ការដ្ឋានសាងសង់ក្រុងមែលប៊នរបស់អូស្រ្តាលីត្រូវបិទបន្ទាប់ពីមានបាតុកម្មហិង្សាអំពីវ៉ាក់សាំងកូវីដ
រដ្ឋវិចតូរីយ៉ា (Victoria) ប្រទេសអូស្ត្រាលី បិទការដ្ឋានសាងសង់នៅទូទាំងក្រុងមែលប៊ន បន្ទាប់ពីមានបាតុកម្មដោយហិង្សាកាលពីថ្ងៃចន្ទ ប្រឆាំងនឹងវិធានការតម្រូវឱ្យបុគ្គលិកបង្ហាញពីប័ណ្ណបញ្ជាក់ការចាក់វ៉ាក់សាំងនៅកន្លែងការងារ។
ក្រុមមន្រ្តីនិយាយថា កន្លែងខ្លះនឹងត្រូវបិទរហូតដល់ពីរសប្តាហ៍ បន្ទាប់ពីកម្មករសំណង់ និងអ្នកតវ៉ាផ្សេងទៀតប៉ះទង្គិចគ្នា។ ទ្រព្យសម្បត្តិក៏ខូចខាត ហើយប៉ូលីសនិយាយថា មនុស្សជាច្រើនត្រូវបានចាប់ខ្លួន។
ប៉ូលីសកុបកម្មត្រូវបានដាក់ពង្រាយ ហើយត្រូវបានគេរាយការណ៍ថាបានប្រើគ្រាប់កាំភ្លើងជ័រដើម្បីបំបែកហ្វូងមនុស្ស។មនុស្សរាប់រយនាក់ប្រមូលផ្តុំគ្នាទៀតនៅក្រុងមែលប៊នដើម្បីតវ៉ាប្រឆាំងវិធានការវ៉ាក់សាំងមួយទៀតកាលពីថ្ងៃអង្គារ ដោយខ្លះកាន់ភ្លើងជំនួយ និងខ្លះថែមទាំងចោលទឹកនោមដាក់អ្នកយកព័ត៌មាន។ សហជីពសំណង់ ព្រៃឈើ ដែនសមុទ្រ រ៉ែ និងថាមពល(CFMEU)ក្នុងរដ្ឋ ត្រូវបានបំផ្លិចបំផ្លាញ ដោយកញ្ចក់នៅខាងមុខអាគារត្រូវបានគេវាយបំបែកកំឡុងពេលមានការប៉ះទង្គិចគ្នាកាលពីថ្ងៃច័ន្ទ។
បាតុកម្មហិង្សានេះកើតមានឡើង បន្ទាប់ពីមានសេចក្តីប្រកាសមួយថា ចាប់ពីថ្ងៃព្រហស្បតិ៍ទី ២៣ ខែកញ្ញាទៅ កម្មករសំណង់នឹងត្រូវបង្ហាញភស្តុតាងថាខ្លួនបានចាក់វ៉ាក់សាំងយ៉ាងហោចណាស់មួយដូសដើម្បីបន្តធ្វើការ។
CFMEU ថ្កោលទោសយ៉ាងខ្លាំងចំពោះការវាយប្រហារទៅលើការិយាល័យនៅក្រុងមែលប៊ន ដោយនិយាយថា អំពើហឹង្សាកើតឡើងបន្ទាប់ពីក្រុមស្តាំនិយមជ្រៀតចូលការតវ៉ា។ សហជីពនេះនិយាយនៅក្នុងសេចក្តីថ្លែងការណ៍មួយថា សមាជិករបស់ខ្លួនមួយចំនួនរងរបួសអំឡុងការប៉ះទង្គិចគ្នា ដោយមន្ត្រីខ្លះត្រូវគេគប់ដបចំជាដើម។
សមាគមស្ថាបត្យករមេរដ្ឋវិចតូរីយ៉ា និយាយថាកន្លែងការដ្ឋានសាងសង់ទាំងអស់នៅក្នុងក្រុងមែលប៊នបិទពីយប់ថ្ងៃចន្ទទៅ ដែលជាការឆ្លើយតបទៅនឹងការកើនឡើងនៃការឆ្លងកូវីដ-១៩ និងបាតុកម្មហិង្សា។
ជាមួយនឹងអត្រាមរណភាពកូវីដ-១៩មានកម្រិតទាប អូស្ត្រាលីត្រូវបានគេសរសើរចំពោះកិច្ចខិតខំប្រឹងប្រែងរបស់ខ្លួនក្នុងការមេរោគឆ្លងនេះ។ រហូតមកដល់ពេលនេះ ប្រទេសនេះមានករណីឆ្លងសរុបជាង ៨៧ ០០០ ករណី និងអ្នកស្លាប់ចំនួន ១ ១៦៧ ករណី។ យ៉ាងណាមិញ ថ្មីៗនេះប្រជាជនប្រហែលពាក់កណ្តាលត្រូវស្ថិតនៅក្នុងការបិទខ្ទប់ ដោយសារតែការផ្ទុះឡើងនៃការឆ្លងយ៉ាងឆាប់រហ័សរបស់វ៉ារ្យ៉ង់ដែលតានៅក្រុងមែលប៊ន ស៊ីដនី និងរដ្ឋធានីកង់បេរ៉ាជាដើម។
ប្រភព៖ BBC