ការសម្រេចចិត្តដ៏ភ្ញាក់ផ្អើល នាយករដ្ឋមន្ត្រីជប៉ុនថ្មីគ្រោងរៀបចំការបោះឆ្នោតនៅ ថ្ងៃ៣១តុលា
កាលពីថ្ងៃចន្ទ ទី៤ តុលា លោកហ្វូមីអូ គីស៊ីដាត្រូវបានតែងតាំងជានាយករដ្ឋមន្ត្រីជប៉ុន គឺកំពុងគ្រោងរំលាយអាណត្តិសភាបច្ចុប្បន្ននៅសប្ដាហ៍ក្រោយ ហើយរៀបការបោះឆ្នោតនៅថ្ងៃទី ៣១ តុលា នេះបើតាមរាយការណ៍របស់សារព័ត៌មានរដ្ឋជប៉ុន NHK។
ការសម្រេចចិត្តដ៏ភ្ញាក់ផ្អើលនេះ កើតឡើងចំពេលគេរំពឹងថាការបោះឆ្នោតនឹងកើតឡើងនៅចុងខែវិច្ឆិកា ត្រូវបានគេមើលឃើញថាជាការព្យាយាមទាញយកផលប្រយោជន៍ពីការកើនឡើងការគាំទ្រដែលតែងតែអមនឹងការតែងតាំងនាយករដ្ឋមន្ត្រីថ្មី។
អតីតនាយករដ្ឋមន្ត្រីលោកយ៉ូស៊ីហ៊ីដេ ស៊ូហ្គាបានទទួលការគាំទ្រជាង ៧០ ភាគរយភ្លាមៗបន្ទាប់ចូលកាន់តំណែងកាលពីឆ្នាំមុន ប៉ុន្តែអត្រាការគាំទ្រនេះបានធ្លាក់ចុះយ៉ាងខ្លាំងដោយសារការរិះគន់អំពីការគ្រប់គ្រងការរីករាលដាលជំងឺកូវីដ-១៩ ដែលធ្វើឱ្យលោកលាលែងតំណែង ធ្វើឱ្យមានការប្រកួតប្រជែងតំណែងមេដឹកនាំក្នុងគណបក្សប្រជាធិបតេយ្យសេរី (LDP)។
NHK បានរាយការណ៍ថាក្នុងសន្និសីទកាសែតដំបូងក្នុងនាមជានាយករដ្ឋមន្ត្រី លោកគីស៊ីដាបានគ្រោងប្រកាសរំសាយអាណត្តសភានៅថ្ងៃទី ១៤ តុលា
លោកគីស៊ីដា ដែលជាអតីតរដ្ឋមន្ត្រីការបរទេសជប៉ុន កាលពីសប្ដាហ៍បានយកឈ្នះលើគូប្រជែងបីរូបក្នុងការបោះឆ្នោតតំណែងមេដឹកនាំក្នុងគណបក្សប្រជាធិបតេយ្យសេរី (LDP)។ លោក គីស៊ីដា ត្រូវបានគេរំពឹងថានឹងប្រកាសសមាសធាតុគណៈរដ្ឋមន្ត្រីថ្មីនៅពេលឆាប់ៗនេះ ដោយភាគច្រើនគឺជាសម្ព័ន្ធមិត្តរបស់អតីតនាយករដ្ឋមន្ត្រីលោកស៊ីនហ្សូ អាបេ ធ្វើឱ្យអ្នកវិភាគមួយចំនួនគិតថាលោកនឹងមានការលំអៀងទៅរកក្រុមស្ដាំនិយម ដែលគាំទ្រការពង្រឹងសមត្ថភាពយោធារបស់ជប៉ុន និងមាននិន្នាការអភិរក្សនិយម៕
ប្រភព៖ Reuters
