អ្នកឃ្លាំមើលអូស្រ្តាលីអំពាវនាវឱ្យមានការរឹតត្បិត Google ដើម្បីប្រើទិន្នន័យផ្សាយពាណិជ្ជកម្មតាមគោលដៅ
អ្នកឃ្លាំមើល និងនិយតករអូស្រ្តាលី អំពាវនាវឱ្យមានការរឹតត្បឹតការប្រើប្រាស់ទិន្នន័យអ៊ិនធឺណិតរបស់ហ្គូហ្គោល (Google) ដើម្បីលក់ការផ្សាយពាណិជ្ជកម្មគោលដៅ ដោយនិយាយថាក្រុមហ៊ុននេះគ្រប់គ្រងទីផ្សាររហូតប៉ះពាល់ដល់អ្នកបោះពុម្ពផ្សាយ អ្នកផ្សាយពាណិជ្ជកម្ម និងអ្នកប្រើប្រាស់។
ការអំពាវនាវធ្វើឡើងក្នុងរបាយការណ៍ចេញផ្សាយកាលពីថ្ងៃអង្គារ ដោយភ្ជាប់អូស្រ្តាលីរួមជាមួយអឺរ៉ុប និងចក្រភពអង់គ្លេសដែលមាននិយតករចង់បញ្ឈប់ក្រុមហ៊ុន Google ចំពោះការធ្វើឱ្យប៉ះពាល់ដល់អ្នកផ្សាយពាណិជ្ជកម្មដោយប្រើទិន្នន័យខ្លួនប្រមូលបានពីការស្វែងរក (Searches) តាមអ៊ិនធឺណិតរបស់អ្នកប្រើប្រាស់រួមទាំងនៅលើផែនទី (Google Maps) និងយូធូប ដើម្បីធ្វើការផ្សព្វផ្សាយផលិតផល។
លោក Rod Sims ប្រធានគណៈកម្មការប្រកួតប្រជែង និងអ្នកប្រើប្រាស់អូស្រ្តាលី (ACCC) និយាយថា៖ «អ៊ឺរ៉ុប និងចក្រភពអង់គ្លេសកំពុងជជែកគ្នាអំពីគោលការណ៍ច្បាប់នៅពេលនេះ ហើយយើងនឹងត្រូវរៀបចំជាមួយពួកគេនៅឆ្នាំក្រោយ»។
ក្រុមហ៊ុន Google និយាយនៅឆ្នាំនេះថា ខ្លួនត្រៀមខ្លួនរួចជាស្រេចក្នុងការដកសេវាកម្មស្នូលពីអូស្រ្តាលីដោយសារច្បាប់មួយដែល ACCC ណែនាំ បង្ខំឱ្យបង់ប្រាក់ឱ្យក្រុមហ៊ុនប្រព័ន្ធផ្សព្វផ្សាយសម្រាប់មាតិកាដែលដំណើរម៉ាស៊ីនស្វែងរករបស់ខ្លួន។ តែទីបំផុត ក្រុមហ៊ុនក៏បានចុះកិច្ចព្រមព្រៀងជាមួយក្រុមហ៊ុនធំៗ ភាគច្រើន។
Google មិនទាន់ធ្វើការអត្ថាធិប្បាយយ៉ាងណាទេ អំពីសកម្មភាពផ្សាយពាណិជ្ជកម្មនេះ ប៉ុន្តែធ្លាប់សរសេរនៅលើប្លុករបស់ខ្លួនមុនពេល ACCC ចេញរបាយការណ៍ថា បច្ចេកវិទ្យាផ្សាយពាណិជ្ជកម្មរបស់ខ្លួនគាំទ្រការងារអូស្ត្រាលីជាង ១៥,០០០ និងរួមចំណែក ២,៤៥ ប៊ីលានដុល្លារអាមេរិកក្នុងមួយឆ្នាំដល់សេដ្ឋកិច្ចអូស្រ្តាលីជារៀងរាល់ឆ្នាំ។
លោក Sims និយាយថា លោករំពឹងថាការជំរុញជាសកលដើម្បីបង្កើនបទបញ្ជាអាជីវកម្មពាណិជ្ជកម្មរបស់ Google នឹងបង្កើនឱកាសនៃកិច្ចសហប្រតិបត្តិការរវាងក្រុមហ៊ុនអ៊ិនធឺណិតអាមេរិក និងនិយតករ។
លោកបន្ថែមថា៖ «យើងមិនចង់រារាំងការបង្កើតថ្មី យើងមិនចង់ឱ្យមានផលប៉ះពាល់អវិជ្ជមានទេ យើងគ្រាន់តែចង់លើកកម្ពស់ការប្រកួតប្រជែង កាត់បន្ថយឧបសគ្គ ដើម្បីឱ្យអ្នកប្រើប្រាស់ទទួលបានអ៊ិនធឺណិតប្រសើរជាងមុន តម្លាភាពល្អហើយក្រុមហ៊ុននានាក៏មិនត្រូវបង់ប្រាក់ច្រើនហួស»។
