កូរ៉េខាងជើងចំអកឱ្យកូរ៉េខាងត្បូង រឿងធ្វើតេស្តបាញ់មីស៊ីលបាលីស្ទិកចេញពីនាវាមុជទឹក
មីស៊ីលបាលីស្ទិកបាញ់ចេញពីនាវាមុជទឹករបស់កូរ៉េខាងត្បូង មានលក្ខណៈសាមញ្ញ និងស្ថិតក្នុងដំណាក់កាលដំបូងៗ។ នេះបើតាមការលើកឡើងរបស់លោក Jang Chang Ha ប្រធានបណ្ឌិត្យសភាវិទ្យាសាស្ត្រការពារជាតិកូរ៉េខាងជើង ដែលមជ្ឈមណ្ឌលអភិវឌ្ឍន៍ និងលទ្ធកម្មអាវុធរបស់កូរ៉េខាងជើង។
លោក Jang បាននិយាយនៅក្នុងបទអត្ថាធិប្បាយមួយរបស់ទីភ្នាក់ងារសារព័ត៌មានកូរ៉េខាងជើងថា តាមរយៈរូបភាព ដែលបង្ហោះនៅក្នុងប្រព័ន្ធផ្សព្វផ្សាយ មីស៊ីលនេះមិនមានសណ្ឋានដូចជាមីស៊ីលបាលីស្ទិកបាញ់ចេញពីនាវាមុជទឹក (SLBM) ទេ តែប្រៀបដូចជាមីស៊ីលបាលីស្ទិក ដែលបាញ់ចេញពីដីធម្មតា ចំណែកឯក្បាលគ្រាប់វិញធ្វើត្រាប់តាមសព្វាវុធរបស់ឥណ្ឌា។
«បើបកស្រាយជាពាក្យពេចន៍វិញ ការងារទាំងនេះជាការងារដ៏ខ្ជីខ្ជាមួយ។ ប្រសិនបើមីស៊ីលនេះ ជាមីស៊ីល SLBM វិញ នោះប្រហែលជាស្ថិតក្នុងដំណាក់កាលមូលដ្ឋាន ឬ ដំណាក់កាលក្មេងខ្ចី»។ នេះជាការលើកឡើងរបស់លោក Jang។ លោកបានបន្ថែមថា មីស៊ីលរបស់កូរ៉េខាងត្បូងនេះ មិនទាន់បង្កជាការគំរាមកំហែងដល់កូរ៉េខាងជើងនោះទេ។
ខាងក្រសួងការពារជាតិកូរ៉េខាងត្បូង មិនទាន់បកស្រាយនឹងការលើកឡើងរបស់បទអត្ថាធិប្បាយនេះឡើយ។
កូរ៉េខាងត្បូង កាលពីថ្ងៃពុធសប្ដាហ៍មុន បានប្រកាសថា ខ្លួនបានធ្វើតេស្តមីស៊ីលបាលីស្ទិកបាញ់ចេញពីនាវាមុជទឹកបានដោយជោគជ័យ៕
ប្រភព៖ Reuters