ព្រះសង្ឃ និងអ្នកស្នាក់នៅក្នុងវត្តទូទាំងរាជធានីភ្នំពេញ ត្រូវបានយក សំណាក
រាជធានីភ្នំពេញ ៖ មន្ត្រីជាន់ខ្ពស់មន្ទីរធម្មការនិងសាសនារាជធានីភ្នំពេញ បញ្ជាក់ថា គិតត្រឹមម៉ោង ១២ ថ្ងៃត្រង់ ថ្ងៃទី២៤ ខែកញ្ញា ក្រុមការងារយកសំណាករកមេរោគកូវីដ-១៩ដល់ព្រះសង្ឃ និងអ្នកស្នាក់នៅក្នុងវត្តទូទាំងរាជធានីភ្នំពេញ បានប្រមាណ៥០% ក្នុងចំណោមវត្តចំនួន១៥១ ។
លោក ទេព គង្គា ប្រធានមន្ទីរធម្មការ និងសាសនារាជធានីភ្នំពេញ ថ្លែងថា គិតត្រឹមម៉ោង១២ព្រឹកថ្ងៃទី២៤ខែកញ្ញា ក្រុមការងារយកសំណាករកមេរោគកូវីដ១៩ដល់ព្រះសង្ឃ គណៈកម្មការអាចារ្យ និងសិស្សនិស្សិតស្នាក់នៅតាមវត្តក្នុងរាជធានីភ្នំពេញ បានប្រមាណជិត៤ពាន់អង្គ/នាក់ឬជិត៨០វត្ត ឬស្មើរនឹងប្រមាណ៥០% ក្នុងចំណោមវគ្គនៅទូទាំងរាជធានីភ្នំពេញមានចំនួន១៥១វត្ត ។
លោក បញ្ជាក់ថា លោកមិនទាន់បានទទួល ព័ត៌មានអំពីការរកឃើញ មេរោគកូវីដ១៩នោះទេ ប៉ុន្ដែបើតាមប្រភពមិនទាន់ច្បាស់ការណ៏ថា ក្នុងចំណោម ព្រះសង្ឃ គណៈកម្មការអាចារ្យ និងសិស្ស និស្សិត ដែលស្នាក់នៅក្នុងវត្តប្រមាណជិត៤ពាន់ អង្គ /នាក់នោះមានវិជ្ជមានកូវីដ១៩មានចំនួនតិចតួចទេ ។
តារាងរបស់ក្រុមគ្រូពេទ្យសម្តេចតេជោប្រឆាំងកូវីដ-១៩ (TYDA) បង្ហាញពីផែនការសកម្មភាពយកសំណាក ពិសេសតាមវត្តអារាមក្នុងខណ្ឌនីមួយៗក្នុងរាជធានីភ្នំពេញ ក្រោយពីរកឃើញវត្តមួយចំនួនមានផ្ទុះករណីឆ្លងកូវីដ-១៩ ពិសេសការរកឃើញការឆ្លងរាលដាលកូវីដ-១៩ ពាក់ព័ន្ធព្រះសង្ឃ និងពុទ្ធបរិស័ទរាប់សិបនាក់នៅវត្តជំពុះក្អែក ដែលរកឃើញព្រះសង្ឃ និងឧបាសក ឧបាសិកាចំនួន ៤៥ អង្គ/នាក់ នៅវត្តចំពុះក្អែក រកឃើញវិជ្ជមានកូវីដ១៩ ខណៈអាជ្ញាធរតម្រូវឱ្យបិទវត្តទាំងស្រុងនៅថ្ងៃទី ២៣ ខែកញ្ញា ឆ្នាំ ២០២១ និងមានការសម្រេចផ្អាកពិធីបុណ្យកាន់បិណ្ឌ និងភ្ជុំបិណ្ឌទូទាំងប្រទេសផងដែរ៕
