កូរ៉េខាងជើងព្រមានស្ថាប័នកំពូលអង្គការសហប្រជាជាតិបន្ទាប់ពីកិច្ចប្រជុំបន្ទាន់
សេអ៊ូល៖ ប្រទេសកូរ៉េខាងជើងព្រមានក្រុមប្រឹក្សាសន្តិសុខអង្គការសហប្រជាជាតិ ប្រឆាំងនឹងការរិះគន់លើកម្មវិធីមីស៊ីលរបស់ខ្លួន នៅក្នុងសេចក្តីថ្លែងការណ៍មួយកាលពីថ្ងៃអាទិត្យ ដែលរួមបញ្ចូលការគំរាមកំហែងមិនជាក់លាក់ប្រឆាំងនឹងស្ថាប័នអន្តរជាតិមួយនេះ។
ក្នុងអំឡុងកិច្ចប្រជុំបិទទ្វារជាបន្ទាន់នៃស្ថាប័នកំពូលរបស់អ.ស.ប.កាលពីថ្ងៃសុក្រ ប្រទេសបារាំងបានផ្សព្វផ្សាយសេចក្តីថ្លែងការណ៍មួយដែលបង្ហាញពីការព្រួយបារម្ភចំពោះការបាញ់មីស៊ីលរបស់កូរ៉េខាងជើង និងអំពាវនាវឱ្យក្រុងព្យុងយ៉ាងអនុវត្តយ៉ាងពេញលេញនូវដំណោះស្រាយរបស់ក្រុមប្រឹក្សា ដែលហាមឃាត់ការបាញ់មីស៊ីលផ្លោងរបស់ខ្លួន។
កាលពីថ្ងៃអាទិត្យ លោក Jo Chol Su មន្រ្តីជាន់ខ្ពស់ក្រសួងការបរទេសកូរ៉េខាងជើងព្រមានក្រុមប្រឹក្សាអ.ស.ប.ថា គួរតែគិតឱ្យបានច្បាស់ថាតើវានឹងនាំមកនូវផលអាក្រក់អ្វីខ្លះនៅពេលអនាគតក្នុងករណី ដែលស្ថាប័ននេះព្យាយាមរំលោភអធិបតេយ្យភាពរបស់កូរ៉េខាងជើង។ លោក Jo ក៏ចោទប្រកាន់ស្ថាប័នអ.ស.ប.ថាមានស្តង់ដារដោះស្រាយពីរ មិនស្មើគ្នាជាមួយការធ្វើតេស្តអាវុធស្រដៀងគ្នាដោយសហរដ្ឋអាមេរិក និងសម្ព័ន្ធមិត្តផ្សេងទៀត។
បន្ទាប់ពីផ្អាកអស់រយៈពេល ៦ ខែ កូរ៉េខាងជើងបន្តការសាកល្បងមីស៊ីលកាលខែកញ្ញាដោយបាញ់មីស៊ីលដែលទើបធ្វើរួច រួមមានទាំងអាវុធនុយក្លេអ៊ែរផង។ ប្រទេសនេះនៅតែផ្តល់ការពិភាក្សាដោយមានលក្ខខណ្ឌជាមួយកូរ៉េខាងត្បូងក្នុងអ្វីដែលអ្នកជំនាញខ្លះហៅថា ការប៉ុនប៉ងដាក់សម្ពាធទីក្រុងសេអ៊ូលដើម្បីបញ្ចុះបញ្ចូលទីក្រុងវ៉ាស៊ីនតោនឱ្យបន្ធូរបន្ថយទណ្ឌកម្មសេដ្ឋកិច្ច។
យោងតាមសេចក្តីសម្រេចជាច្រើនរបស់ក្រុមប្រឹក្សាសន្តិសុខអ.ស.ប. កូរ៉េខាងជើងត្រូវបានហាមឃាត់មិនឱ្យធ្វើសកម្មភាពមីស៊ីលផ្លោងណាមួយឡើយ ព្រោះប្រទេសនេះមានបំណងបំពាក់អាវុធនុយក្លេអ៊ែរលើមីស៊ីលប្រភេទនេះ។ កូរ៉េខាងជើងអះអាងថា កម្មវិធីនុយក្លេអ៊ែររបស់ខ្លួនមានបំណងទប់ទល់នឹងការគំរាមកំហែងផ្នែកយោធារបស់សហរដ្ឋអាមេរិក ទោះបីជាទីក្រុងវ៉ាស៊ីនតោននិយាយថាខ្លួនគ្មានចេតនាអរិភាពចំពោះទីក្រុងព្យុងយ៉ាងក៏ដោយ។
ប្រភព៖ ABC News