ព្រះសង្ឃអាចារ្យ និងកូនសិស្សលោក តាមវត្តនៅភ្នំពេញត្រូវបាន ក្រុមគ្រូពេទ្យចុះយកសំណាក ក្រោយផ្ទុះកូវីដ១៩
ភ្នំពេញ៖ មន្ទីរសុខាភិបាល រាជធានីភ្នំពេញ សហការជាមួយ ក្រុមគ្រូពេទ្យស្ម័គ្រចិត្ត សម្តេចតេជោ នឹងចុះយកសំណាកព្រះសង្ឃ លោកតាអាចារ្យ និងកូនសិស្សលោក នៅតាមវត្តអារាមទាំងអស់ នៅក្នុងរាជធានីភ្នំពេញ បន្ទាប់ពីមានវត្តអារាម មួយចំនួន ផ្ទុះជំងឺកូវីដ-១៩ រួចមក។
លោកវេជ្ជបណ្ឌិត ងី មានហេង ប្រធានមន្ទីរសុខាភិបាល រាជធានីភ្នំពេញ មានប្រសាសន៍ ថ្ងៃទី២៤ ខែកញ្ញា ថា ក្រុមគ្រូពេទ្យរបស់ មន្ទីរសុខាភិបាល ប្រមាណ ១០០ នាក់ សហការជាមួយ ក្រុមគ្រូពេទ្យស្ម័គ្រចិត្ត សម្តេចតេជោ នឹងចុះយកសំណាកពីព្រះសង្ឃ និងកូនសិស្សលោក នៅតាមវត្តចំនួន ១៥១ វត្ត នៅក្នុងរាជធានីភ្នំពេញ រយៈពេល ២ ថ្ងៃ គឺចាប់ពីថ្ងៃទី២៤ និង ២៥ ខែកញ្ញា ឆ្នាំ២០២១។
លោកវេជ្ជបណ្ឌិត បន្តថា ក្នុងចំណោមវត្ត ១៥១ វត្តនោះ យើងបែងចែក ខាងមន្ទីរសុខាភិបាល ចំនួនជាង ៧០ វត្ត និងក្រុមគ្រូពេទ្យ ខាងសម្តេចតេជោ ជាង ៧០វត្ត ដោយសម្រុកធ្វើតេស្ត រយៈពេល ២ ថ្ងៃ ឲ្យរួចរាល់។ ក្នុងករណីរកឃើញព្រះសង្ឃ និងកូនសិស្សលោក មានឆ្លងជំងឺកូវីដ-១៩នោះ យើងនឹងដាក់ឲ្យព្យាបាល នៅតាមមួយអារាម តែម្តង ចំពោះវត្តណាដែលមាន លក្ខណៈសម្បត្តិគ្រប់គ្រាន់ តាមគោលការណ៍ណែនាំ របស់ក្រសួងសុខាភិបាល។ ប៉ុន្តែប្រសិនបើវត្តទាំងនោះ មិនមានអាចព្យាបាល បានទេ យើងនឹងបញ្ជួនទៅព្យាបាល នៅតាមមណ្ឌល ព្យាបាលផ្សេងៗ។ ចំពោះព្រះសង្ឃ កូនសិស្ស ឬអាចារ្យ ដែលពាក់ព័ន្ធនឹងឲ្យ ធ្វើចត្តាឡីស័ក នៅក្នុងវត្តតែម្តង។
រាជរដ្ឋាភិបាល បានណែនាំ ដល់គណៈអភិបាលរាជធានី-ខេត្ត ត្រូវធ្វើការសម្របសម្រួល ជាមួយយន្តការ ដែលមានការពាក់ព័ន្ធទាំងអស់ ដើម្បីធានាដល់ ការនាំយកចង្ហាន់ និងទេយ្យវត្ថុ ចាំបាច់នានា ប្រគេនដល់ព្រះសង្ឃ នៅតាមបណ្តាវត្ត អារាមនានា ដែលស្ថិតក្នុងសមត្ថកិច្ច ដែនដីរបស់ខ្លួន។ និងនៅតែរក្សាការឈប់សម្រាក រយៈពេល ៣ ថ្ងៃ សម្រាប់ពិធីបុណ្យភ្ជុំបិណ្ឌ ដែលត្រូវបានកំណត់ ដោយអនុក្រឹត្យលេខ ១៣១ អនក្រ.បក ចុះថ្ងៃទី២៦ ខែសីហា ឆ្នាំ២០២០ ស្តីពី ប្រតិទិនឈប់សម្រាកការងារ របស់មន្ត្រីរាជការ និយោជិត-កម្មករ ប្រចាំឆ្នាំ២០២១៕
