មេដឹកនាំគណបក្សធម្មាធិបតេយ្យដែលមានសញ្ជាតិពីរ គាំទ្រសម្តេចតេជោ ហ៊ុន សែន
ភ្នំពេញៈលោកស្រី ពោធិតី សាវត្ថី ប្រធានគណបក្សធម្មាធិបតេយ្យ ដែលមានសញ្ជាតិខ្មែរ និងហូឡង់បានប្រកាស គាំទ្រគំនិតផ្តួចផ្តើមរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាឱ្យរដ្ឋមន្ត្រីក្រសួងយុត្តិធម៌សិក្សាអំពីការរៀបចំធ្វើវិសោធនកម្មរដ្ឋធម្មនុញ្ញ និងច្បាប់ពាក់ព័ន្ធ ដើម្បីកំណត់ឱ្យនាយករដ្ឋមន្ត្រី, ប្រធានរដ្ឋសភា, ប្រធានព្រឹទ្ធសភា និងប្រធានក្រុមប្រឹក្សាធម្មនុញ្ញ មានសញ្ជាតិខ្មែរតែមួយ។
លោកស្រីបានមានប្រសាសាន៍ថា លោកស្រីសូមគ្រាំទ្រសម្តេចតេជោ ហ៊ុន សែន ធ្វើវិសោធនកម្មច្បាប់នេះគឺល្អ ប៉ុន្តែនៅខ្វះមួយជ្រុង ខ្វះត្រង់ថា មិនអាចដាក់តែសញ្ជាតិទេ ត្រូវដាក់ជនជាតិខ្មែរ ឬក៏ខ្មែរពីកំណើត ឬក៏ដាក់ ជនជាតិខ្មែរ សញ្ជាតិខ្មែរតែមួយ បានវាសុក្រឹត្យ បានវាក្លាយទៅជារឿងជាតិមួយទាំងមូល។ កាលណាបើច្បាប់សរសេរលុបតែ សញ្ជាតិ វាចូលរឿងបុគ្គលវិញ។
លោកស្រីបានបញ្ជាក់ថា “ខ្ញុំក៏សញ្ជាតិពីរដែរ។ កុំគិតថា សម្តេចនាយករដ្ឋមន្ត្រីធ្វើដើម្បីកម្ចាត់សម រង្ស៊ី ពីព្រោះសមរង្ស៊ី រាល់ថ្ងៃនៅក្រៅច្បាប់ហើយ។ សំខាន់គឺខ្ញុំប្រធានគណបក្សធម្មាធិបតី នៅក្នុងច្បាប់។ ដូច្នេះគាត់កម្ចាត់ខ្ញុំដែរហើយ។ ប៉ុន្តែខ្ញុំអត់មានខ្លាចទេ។ ហេតុអីខ្ញុំគាំទ្រដោយសារអី?ដោយសារឆន្ទៈមនុស្សយើងធ្វើមេបក្សមួយៗគឺគេមានការគិតខុសគ្នា និងឆន្ទៈខុសគ្នា។ សម្រាប់ខ្ញុំបើប្រជារាស្ត្របោះឆ្នោតឱ្យខ្ញុំខ្ញុំអត់ភ័យខ្លាចទេខ្ញុំគាំទ្រដោយសារអីដើម្បីផលប្រយោជន៍ជាតិ។ ដើម្បីបុព្វហេតុជាតិទៅអនាគតរបស់យើង។ យើងត្រូវតែបង្កើតច្បាប់នឹងហើយសម្តេចតេជោផ្តួចផ្តើមនេះ គឺត្រូវចិត្តជាមួយគណបក្សធម្មាធិបតេយ្យ យើងសូមគាំទ្រទាំងស្រុង។ ប៉ុន្តែស្នើសុំក្រសួងយុត្តិធម៌ថែមពាក្យថា ជនជាតិខ្មែរ សញ្ជាតិខ្មែរតែមួយ ថែមតែប៉ុណ្ណឹងទេ វាទៅជារឿងសម្រាប់ការពារប្រទេសជាតិមួយទាំងមូលវាមិនមែនជា រឿងបុគ្គល។ថ្វីត្បិតតែខ្ញុំសញ្ជាតិពីរមែនតែខ្ញុំគាំទ្រពីព្រោះខ្ញុំអាចលាសញ្ជាតិមួយទៀតបាន (សញ្ជាតិហូឡង់)ពីព្រោះសញ្ជាតិកម្ពុជា គឺជាសញ្ជាតិកំណើតរបស់ខ្ញុំ បើសិនជារាស្ត្របោះឆ្នោតគាំទ្រខ្ញុំធ្វើជានាយករដ្ឋមន្ត្រីខ្ញុំជិះយន្តហោះទៅ លាសញ្ជាតិហូឡង់ភ្លាម ជាឆន្ទៈរបស់យើង យើងត្រូវតែធ្វើយ៉ាងម៉េចឲ្យមានច្បាប់នឹងហើយចំណេញជាតិយើងទៅ អនាគត ដូច្នេះសម្តេចតេជោសែនគាត់ធ្វើត្រូវ”។
គួររំលឹកថាកិច្ចប្រជុំពេញអង្គគណៈរដ្ឋមន្ត្រីកាលពីព្រឹកថ្ងៃទី៨ខែតុលាឆ្នាំ២០២១ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានសម្រេចអនុម័តនិងកែសម្រួល ពាក្យពេចន៍មួយចំនួន លើ “សេចក្តីព្រាងច្បាប់ធម្មនុញ្ញស្តីពី វិសោធនកម្មមាត្រា១៩ថ្មី មាត្រា៨២ មាត្រា១០៦ ថ្មី(មួយ) មាត្រា១១៩ ថ្មី និងមាត្រា១៣៧ ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និង មាត្រា៣និង មាត្រា៤ នៃច្បាប់ធម្មនុញ្ញបន្ថែម សំដៅ ធានានូវដំណើរការជាប្រក្រតីនៃស្ថាប័នជាតិ”។
ឯកឧត្តម ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាអ្នកនាំពាក្យរាជរដ្ឋាភិបាល បានឱ្យដឹងថា កិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានសម្រេចអនុម័ត និងកែសម្រួលពាក្យពេចន៍មួយចំនួន លើ «សេចក្តីព្រាងច្បាប់ធម្មនុញ្ញស្តីពី វិសោធនកម្មមាត្រា១៩ថ្មី មាត្រា៨២ មាត្រា១០៦ ថ្មី(មួយ) មាត្រា១១៩ ថ្មី និងមាត្រា១៣៧ ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និង មាត្រា៣និង មាត្រា៤ នៃច្បាប់ធម្មនុញ្ញបន្ថែម សំដៅ ធានានូវដំណើរការជាប្រក្រតីនៃស្ថាប័នជាតិ»៕
ដោយៈពលជ័យ
