ការបែកធ្លាយទិន្នន័យក្រសួងការពារជាតិអង់គ្លេស ធ្វើឱ្យអ្នកបកប្រែអាហ្វហ្គានីស្ថានរាប់រយនាក់រងហានិភ័យ
អាសយដ្ឋានសារអេឡិចត្រូនិក (email) របស់អ្នកបកប្រែជនជាតិអាហ្វហ្គានីស្ថានរាប់រយនាក់ ដែលធ្វើការជាមួយកងកម្លាំងយោធាអង់គ្លេស រួមទាំងខ្លះដែលកំពុងលាក់ខ្លួនពីក្រុមតាលីបង់ ត្រូវបានចែកចាយជាសាធារណៈបន្ទាប់ពីមានការបែកធ្លាយទិន្នន័យពីក្រសួងការពារជាតិអង់គ្លេស។
រដ្ឋាភិបាលអង់គ្លេសបានបើកការស៊ើបអង្កេតទៅលើការបែកធ្លាយនេះ ដែលព័ត៌មានផ្ទាល់ខ្លួនរបស់អ្នកបកប្រែជាង ២៦០ នាក់ត្រូវបានបង្ហាញជាសាធារណៈនៅក្នុងសារអ៊ីមែលដោយក្រសួងការពារជាតិប្ដេជ្ញាថានឹងជួយជម្លៀសពួកគេមកចក្រភពអង់គ្លេស។
អ្នកបកប្រែមួយរូបដែលបានទទួលសារនេះ បានប្រាប់សារព័ត៌មាន BBC ថាកំហុសនេះអាចបង្កហានិភ័យដល់ជីវិតអ្នកបកប្រែធ្វើការឱ្យអង់គ្លេសទាំងអស់ ជាពិសេសអ្នកមិនទាន់អាចចាកចេញពីប្រទេសអាហ្វហ្គានីស្ថានហើយកំពុងលាក់ខ្លួនពីក្រុមតាលីបង់។
អ្នកបកប្រែរូបនេះនិយាយថា៖ «អ្នកបកប្រែខ្លះមិនបានកត់សំគាល់ពីកំហុសនេះទេ ហើយពួកគេបានឆ្លើយតបទៅនឹងអ៊ីមែលទាំងអស់រួចទៅហើយ ហើយពួកគេបានពន្យល់ពីស្ថានភាពរបស់ពួកគេ ដែលគ្រោះថ្នាក់ខ្លាំង»។
អាសយដ្ឋានអ៊ីមែលខ្លះបានបង្ហាញឈ្មោះពិត និងរូបភាពរបស់បុគ្គលទាំងនោះ។
ក្នុងអ៊ីមែលខាងលើ ក្រសួងបានប្រាប់អ្នកបកប្រែថាក្រសួងកំពុងធ្វើអ្វីៗគ្រប់យ៉ាងដើម្បីជួយពួកគេភៀសខ្លួនមកអង់គ្លេស ប៉ុន្តែព្រមានថាពួកគេមិនគួរចាកចេញពីទីតាំងបច្ចុប្បន្នរបស់ពួកគេទេ ប្រសិនបើមិនមានសុវត្ថិភាពក្នុងការធ្វើដូច្នេះ។
ប្រមាណ ៣០ នាទីក្រោយមកក្រសួងបានផ្ញើសារអ៊ីមែលមួយទៀត ណែនាំអ្នកទទួលសារមុនឱ្យផ្លាស់ប្ដូរអាសយដ្ឋានអ៊ីមែលរបស់ពួកគេ បន្ទាប់ពីរកឃើញកំហុស។
កាលពីថ្ងៃអង្គារ ទី២១ កញ្ញារដ្ឋមន្ត្រីក្រសួងការពារជាតិលោកបេន វ៉លឡេសបាននិយាយថាកំហុសរបស់ក្រុមការងារគោលនយោបាយជំនួយការផ្លាស់ប្ដូរទីលំនៅអាហ្វហ្គានីស្ថាន (ARAP) គឺ «មិនអាចទទួលយកបានទេ»។
លោកវ៉លឡេសបានប្រាប់សភាអង់គ្លេសថា៖ «ខ្ញុំសូមអភ័យទោសចំពោះជនជាតិអាហ្វហ្គានីស្ថានដែលរងផលប៉ះពាល់ដោយការបែកធ្លាយទិន្នន័យនេះ និងអ្នកណាដែលយើងកំពុងធ្វើការជាមួយ ដើម្បីធ្វើការណែនាំសន្តិសុខ»។
លោកនិយាយថាមន្ត្រីម្នាក់ត្រូវបានព្យួរការងារ ខណៈពេលដែលក្រសួងរង់ចាំលទ្ធផលនៃការស៊ើបអង្កេតលើឧបទ្ទវហេតុនេះ ដែលលោកបាននិយាយថាបានប៉ះពាល់ដល់មនុស្សប្រហែល ២៦០ នាក់ដែលនៅលាក់ខ្លួនក្នុងប្រទេសអាហ្វហ្គានីស្ថាន។
លោកបន្ថែមទៀតថា៖ «ដំណើរការសម្រាប់គ្រប់គ្រងទិន្នន័យ និងដំណើរការឆ្លើយឆ្លងត្រូវបានផ្លាស់ប្ដូររួចហើយ»។
ប៉ុន្តែអតីតរដ្ឋមន្ត្រីក្រសួងការពារជាតិអង់គ្លេសលោកចននី មឺស៊ើរបានចោទក្រសួងនេះថាបានធ្វើការ«ធ្វេសប្រហែសដោយឧក្រិដ្ឋកម្ម» ហើយបាននិយាយថាកំហុសរបស់ពួកគេគឺកំពុង «ជិះឥទ្ធិពលយ៉ាងខ្លាំងដល់មនុស្សដែលនៅក្នុងប្រទេស»។
លោកនាយករដ្ឋមន្រ្តីបូរីស ចនសុននៅដើមខែនេះបាននិយាយថាមនុស្ស ៣១១ នាក់ដែលមានសិទ្ធិទទួលបានការតាំងទីលំនៅថ្មីនៅចក្រភពអង់គ្លេសក្រោមគម្រោង ARAP ដូចជាអ្នកបកប្រែធ្វើការឱ្យកងកម្លាំងអង់គ្លេស ត្រូវបានទុកចោលនៅអាហ្វហ្គានីស្ថាន។
បើទោះបីជាក្រុមតាលីបង់បានធ្វើការប្ដេជ្ញាថាមិនធ្វើការសងសឹកទៅលើសមាជិកកងកម្លាំងសន្តិសុខរបស់របបមុន និងជំនួយការរបស់កងកម្លាំងបរទេសក៏ដោយ ក៏មានការរាយការណ៍ជាច្រើនអំពីការសម្លាប់ធ្វើឃាតទៅលើអតីតសមាជិកកងកម្លាំងសន្តិសុខអាហ្វហ្គានីស្ថាន ជាពិសេសអ្នកបកប្រែឱ្យកងកម្លាំងបរទេស៕
ប្រភព៖ Aljazeera
