ប្រធានាធិបតីបារាំងប្រកាសផែនការ ៣៥ ប៊ីលានដុល្លារអាមេរិកដើម្បីធ្វើឧស្សាហកម្មឡើងវិញ
ប៉ារីស៖ ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) កាលពីថ្ងៃអង្គារ បានប្រកាសផែនការមួយដែលចំណាយទឹកប្រាក់៣៥ប៊ីលានដុល្លារ ដើម្បីធ្វើឧស្សាហកម្មក្នុងប្រទេសឡើងវិញដោយផ្អែកលើបច្ចេកវិទ្យាប្រកបដោយភាពច្នៃប្រឌិតនិងបៃតងដែលរួមមានរថយន្តអេឡិចត្រូនិក ឥន្ធនៈអ៊ីដ្រូសែន និងរោងចក្រនុយក្លេអ៊ែរប្រកបដោយប្រសិទ្ធភាព។
ការប្រកាសនេះធ្វើឡើងប្រមាណជា ៦ ខែប៉ុណ្ណេះមុនការបោះឆ្នោតប្រធានាធិបតី និងមួយខែមុនកិច្ចប្រជុំកំពូលអាកាសធាតុរបស់អង្គការសហប្រជាជាតិ។ លោកនិយាយថា ប្រទេសបារាំងបានធ្វើការសម្រេចចិត្តសំខាន់ៗពី ១៥ ទៅ ២០ ឆ្នាំក្រោយជាងប្រទេសជិតខាងអឺរ៉ុបផ្សេងទៀត ហើយឥឡូវនេះត្រូវការដើម្បីក្លាយជាប្រទេសនៃការច្នៃប្រឌិត និងការស្រាវជ្រាវម្តងទៀត។
លោក ម៉ាក្រុង និយាយទៅកាន់ថ្នាក់ដឹកនាំក្រុមហ៊ុន និងនិស្សិតសាកលវិទ្យាល័យថា ការចំណាយក្នុងផែនការនេះ គឺដើម្បីដោះស្រាយបញ្ហាកំណើនឱនភាពដែលបណ្តាលមកពីការវិនិយោគមិនគ្រប់គ្រាន់នាពេលកន្លងមក។ លោកបន្តថា បារាំងត្រូវការត្រឡប់ទៅវដ្តប្រកបដោយគុណធម៌ ដែលមានការច្នៃប្រឌិត ការបង្កើត និងការនាំចេញ ហើយតាមវិធីទាំងនោះនឹងផ្តល់ហិរញ្ញប្បទានដល់គំរូសង្គមរបស់បារាំង ដែលជាផ្នែកមួយនៃផែនការថ្មី «បារាំង ២០៣០»។
ក្នុងរយៈពេលមួយទសវត្សរ៍ខាងមុខនេះ ប្រទេសបារាំងមានបំណងក្លាយជាមេដឹកនាំពិភពលោកលើអ៊ីដ្រូសែនបៃតងដែលក្រុមហ៊ុន និងរដ្ឋាភិបាល កំពុងផ្តោតការយកចិត្តទុកដាក់លើវិស័យសេដ្ឋកិច្ចពឹងផ្អែកភាគច្រើនលើឥន្ធនៈហ្វូស៊ីល សម្រាប់តម្រូវការថាមពលរបស់ខ្លួន។
លោក ម៉ាក្រុង និយាយថា បន្ទាប់ពីការរីករាលដាលនៃជំងឺកូវីដ-១៩ ដែលធ្វើឱ្យបារាំងប្រឈមមុខនឹងភាពងាយរងគ្រោះបារាំងត្រូវខិតខំឆ្ពោះទៅរកស្វ័យភាពផលិតភាពរបស់បារាំងនិងអឺរ៉ុប ដោយរួមមានទាំងការចាំបាច់ត្រូវធ្វើការវិនិយោគទ្រង់ទ្រាយធំទៅលើការស្រាវជ្រាវវេជ្ជសាស្ត្រផង។
ឥស្សរជនប្រឆាំងរិះគន់លោកម៉ាក្រុងចំពោះពេលវេលានៃការប្រកាសនេះ ដោយលោកស្រី ម៉ារីន ឡឺប៉ែន (Marine Le Pen ) ដែលជាគូប្រជែងស្តាំនិយមរបស់លោកក្នុងការបោះឆ្នោតប្រធានាធិបតីខែមេសាឆ្នាំ ២០២២ និយាយថា លោកម៉ាក្រុងកំពុងធ្វើការសន្យាសម្រាប់អ្នកស្នងតំណែងរបស់លោក។ ចំណែកឯបេក្ខជនឆ្វេងនិយមលោក ហ្សង់-លុកមេលេនឆុន (Jean-Luc Melenchon ) វិញ ហៅការប្រកាសនេះថា ជាការឃោសនារបស់លោកម៉ាក្រុង។