ក្រសួងការបរទេសស.រ.អ៖ «មានវឌ្ឍនភាពលើផ្នែកមួយចំនួន» បន្ទាប់ពីជួបក្រុមតាលីបង់
នៅថ្ងៃអង្គារសប្ដាហហ៌នេះ អ្នកនាំពាក្យក្រសួងការបរទេសអាមេរិកលោកណេដ ប្រៃស៍បាននិយាយថា «មានវឌ្ឍនភាពលើផ្នែកមួយចំនួន» បន្ទាប់ពីជំនួបប៉ុន្មានថ្ងៃចុងក្រោយនេះរវាងគណៈប្រតិភូអាមេរិក និងក្រុមតាលីបង់ នៅទីក្រុងដូហា ប្រទេសកាតា។
«មានការពិភាក្សាប្រកបដោយផលិតភាពលើបញ្ហាជំនួយមនុស្សធម៌» លោកប្រៃសបាននិយាយបែបនេះក្នុងសន្និសីទកាសែតប្រចាំថ្ងៃ ហើយបានកត់សម្គាល់ថា «យ៉ាងណាស់មានកម្រិតមូលមតិគ្នា» អំពីបំណងចង់បានជំនួយ។
ក្រៅពីបញ្ហាជំនួយមនុស្សធម៌ លោកប្រៃសបាននិយាយថាភាគីទាំងពីរបានពិភាក្សាអំពីការប្រយុទ្ធប្រឆាំងនឹងក្រុមភេរវកម្មដូចជាក្រុម ISIS-K ការអនុញ្ញាតឱ្យពលរដ្ឋអាមេរិក ជនបរទេស ធ្វើដំណើរដោយសុវត្ថិភាព និងបញ្ហាសិទ្ធមនុស្ស។
កាលពីចុងសប្ដាហ៍មុន គណៈប្រតិភូជាន់ខ្ពស់អាមេរិក ដែលរួមមានអនុតំណាងពិសេសសម្រាប់ការផ្សះផ្សាអាហ្វហ្គានីស្ថានលោកថម វេសន៍ អគ្គនាយករងភ្នាក់ងារចារកម្ម CIA លោកដេវីឌ កូហេន និងមន្ត្រីជាន់ខ្ពស់នៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) លោកស្រីសារ៉ា ឆាល បានធ្វើដំណើរទៅទីក្រុងដូហាសម្រាប់ជំនួបដំបូងជាមួយក្រុមតាលីបង់ ចាប់តាំងពីអាមេរិកដកទ័ពចេញពីអាហ្វហ្គានីស្ថានកាលពីខែសីហា។
រដ្ឋបាលរបស់ប្រធានាធិបតីអាមេរិកលោកចូ បៃដិន បាននិយាយថាពួកគេចង់ផ្ដល់ជំនួយដោយផ្ទាល់ទៅកាន់ប្រជាជនអាហ្វហ្គានីស្ថាន ខណៈពេលដែលមានការព្រួយបារម្ភយ៉ាងខ្លាំងអំពីវិបត្តិមនុស្សធម៌ដ៏ធំ។ ក្នុងកិច្ចប្រជុំក្រុមប្រទេស G20 កាលពីថ្ងៃអង្គារ មេដឹកនាំពិភពលោកបាននិយាយថាប្រទេសអាហ្វហ្គានីស្ថានត្រូវការវិធានការបន្ទាន់ដើម្បីបញ្ចៀសការដួលរលំ។ សហភាពអឺរ៉ុបបានយល់ព្រមផ្ដល់ជំនួយមនុស្សធម៌ប្រមាណ ៨០០ លានដុល្លារបន្ថែមទៀតទៅអាហ្វហ្គានីស្ថាន៕
