រុស្សីថាកិច្ចពិភាក្សាជាមួយអាមេរិកបរាជ័យឈានទៅមុខក្នុងដោះស្រាយជម្លោះស្ថានទូត
កាលពីថ្ងៃអង្គារ ទី១២ តុលាអនុរដ្ឋមន្ត្រីការបរទេសរុស្សីលោកស៊ែហ្គី រីយ៉ាបកូវបាននិយាយប្រទេសលោក និងសហរដ្ឋអាមេរិកបានបរាជ័យឈានទៅមុខក្នុងការដោះស្រាយជម្លោះជុំវិញទំហំ និងមុខងាររបស់ស្ថានទូតពួកគេ ហើយមានហានិភ័យដែលទំនាក់ទំនងអាចកាន់តែពិបាកជាងមុន។
«ខ្ញុំមិនអាចនិយាយថាយើងទទួលបានវឌ្ឍនភាពធំដុំទេ» ទីភ្នាក់ងារសារព័ត៌មាន Interfax បានលើកឡើងថាលោករីយ៉ាបកូវបាននិយាយបែបនេះបន្ទាប់ពីជំនួបជាមួយរដ្ឋលេខាធិការក្រសួងការបរទេសអាមេរិកលោកស្រីវីតូរីយ៉ា នូឡិន។ លោកបន្ថែមទៀតថា៖ «មានហានិភ័យនៃភាពតានតឹងកាន់តែខ្លាំងឡើងថែមទៀត»។
ខណៈពេលដែលទំនាក់ទំនងបានធ្លាក់ដល់ចំណុចទាបបំផុតចាប់តាំងពីការបញ្ចប់សង្គ្រាមត្រជាក់ ប្រទេសទាំងពីរកំពុងមានជម្លោះអំពីចំនួនមន្ត្រីការទូតដែលពួកគេអាចដាក់នៅតាមរដ្ឋធានីទៅវិញទៅមក ថ្វីបើក្រុងមូស្គូបានបង្ហាញថាខ្លួនអាចលុបចោលការរឹតបន្តឹង ដែលត្រូវបានដាក់ក្នុងរយៈពេលប៉ុន្មានឆ្នាំចុងក្រោយនេះ។
កាលពីសប្ដាហ៍មុនសមាជិកសភាអាមេរិកបានស្នើឱ្យបណ្ដេញមន្ត្រីការទូតរុស្សីចំនួន ៣០០ នាក់ចេញពីក្រុងវ៉ាស៊ីនតោន ធ្វើឱ្យរុស្សីព្រមានថាប្រសិនបើអាមេរិកធ្វើបែបនេះ រុស្សីនឹងបិទស្ថានទូតអាមេរិកប្រចាំក្រុងមូស្គូ៕
