឈមមុខដាក់គ្នាចំពោះប្រទេសបារាំង ត្រូវប្រឈមមុខនឹងភាពស្ងៀមស្ងាត់ពីសម្ព័ន្ធមិត្តអឺរ៉ុបរបស់ខ្លួន ទោះបីជាលោកស្រី Ursula von der Leyen ប្រធានគណៈកម្មការអឺរ៉ុបប្រាប់ទូរទស្សន៍ CNN ថារដ្ឋសមាជិកមួយរបស់ខ្លួនត្រូវបានគេធ្វើដាក់តាមវិធីដែលមិនអាចទទួលយកបានក្ដី។
ចំពោះបណ្តាប្រទេសនៅអឺរ៉ុបកណ្តាលដូចជាប៉ូឡូញ និងហុងគ្រី ពួកគេដាក់ការការពាររបស់អាមេរិកតាមរយៈអង្គការណាតូធំជាងផលប្រយោជន៍របស់បារាំងនៅឥណ្ឌូ-ប៉ាស៊ីហ្វិក។ សម្រាប់ប្រទេសទាំងនេះ អធិបតេយ្យភាពរបស់អឺរ៉ុបគឺជាភាពមិនប្រក្រតីដោយពួកគេចង់បានស្វ័យភាពផ្ទាល់ខ្លួន ដោយសារតែការសម្រេចចិត្តគោលនយោបាយការបរទេសរបស់សហភាពអឺរ៉ុបត្រូវតែធ្វើឡើងជាឯកច្ឆន្ទ។
លោក Dominique Moisi អ្នកវិទ្យាសាស្ត្រនយោបាយ និយាយដោយសំដៅលើដំណើរស្វែងរករបស់ប្រធានាធិបតី Macron សម្រាប់អឺរ៉ុបឱ្យខ្លាំងជាងមុន និងមានលក្ខណៈជាស្វយ័តថា៖ «កិច្ចព្រមព្រៀងនាវាមុជទឹកនេះ បានពង្រឹងសុពលភាពនៃការអង្វររបស់លោក Macron។ ហើយវាក៏បានពង្រឹងភាពឯកកោរបស់លោក Macron ផងដែរ»។
យ៉ាងណាមិញ រដ្ឋមន្រ្តីការបរទេសសហភាពអឺរ៉ុបលោក Josep Borrell កាលពីថ្ងៃចន្ទនេះ បានសម្តែងការគាំទ្រ និងសាមគ្គីភាពជាមួយប្រទេសបារាំងក្នុងកិច្ចប្រជុំមួយនៅក្រុងញូវយ៉កដើម្បីពិភាក្សាពីការលុបចោលការបញ្ជាទិញនាវាមុជទឹករបស់អូស្រ្តាលីជាមួយក្រុងប៉ារីសដើម្បីគាំទ្រកិច្ចព្រមព្រៀងជាមួយអាមេរិក និងអង់គ្លេស។
លោកនិយាយថា៖ «កិច្ចសហប្រតិបត្តិការបន្ថែមទៀត ការសម្របសម្រួលកាន់តែច្រើន ការបែកបាក់គ្នាតិច គឺត្រូវការដើម្បីសម្រេចបាននូវតំបន់ឥណ្ឌូ-ប៉ាស៊ីហ្វិកដែលចិនកំពុងខ្ទរឡើង ឱ្យមានស្ថិរភាព និងសន្តិភាព»។
កិច្ចព្រមព្រៀងនាវាមុជទឹក គឺជាការសងត្រលប់ដ៏អាក្រក់សម្រាប់សម្បទាននោះ ជាពិសេសកិច្ចព្រមព្រៀងរបស់បារាំងផ្ទាល់ដែលត្រូវបានហែកចោល ត្រូវបានគេមើលឃើញថាជាមូលដ្ឋានគ្រឹះនៃការចូលរួមជាមួយអាស៊ីរបស់ខ្លួន ដើម្បីអ្វីដែលគេហៅថា «សេរីភាព និងអធិបតេយ្យភាពរបស់ទាំងអស់គ្នា»។
យោងតាមលោក Gabriel Attal អ្នកនាំពាក្យប្រធានាធិបតីបារាំង លោក Biden និងលោក Macron នឹងជួបនិយាយនៅប៉ុន្មានថ្ងៃខាងមុខនេះ។ អ្នកនាំពាក្យសេតវិមានអ្នកស្រី Jen Psaki និយាយកាលពីថ្ងៃចន្ទថាអ្នកស្រីរំពឹងថាលោក Biden នឹងបញ្ជាក់ជាថ្មីពីការប្តេជ្ញាចិត្តរបស់អាមេរិក ក្នុងការធ្វើការជាមួយដៃគូចាស់និងជិតស្និទ្ធបំផុតម្នាក់របស់ខ្លួន លើបញ្ហាប្រឈមជាច្រើនដែលសហគមន៍ពិភពលោកកំពុងជួបប្រទះនៅពេលលោកនិយាយជួបជាមួយលោក Macron។
ប្រភព៖ New York Times
