សភាអាមេរិកបរាជ័យអនុម័តច្បាប់ថវិកា ខណៈវិបត្តិមិនអាចសងបំណុលកាន់តែខិតជិត
ព្រឹទ្ធសភាអាមេរិក ដែលបែកខ្ញែកគ្នាយ៉ាងខ្លាំង កាលពីថ្ងៃចន្ទ ទី២៧ កញ្ញា បានបរាជ័យក្នុងការអនុម័តច្បាប់កញ្ចប់ថវិកា និងព្យួរដែនកំណត់ខ្ចីបំណុល ដើម្បីជៀសវៀងការបិទដំណើរការរដ្ឋាភិបាលអាមេរិក និងវិបត្តិមិនអាចទូទាត់សងបំណុលទាន់ពេលកំណត់ ខណៈពេលដែលរដ្ឋមន្ត្រីបានព្រមានថាថវិកាជាតិអាមេរិកនឹងរីងស្ងួតនៅខែកញ្ញានេះ។
សេចក្ដីព្រាងច្បាប់អនុម័តដោយសភាតំណាងគ្រោងផ្គត់ផ្គង់ថវិកាជូនរដ្ឋាភិបាលអាមេរិករហូតដល់ខែធ្នូ ហើយនឹងព្យួរដែនកំណត់ខ្ចីបំណុលរហូតដល់ខែធ្នូឆ្នាំក្រោយ បន្ទាប់ពីការបោះឆ្នោតជ្រើសរើសសមាជិកសភា។ ប៉ុន្តែសមាជិកគណបក្សសាធារណរដ្ឋក្នុងព្រឹទ្ធសភាបានប្ដេជ្ញាមិនគាំទ្រដំណោះស្រាយនេះរបស់គណបក្សប្រជាធិបតេយ្យ។
ក្នុងការសម័យប្រជុំព្រឹទ្ធសភាកាលពីថ្ងៃចន្ទ សេចក្ដីព្រាងច្បាប់នេះបានទទួលសំឡេងគាំទ្រចំនួន ៤៨ និងសំឡេងប្រឆាំងចំនួន ៥០ ដោយសមាជិកគណបក្សសាធារណរដ្ឋទាំងអស់បានបោះឆ្នោតប្រឆាំង។
ឥឡូវនេះសភាអាមេរិកមានពេលដល់ថ្ងៃសុក្រខាងមុខនេះ ដើម្បីចាត់វិធានការណាមួយដើម្បីជៀសវាងការបិទរដ្ឋាភិបាល និងការមិនអាចសងបំណុល។ ប្រសិនបើរដ្ឋាភិបាលអាមេរិកបរាជ័យក្នុងការបំពេញកាតព្វកិច្ចសងបំណុល អ្នកវិភាគជាច្រើនបានព្យាករណ៍ថាសេដ្ឋកិច្ចរបស់សហរដ្ឋអាមេរិក និងពិភពលោក នឹងរងផលប៉ះពាល់យ៉ាងខ្លាំង ហើយអាចឈានចូលវិបត្តិសេដ្ឋកិច្ចថ្មីមួយទៀតក្នុងកំឡុងពេលនៃវិបត្តិជំងឺកូវីដ-១៩។
