សហរដ្ឋអាមេរិកព្រមានថា នឹងពិចារណាលើជម្រើសទាំងអស់ ប្រសិនបើអ៊ីរ៉ង់បរាជ័យក្នុងការស្តារកិច្ចព្រមព្រៀងនុយក្លេអ៊ែរឆ្នាំ២០១៥
វ៉ាស៊ីនតោន៖ រដ្ឋមន្រ្តីការបរទេសអាមេរិកលោក អាន់តូនី ប្លីងគែន ព្រមានថា ប្រទេសរបស់លោកនឹងងាកទៅរក “ជម្រើសផ្សេងទៀត” ប្រសិនបើផ្នែកការទូតបរាជ័យ ក្នុងការទប់ស្កាត់កម្មវិធីនុយក្លេអ៊ែរអ៊ីរ៉ង់ ដោយលោកបានអះអាងថា “ពេលវេលាកំពុងតែខាចទៅៗ”។
លោក ប្លីងគែន នៅថ្ងៃពុធសប្តាហ៍នេះ បានជួបជាមួយសមភាគីអ៊ីស្រាអែល និងអេមីរ៉ាត់អារ៉ាប់រួមនៅក្រសួងការបរទេស ដើម្បីពិភាក្សាអំពីកិច្ចសហប្រតិបត្តិការទ្វេភាគី និងត្រីភាគី ព្រមទាំងបញ្ហាសន្តិសុខក្នុងតំបន់ រួមទាំងអ៊ីរ៉ង់ផងដែរ។ លោក ប្លីងគែន បានប្រាប់សន្និសីទសារព័ត៌មានរួមគ្នាមួយថា “យើងបន្តជឿជាក់ថា ផ្នែគការទូតគឺជាវិធីមានប្រសិទ្ធភាពបំផុត” និងថា “ប៉ុន្តែវាត្រូវការពីរភាគីដើម្បីចូលរួមក្នុងការទូត ហើយយើងមិនបានឃើញអ៊ីរ៉ង់មានឆន្ទៈក្នុងការធ្វើដូច្នេះទេនៅចំណុចនេះ”។ ជាមួយគ្នានេះ លោកក៏បានព្រមានដែរថា យើងបានត្រៀមងាកទៅរកជម្រើសផ្សេងទៀត ប្រសិនបើអ៊ីរ៉ង់មិនផ្លាស់ប្តូរទិសដៅ។ ដោយឡែករដ្ឋមន្ត្រីការបរទេសអ៊ីស្រាអែលលោក យ៉ែ ឡាភីដ បាននិយាយថា ការព្រួយបារម្ភអំពីសមត្ថភាពនុយក្លេអ៊ែររបស់អ៊ីរ៉ង់គឺស្ថិតនៅចំកណ្តាលនៃដំណើរទស្សនកិច្ចរបស់លោក។ លោកសង្កត់ធ្ងន់ថា អ៊ីស្រាអែលសូមរក្សាសិទ្ធិធ្វើសកម្មភាពនៅពេលណាមួយតាមវិធីណាក៏ដោយ ដើម្បីបញ្ឈប់អ៊ីរ៉ង់ពីការទទួលបានអាវុធនុយក្លេអ៊ែរ។
គួរបញ្ជាក់ផងដែរថា មន្ត្រីអាមេរិក និងអ៊ីរ៉ង់បានចាប់ផ្តើមកិច្ចចរចាដោយប្រយោលនៅទីក្រុងវីយែនក្នុងខែមេសាកន្លងទៅនេះ ដើម្បីស្តារកិច្ចព្រមព្រៀងនុយក្លេអ៊ែរឆ្នាំ ២០១៥ ដែលត្រូវបានគេស្គាល់ជាផ្លូវការថា ផែនការសកម្មភាពរួមដ៏ទូលំទូលាយ (JCPOA)។ ភាគីទាំងពីរនៅតែមានភាពខុសគ្នាគួរឱ្យកត់សម្គាល់ បន្ទាប់ពីការចរចា ៦ ជុំដែលត្រូវបានផ្អាកចាប់តាំងពីខែមិថុនា៕ ប្រភព៖ ស៊ីនហួរ
