ខណៈពេលក្រុងប៉េកាំងឆ្ពោះនឹងកំណែទម្រង់ សេដ្ឋកិច្ចចិនក៏អាចប្រឈមនឹងភាពរង្គោះរង្គើ
ប្រធានាធិបតីចិនលោកស៊ី ជីនពីងគឺកំពុងធ្វើដំណើរឆ្លងកាត់ព្យុះភ្លៀងសេដ្ឋកិច្ចដ៏ធំមួយ ខណៈពេលដែលក្រុមហ៊ុនអចលនទ្រព្យធំបំផុតក្នុងប្រទេសកំពុងប្រឈមមុខនឹងវិបត្តិបំណុល និងអាចឈានដល់ក្ស័យធន ហើយរោងចក្រធំៗកំពុងជួបឧបសគ្គជាច្រើនខណៈងើបពីវិបត្តិជំងឺកូវីដ-១៩ ដោយមានទាំងកង្វះអគ្គិសនីទូទាំងប្រទេសផងដែរ។
ក្រៅពីការខិតខំតម្រូវដំណើរតូចតាចខ្លះ អ្នកវិភាគនិងទីប្រឹក្សារដ្ឋាភិបាលមួយចំនួនបានគិតថាលោកស៊ីអាចនឹងទាញប្រយោជន៍ពីស្ថានភាពបច្ចុប្បន្ន ដែលលោកហៅថា «បង្អួចឱកាស» ដើម្បីធ្វើកំណែទម្រង់រចនាសម្ព័ន្ធដ៏លំបាក។
ប្រសិនបើបានជោគជ័យ កំណែទម្រង់ទាំងនេះគឺជាចំណុចចុងក្រោយនៃសកម្មភាពនយោបាយរបស់លោកស៊ី ដែលរួមមានការលុបបំបាត់ដែនកំណត់អាណត្តិប្រធានាធិបតី រហូតដល់ការស្វែងរក «វិបុលភាពរួម» សម្រាប់ប្រជាជនចិន ដែលបានធ្វើឱ្យលោកក្លាយជាមេដឹកនាំចិនមានអំណាចបំផុតចាប់តាំងពីលោកម៉ៅ សេទុង។
ការលុបបំបាត់ដែនកំណត់អាណត្តិប្រធានាធិបតី បានអនុញ្ញាតឱ្យលោកស៊ីបន្តកាន់អំណាចដល់អាណត្តិទីបី ដែលមេដឹកនាំមុនៗមិនអាចកាន់។ គោលដៅ «វិបុលភាពរួម» ពោលគឺការកាត់បន្ថយតម្លៃអចលនទ្រព្យ និងការកាត់បន្ថយវិសមភាពប្រាក់ចំណូល គឺអាចផ្ដល់ប្រជាប្រិយភាពបន្ថែមទៀតសម្រាប់លោកស៊ី ខណៈពេលដែលលោកត្រៀមខ្លួនសម្រាប់សមាជប្រជាជនចិននៅឆ្នាំក្រោយ។
ប៉ុន្តែអ្នកវិភាគមួយចំនួនបានគិតថា «វិបុលភាពរួម» គឺមានហានិភ័យជាពិសេស ខណៈពេលដែលគោលនយោបាយកាត់បន្ថយតម្លៃអចលនទ្រព្យ និងកាត់បន្ថយវិសមភាពប្រាក់ចំណូលរបស់ក្រុងប៉េកាំង អាចបង្កផលអវិជ្ជមានច្រើនជាងផលវិជ្ជមានចំពោះសេដ្ឋកិច្ចធំជាងគេទីពីរក្នុងពិភពលោក។
នៅក្នុងកិច្ចប្រជុំមួយរបស់ការិយាល័យនយោបាយរបស់គណបក្សកុម្មុយនិស្តចិនកាលពីខែមេសាលោកស៊ី បានកត់សម្គាល់ថាការងើបឡើងវិញដ៏រឹងមាំនៃសេដ្ឋកិច្ចរបស់ចិនពីជំងឺរាតត្បាតកូវីដ-១៩ បានផ្ដល់នូវ «បង្អួចឱកាស» ដើម្បីកាត់បន្ថយហានិភ័យហិរញ្ញវត្ថុជាពិសេសនៅក្នុងវិស័យដែលជំពាក់បំណុលច្រើនដូចជាវិស័យអចលនទ្រព្យ។ វាក៏ជាឱកាសដើម្បីបន្តគោលដៅបរិស្ថានប្រកបដោយមហិច្ឆតាដូចជាការសម្រេចបាននូវការបញ្ចេញកាបូនខ្ពស់បំផុតត្រឹមឆ្នាំ ២០៣០ និងអព្យាក្រឹតភាពកាបូនត្រឹមឆ្នាំ ២០៦០។
ប៉ុន្តែការងើបឡើងវិញនៃសេដ្ឋកិច្ចចិន ក៏បានបង្កឱ្យតម្លៃអចលនទ្រព្យផងដែរ ដែលជាការគំរាមកំហែងដល់គោលដៅ «វិបុលភាពរួម»។ កត្តាទាំងនេះបានធ្វើឱ្យមន្ត្រីកាន់តែមានឆន្ទៈធ្វើកំណែទម្រង់និយតកម្មលើក្រុមហ៊ុនអចលនទ្រព្យ។
កំណែទម្រង់និយតកម្មនេះបានធ្វើឱ្យក្រុមហ៊ុន Evergrande ដែលជាក្រុមហ៊ុនអចលនទ្រព្យធំជាងគេទីពីររបស់ចិន ប្រឈមនឹងវិបត្តិមិនអាចសងបំណុល។ រដ្ឋបាលលោកស៊ីមានជំហរយ៉ាងតឹងរ៉ឹងថាមិនដកថយពីការអនុវត្តកំណែទម្រង់ទាំងនេះ បើទោះបីជាក្រុមហ៊ុន Evergrande ដួលរលំក៏ដោយ៕ អ្នកវិភាគជាច្រើនព្រមានថាការដួលរលំរបស់ក្រុមហ៊ុន Evergrande ដែលជំពាក់បំណុលជាង ៣០០ ពាន់លានដុល្លារ នឹងមានផលប៉ះពាល់យ៉ាងខ្លាំងចំពោះសេដ្ឋកិច្ចចិនទាំងមូល។
វិបត្តិកង្វះអគ្គិសនីនៅទូទាំងប្រទេសចិនក្នុងរយៈពេលប៉ុន្មានសប្ដាហ៍ ក៏ជាឧទាហរណ៍មួយទៀតនៃផលអវិជ្ជមានបានមកពីគោលនយោបាយមានបំណងល្អ។ ដើម្បីបំពេញគោលដៅប្រយុទ្ធប្រឆាំងការប្រែប្រួលអាកាសធាតុ រដ្ឋាភិបាលក្រុងប៉េកាំងបានកាត់បន្ថយផលិតកម្មអគ្គិសនីនៅខេត្តដែលមិនបានឈានដល់គោលដៅទិន្នភាពខ្ពស់។ រោងចក្រអគ្គិសនីជាច្រើនគឺកំពុងប្រឈមកង្វះធ្យូងថ្ម ការឡើងតម្លៃធ្យូងថ្ម និងដែនកំណត់តម្លៃអគ្គិសនីទាប មានន័យថាពួកគេធ្វើការផ្គត់ផ្គង់ដោយខាតបង់។ បន្ថែមពីលើនេះទៅទៀត តំបន់ផលិតធ្យូងថ្មសំខាន់ៗ នៃប្រទេសចិន គឺកំពុងរងគ្រោះទឹកជំនន់ ដែលធ្វើឱ្យបញ្ហាទាំងនេះកាន់តែលំបាក។
នៅសប្ដាហ៌ក្រោយការិយាល័យស្ថិតិជាតិរបស់ចិននឹងចេញផ្សាយការប៉ាន់ស្មានរបស់ខ្លួនសម្រាប់កំណើនសេដ្ឋកិច្ចត្រីមាសទី ៣ ឆ្នាំនេះ និងសូចនាករសេដ្ឋកិច្ចសំខាន់ៗដទៃទៀត។ ទិន្នន័យនេះនឹងផ្ដល់នូវការចង្អុលបង្ហាញដ៏ល្អបំផុតអំពីផលប៉ះពាល់ពីវិបត្តិនៅ Evergrande និងវិបត្តិកង្វះថាមពល។
ជាលទ្ធផល អ្នកព្យាករណ៍ជាច្រើនកំពុងពិនិត្យឡើងវិញនូវការព្យាករណ៍សេដ្ឋកិច្ចពេញមួយឆ្នាំរបស់ពួកគេចំពោះសេដ្ឋកិច្ចចិន។ ប៉ុន្តែភាគច្រើននៅតែប៉ាន់ស្មានថាទិន្នផលសេដ្ឋកិច្ចពេញមួយឆ្នាំនឹងធំជាងគោលដៅកំណើន ៦ ភាគរយរបស់រដ្ឋាភិបាលចិនផងដែរ៕