ទឹកធ្លាក់ស្ទឹងពង្រូលជាទីកម្សាន្តដ៏មនោរម្យសម្រាប់អ្នកទេសចរងូតទឹកលេងនិងទស្សនាព្រៃភ្នំ
កោះកុង៖ តំបន់ទឹកធ្លាក់ស្ទឹងពង្រូលស្ថិតនៅភូមិសាស្ត្រសហគមន៍ភ្នំទ័ពជាងនៃឧទ្យាជាតិជួរភ្នំក្រវាញខាងត្បូងគឺជាប្រភពសម្បូណ៍ទៅដោយធនធានធម្មជាតិ សត្វព្រៃនិងទឹកធ្លាក់ជាទីកម្សាន្តដ៏មនោរម្យ។
តាមពិតទឹកធ្លាក់ស្ទឹងពង្រូលស្ថិតក្នុងឃុំដងពែង ស្រុកស្រែអំបិល ខេត្តកោះកុង។ទីកន្លែងនេះគឺជាទីទឹកធ្លាក់ក្នុងព្រៃមួយកន្លែងដែលមានសម្រស់ទេសភាពដ៏ស្រស់ត្រកាលគួរជាទីក្តីស្រម៉ៃរបស់របស់អ្នកទេសចរគ្រប់រូប។
កាលបើអ្នកទេសចរមានបំណងចង់ទៅដើរកម្សាន្តនៅទឹកធ្លាក់ស្ទឹងពង្រូលនោះគឺគេអាចធ្វើដំណើរតាមផ្លូវចំនួន៣ខ្សែក្នុងនេះគឺទី១ផ្លូវចូលតាមស្រុក ស្រែអំបិល និងចំណែក២ខ្សែទៀតគឺគេអាចចូលតាមស្រុកកំពង់សិលាមានចម្ងាយជិត ៣០គីឡូម៉ែត្រពីផ្លូវជាតិលេខ ៤។
បច្ចុប្បន្នបើទោះបីកំណាត់ផ្លូវ មួយចំនួន មិនទាន់បានស្ថាបនាជាផ្លូវក្រាលចាក់កៅស៊ូ ឬ ផ្លូវ បេតុង ក្តីក៏គេឃើញមានភ្ញៀវទេសចរក្នុងស្រុកមួយចំនួនបានចូលដើរកម្សាន្តយ៉ាងសប្បាយរីករាយផងដែរ។
ទឹកធ្លាក់ស្ទឹងពង្រូលមាន២តំណាក់គឺទឹកធ្លាក់ផ្នែកខាងលើ និងផ្នែកខាងក្រោម។ទឹកធ្លាក់នៅផ្នែកខាងលើគេចាំបាច់ត្រូវធ្វើដំណើរឡើងលើកំពូលភ្នំដែលមានប្រវែងប្រមាណ១គីឡូម៉ែត្រ។បើអ្នកទេសចរមិនចង់ឡើងទៅងូតទឹកធ្លាក់ផ្នែកខាលើដោយសារផ្លូវពិបាកឡើងទេ គេអាចចូលកម្សាន្ត និង ងូតទឹកផ្នែកខាងក្រោមបាន។នៅផ្នែកខាងក្រោមនេះមានតូបដាក់តាមមាត់ទឹកស្ទឹងសម្រាប់អង្គុយកម្សាន្ត ចុះងូតទឹកធ្លាក់លេងនិងមានចំណីចំណុកអ្នកស្រុកលក់ទៀតផង។
លោក ឆាយ ធារ៉ា អនុប្រធានសមាគមន៍តំបន់ការពារធម្មជាតិភ្នំទ័ពជាង ដែលជាតំបន់គ្រប់តណ្តប់ទឹកធ្លាក់ស្ទឹងពង្រូលនេះបានឱ្យដឹងថា ការដែលទីកន្លែងនេះត្រូវបានគេដាក់ឈ្មោះថាជាស្ទឹងពង្រូលដោយសារពីដើមឡើយសម្បូណ៍ទៅដោយសត្វពង្រូល ទើបចាស់ៗសម័យមុនបានដាក់ឈ្មោះជាទឹកធ្លាក់ស្ទឹងពង្រូលមកដល់សព្វថ្ងៃ។បើទោះបីរហូតមកដល់បច្ចុប្បន្នសត្វពង្រូលនៅតែមានវត្តមានច្រើននៅទីកន្លែងនេះនៅឡើយដែរ។សត្វទាំងនេះវាចូលចិត្តរស់នៅតាមមាត់ស្ទឹងដែលសម្បូណ៍ទៅដោយចំណីអាហារ និងកន្លែងលាក់បំពួនខ្លួនបានយ៉ាងងាយស្រួល។
បើតាមលោកឆាយ ធារ៉ាបានឱ្យដឹងបន្ថែមថា នៅតាមដងស្ទឹងពង្រូលអ្នកទេសចរគេអាចមកបោះតង់សម្រាកពេលយប់ ដើម្បីស្តាប់សត្វយំ មើលពពកលើភ្នំ និងទទួលនូវខ្យល់បរិសុទ្ធប្រកបដោយភាពសប្បាយរីករាយយ៉ាងជាប់ចិត្តពីទីកន្លែងនៃសម្រស់ធម្មជាតិគ្មានពីរមួយកន្លែងនេះ។
ដោយឡែកលោក វង្សសាមឿន ប្រធានអភិរក្សសមាគមន៍ការពារ ធនធានធម្មជាតិនៅភូមិព្រះអង្គកែវ ឃុំដកពែក ស្រុកស្រែអំបិល ខេត្តកោះកុងបានឱ្យដឹងថា នៅតំបន់ទឹកស្ទឹងពង្រូល និង ពិសេសភ្នំជាង សម្បូណ៍ទៅដោយសត្វចម្រុះជាច្រើន។ក្នុងនេះលោកធ្លាប់ជួប សត្វទន្សោង ខ្ទីង ដំរី ឈ្លូស ជ្រូកព្រៃ សត្វស្វា និងសត្វប្រភេទតូចៗជាច្រើនកំពុងរស់នៅទីកន្លែងនេះយ៉ាងសុខដុម។ទាំងនេះដោយសារតែការចូលរួមអភិរក្សពីសំណាក់ មន្ត្រីឧទ្យានុរក្ស អាជ្ញាធរមូលដ្ឋាន អង្គការដៃគូ និងពិសេសប្រជាសហគមន៍បានចូលរួមសហការយ៉ាងជិតដិតដើម្បីកិច្ចការពារ និងអភិរក្សព្រៃឈើនិងសត្វព្រៃទីកន្លែងនេះតែម្តង។
លោក វង្សសាមឿនដែលកាលពីមុនធ្លាប់តែចូលព្រៃកាប់ឈើ និងបរបាញ់សត្វបានប្រាប់ឱ្យដឹងបន្ថែមថា អ្នកស្រុកទីកន្លែងនេះបច្ចុប្បន្នបានយល់ដឹងកាន់តែច្រើនពីការអភិរក្សធនធនធម្មជាតិ ដូចជារូបលោកធ្លាប់តែដាក់អន្ទាក់ចាប់សត្វព្រៃ និងកាប់ព្រៃឈើនោះ ពេលនេះបានងាកមកចូលរួមការពាររបស់ទាំងនេះយ៉ាងសកម្មវិញ។
លោកថា បើប្រៀបធៀបកាលពីមុន និងពេលបច្ចុប្បន្ន ពលរដ្ឋតំបន់នេះស្ទើរទាំងអស់បានយល់ជ្រួតជ្រាបពីតម្លៃធនធានធម្មជាតិ ហើយពួកគាត់បាននាំគ្នាងាកមកការពាររបស់មានតម្លៃពុំអាចកាត់ថ្លៃបាននេះវិញហើយ។
បុរសវ័យជាង៥០ឆ្នាំរូបនេះបានលើកឡើងដែរថា”បច្ចុប្បន្នអ្នកស្រុកទីនេះបានទទួលផលកម្រៃពីវិស័យទេសចរណ៍ដោយក្នុងនេះមានការលក់ដូរនិងជូនភ្ញៀវទេសចរដោយអាចរកផលកម្រៃគ្រាន់ដោះស្រាយជីវភាព”។
បុរសរូបនេះបានលើកឡើងដែរថា “បើប្រៀបធៀបគឺការរកផលកម្រៃពីវិស័យទេសចរណ៍យើងមានលំនឹងល្អដោយយើងអាចរកចំណូលពីវិស័យនេះមិនចេះរីងស្ងួត ហើយជាមុខរបរស្របច្បាប់ទៀត ផ្ទុយទៅវិញការចូលព្រៃកាប់ឈើ ចាប់សត្វព្រៃមិនត្រឹមខុសច្បាប់ទេនៅបំផ្លិតបំផ្លាញទ្រព្យសម្បត្តិធនធានធម្មជាតិដ៏មហាសាលមិនអាចកាត់ថ្លៃបានរបស់ប្រទេសជាតិយើងផង”។
យុវជន សុខ បញ្ញា ដែលជាអ្នកទេសចរនៅរាជធានីភ្នំពេញមួយរូបដែលបាននាំគ្នាំទៅបោះតង់សម្រាកពេលយប់នៅកន្លែងទឹកជ្រោះស្ទឹងពង្រូលផ្នែកខាងលើបានឆ្លៀតប្រាប់ AMSថា ក្រុមខ្លួនជាញឹកញាប់តែងនាំគ្នាមកសម្រាកបោះតុងលើកំពូលភ្នំកន្លែងនេះពីព្រោះថានៅទីនេះមិនត្រឹមតែមានទឹកជ្រោះយ៉ាងល្អឯកសម្រាប់ងូតកម្សាន្តទេ គេនៅអាចមកដេកស្តាប់សត្វយំពេលយប់ ពេលព្រលប់និងពេលព្រឹកផង។ក្រៅពីនេះគេនៅអាចស្រូបយកខ្យល់អាកាសបរិសុទ្ធ និងគយគន់ពពកពីលើកំពូលភ្នំយ៉ាងសប្បាយរីករាយក្រែលែង។
ដោយឡែកយុវតី ចាន់នីតា ដែលបាននាំគ្នាជាក្រុមមកកម្សាន្តនៅកន្លែងទឹកធ្លាក់ស្ទឹងពង្រូល ផ្នែកខាងក្រោមបានឱ្យដឹងដូចគ្នាថារូបកញ្ញាមិនធ្លាប់មកទីនេះទេ។ពេលមកដល់គឺទេសភាពទីកន្លែងនេះស្រស់ស្អាតពុំអាចកាត់ថ្លៃបានសោះឡើយ។កញ្ញាពិតជាជាប់ចិត្តពីសម្រស់ធម្មជាតិក្នុងទឹកដីមួយកន្លែងនេះពិសេសបានងូតទឹកដ៏ថ្លានិងត្រជាក់ស្រេងនៃទឹកធ្លាក់ពីកំពូលភ្នំពិតជាមិនចង់ងើបវិលត្រឡប់ទៅផ្ទះវិញ។
គួរបញ្ជាក់ថានៅត្រង់ទឹកធ្លាក់ពង្រូលអ្វីជាទីចាប់អារម្មណ៍របស់ក្រុមអ្នកទេសចរនោះគឺផ្ទាំងថ្មធំៗដែលផ្ទាំងខ្លះមានទំហំរហូតដល់១០ម៉ែត្រ មានស្នាមប្រេះរហែកតាមកាលវេលាច្រើនឆ្នាំមកហើយ ដែលធ្វើឱ្យទឹកហូរជ្រែកប្រដេញគ្នាធ្លាក់ពីលើ ចុះមកក្រោមបង្កឱ្យបែកផ្សែងទឹកសំពោងនិងមានស្នូរសម្លេងគួរជាទីសប្បាយរីករាយ។ទឹកនៅទីកន្លែងនេះមានសភាពត្រជាក់ស្រេប និងថ្លាដូចកញ្ចក់ បើបានចុះងូតហើយមិនចង់ងើបចេញវិញសោះឡើយ។
ភាពស្រស់ស្អាតនៃធម្មជាតិទឹកធ្លាក់កន្លែងនេះបង្កើតនូវទស្សនីយភាពអស្ចារ្យផ្នែកធម្មជាតិនិងមានសភាពរស់រវើកគួរជាទីកន្លែងសម្រាប់សម្រាកលំហែកាយដែលគ្មានគូរប្រៀប ។ក្រៅពីនេះនៅតំបន់ជុំវិញទឹកធ្លាក់ក៏អមទៅដោយដើមរុក្ខជាតិតូចធំដុះប្រជ្រៀតគ្នាធ្វើឱ្យយើងគយគន់មើលហើយស្ទើរអត់សរសើរពីសម្រប់ធម្មជាតិបង្កើតមកយ៉ាងអស្ចារ្យនៅតំបន់មួយកន្លែងនេះពុំបាន។
ស្ទើរគ្រប់រដូវកាលគឺទឹកធ្លាក់ស្ទឹងពង្រូលខេត្តកោះកុង បានផ្តល់អំណោយផលយ៉ាងល្អណាស់ដល់ក្រុមអ្នកទេសចរ។បច្ចុប្បន្ននេះទាំងបរិស្ថាន និងការរក្សាបាននូវធនធានធម្មជាតិបានធ្វើឱ្យពីមួយថ្ងៃទៅមួយថ្ងៃ ទីកន្លែងនេះក្លាយជាតំបន់ដែលអ្នកទេសចរកើតក្តីស្រម៉ៃចង់ទៅកម្សាន្តបន្តបន្ទាប់។
សម្រស់ដ៏ស្អាតផូរផង់នៃស្ទឹងពង្រូលបានកើតឡើងពីធម្មជាតិអស់កាលយូរយាឆ្នាំមកហើយ ហើយវាក៏ជាតំបន់ព្រៃមួយផ្នែកនៃតំបន់អារ៉ែងផងដែរ។
ទឹកធ្លាក់ស្ទឹងពង្រូលបច្ចុប្បន្នស្ថិតនៅក្នុងតំបន់អភិរក្សរបស់សហគមន៍នៃឧទ្យានជាតិជួរភ្នំក្រវាញខាងត្បូងដែលត្រូវបានបង្កើតឡើងក្នុងគោលបំណងសំខាន់ក្នុងការអភិរក្ស ព្រៃឈើ សត្វព្រៃ និងសម្បត្តិធម្មជាតិតាំងតែពីបុរាណកាលរបស់ដូនតាឱ្យស្ថិតនៅគង់វង្សយូរអង្វែងដល់កូនចៅជំនាន់ក្រោយបន្តទៅទៀត។
សូមរំលឹកដែរថា គម្រោងនិរន្តរភាពទេសភាព និងទេសចរណ៍ធម្មជាតិកម្ពុជា នៃក្រសួងបរិស្ថាន បានរៀបចំដំណើរទស្សនកិច្ចនៅតំបន់ខេត្តកោះកុងកាលពីថ្មីៗមកនេះដើម្បីសិក្សាស្រាវជ្រាវទៅលើគ្រំចំពុះទា តំបន់ទេសចរណ៍ក្នុងខេត្តកោះកុងសំដៅធ្វើយ៉ាងណាឱ្យគ្រំចំពុះទាកាន់តែមានទីផ្សារក្នុងស្រុកនិងតំបន់ទេសចរណ៍ពិសេសស្ទឹងពង្រូលនេះទទួលបានការចាប់អារម្មណ៍ពីសំណាក់អ្នកទេសចរទាំងក្នុងស្រុកនិងក្រៅប្រទេសកាន់តែប្រសើរឡើង៕
ដោយ៖ម៉ាដេប៉ូ