នាយករដ្ឋមន្រ្តីប៉ូឡូញចោទប្រកាន់ក្រុមប្រឆាំងថានិយាយកុហកអំពី Polexit
ប៊ុយដាប៉ែស៖ លោកនាយករដ្ឋមន្រ្តី Mateusz Morawiecki និយាយកាលពីថ្ងៃអង្គារថា ប៉ូឡូញគ្មានបំណងចាកចេញពីសហភាពអឺរ៉ុបទេ ដោយចោទអ្នកនយោបាយបក្សប្រឆាំងថាបានផ្សព្វផ្សាយរឿងកុហកដែលថាប៉ូឡូញនឹងចេញពីប្លុក (Polexit)នេះ។
ការអត្ថាធិប្បាយរបស់លោកធ្វើឡើងបន្ទាប់ពីសាលាក្តីធម្មនុញ្ញប៉ូឡូញបានសម្រេចកាលពីសប្តាហ៍មុនថា ផ្នែកខ្លះនៃច្បាប់សហភាពអឺរ៉ុបមិនត្រូវនឹងរដ្ឋធម្មនុញ្ញរបស់ប្រទេស ដែលធ្វើឱ្យប៉ះពាល់ដល់គោលការណ៍សំខាន់នៃការធ្វើសមាហរណកម្មអឺរ៉ុប និងជំរុញឱ្យមានការពិភាក្សាថាប៉ូឡូញអាចចាកចេញពីសហភាពថ្ងៃណាមួយ។ សេចក្ដីសម្រេចបង្កឱ្យប្រជាជនប៉ូឡូញជាង ១០ ម៉ឺននាក់ ចូលរួមក្នុងការប្រមូលផ្តុំគ្នាកាលពីថ្ងៃអាទិត្យ ដើម្បីគាំទ្រដល់សមាជិកភាពសហភាពអឺរ៉ុប។
លោក Morawiecki និយាយអំឡុងកិច្ចប្រជុំកំពូលនៃប្រទេស Visegrad នៅអឺរ៉ុបកណ្តាលទាំងបួននៅរដ្ឋធានីប៊ុយដាប៉ែសថា៖ «ក្រុមប្រឆាំងជាទីស្រឡាញ់របស់យើងកំពុងព្យាយាមបញ្ចុះបញ្ចូលថា យើងចង់ធ្វើឱ្យសហជីពចុះខ្សោយដោយចាកចេញពីសហភាពអឺរ៉ុប»។ លោកបន្តថា៖ «នេះច្បាស់ណាស់មិនមែនគ្រាន់តែជាព័ត៌មានក្លែងក្លាយនោះទេ វាគឺជាអ្វីដែលអាក្រក់ជាងនេះទៅទៀត វាគឺជាការកុហកដែលមានគោលបំណងធ្វើឱ្យសហភាពធ្លាក់ចុះ»។
គណបក្សប្រឆាំង Civic Platform មិនទាន់ឆ្លើយតបយ៉ាងណាភ្លាមៗទេ ប៉ុន្តែនៅឯបាតុកម្មកាលពីថ្ងៃអាទិត្យនៅក្រុងវ៉ាសូវី លោក Donald Tusk អតីតប្រធានក្រុមប្រឹក្សាអ៊ឺរ៉ុប និងបច្ចុប្បន្នជាអ្នកដឹកនាំបក្សនេះនិយាយថា គណបក្សកាន់អំណាច PiS កំពុងធ្វើឱ្យអន្តរាយដល់អនាគតរបស់ប៉ូឡូញនៅអឺរ៉ុប។
គណបក្ស PiS និយាយថា សហភាពអឺរ៉ុបបានហួសអាណត្តិរបស់ខ្លួនក្នុងការព្យាយាមបញ្ឈប់កំណែទម្រង់ប្រព័ន្ធតុលាការនៅប៉ូឡូញ ដែលក្រុងប្រ៊ុចសែលនិយាយថាធ្វើឱ្យប៉ះពាល់ដល់ឯករាជ្យភាពរបស់តុលាការ។ ជាមួយគ្នានោះ លោក Morawiecki និយាយកាលពីថ្ងៃអង្គារថា៖ «ប្រ៊ុចសែលគួរតែផ្តោតលើសន្តិសុខ បញ្ឈប់អំពើភេរវកម្ម និងកិច្ចសហការសេដ្ឋកិច្ចជាមួយប្រទេសដទៃទៀត»។
ថ្វីបើមានការប៉ះទង្គិចគ្នារវាងក្រុងវ៉ាសូវីនិងប្រ៊ុចសែលក្ដី ក៏ការគាំទ្រចំពោះសមាជិកភាពសហភាពអឺរ៉ុបនៅតែមានកម្រិតខ្ពស់នៅប៉ូឡូញ ដែលជាអតីតប្រទេសកុម្មុយនិស្តដ៏ធំបំផុតរបស់ប្លុកនេះ និងជាអ្នកទទួលផលកំពូលនៃជំនួយរបស់សហភាពអឺរ៉ុបដើម្បីជួយសមាជិកក្រីក្របន្ថយគម្លាតអភិវឌ្ឍន៍ជាមួយប្រទេសអ្នកមានដទៃទៀត។
