អាជ្ញាធរប៉ាគីស្ថាន ចាប់ខ្លួនមនុស្សជាង ៤០ នាក់ជុំវិញការចេញលិខិតបញ្ជាក់ការចាក់វ៉ាក់សាំងក្លែងក្លាយ
អាជ្ញាធរប៉ាគីស្ថានចាប់ខ្លួនមនុស្សជាង ៤០ នាក់ ជុំវិញការចេញលិខិតបញ្ជាក់ការចាក់វ៉ាក់សាំងក្លែងក្លាយ ខណៈរដ្ឋាភិបាលរបស់លោកនាយករដ្ឋមន្ត្រី អ៊ីមរ៉ាន ខាន់ (Imran Khan) កំពុងសម្លឹងមើលការបើកសេដ្ឋកិច្ចឡើងវិញប្រកបដោយសុវត្ថិភាព។
លោក Sanaullah Abbasi អគ្គនាយកនៃទីភ្នាក់ងារស៊ើបអង្កេតសហព័ន្ធប៉ាគីស្ថាន និយាយនៅក្នុងសេចក្ដីសង្ខេបមួយនៅទីក្រុងអ៊ីស្លាម៉ាបាដកាលពីថ្ងៃច័ន្ទ ថាការចាប់ខ្លួននេះធ្វើឡើងក្នុងរយៈពេលមួយខែកន្លះចុងក្រោយនេះ។ លោកនិយាយថា៖ «ទង្វើខុសច្បាប់ និងអសីលធម៌បែបនេះ មិនត្រឹមតែបង្កគ្រោះថ្នាក់ដល់អាយុជីវិតប្រជាជនប៉ុណ្ណោះទេ ថែមទាំងធ្វើឱ្យកិត្យានុភាពរបស់ប្រទេសប្រឈមនឹងហានិភ័យទូទាំងពិភពលោកផងដែរ»។
លោកនាយករដ្ឋមន្ត្រី ខាន់ កំពុងព្យាយាមបើកសេដ្ឋកិច្ចរបស់ប្រទេសឡើងវិញ ខណៈរលកទី ៤ នៃការឆ្លងរាលដាលជំងឺកូវីដ-១៩បន្តរាតត្បាត។ រដ្ឋាភិបាលចង់ចាក់វ៉ាក់សាំងឱ្យបានពេញលេញដល់មនុស្ស ៧០ លាននាក់នៅត្រឹមខែធ្នូ ពោលគឺកើនឡើងពីចំនួន ២៥ លាននាក់នាពេលបច្ចុប្បន្ន និង ដាក់សម្ពាធឱ្យពលរដ្ឋទទួលវ៉ាក់សាំងយ៉ាងតិចមួយដូសត្រឹមថ្ងៃទី ១៥ ខែកញ្ញា។
ខេត្ត Punjab ដែលមានប្រជាជនច្រើនបំផុតរបស់ប៉ាគីស្ថាន ព្រមានថាសេវាកម្មទូរស័ព្ទចល័តអាចត្រូវហាមឃាត់ចំពោះមនុស្សដែលមិនបានចាក់វ៉ាក់សាំង ខណៈដែលខេត្ត Sindh ថាខ្លួននឹងបញ្ឈប់ប្រាក់ខែមន្ត្រីរដ្ឋណាដែលមិនចាក់វ៉ាក់សាំងដើម្បីលើកទឹកចិត្តឱ្យប្រជាជនទទួលវ៉ាក់សាំង។
យោងតាមមជ្ឈមណ្ឌលបញ្ជានិងប្រតិបត្តិការជាតិរបស់រដ្ឋាភិបាលប៉ាគីស្ថាន មកទល់ពេលនេះ ប្រទេសដែលមានប្រជាជនជាង ២០០ លាននាក់នេះ ចែកចាយវ៉ាក់សាំងជាង ៧៦ លានដូស ហើយប្រជាជនជាង ២៥,៤ លាននាក់បានទទួលវ៉ាក់សាំងពេញលេញ។