នាយកប្រតិបត្តិ Evergrande កំពុងនៅហុងកុង ដើម្បីចរចារឿងពន្យារពេលបង់បំណុល
នាយកប្រតិបត្តិក្រុមហ៊ុនអចលនទ្រព្យចិន Evergrande លោក Xia Haijun កំពុងស្ថិតនៅដែនដីហុងកុង ដើម្បីពិភាក្សាជាមួយធនាគារវិនិយោគ និងម្ចាស់បំណុលនានា ក្នុងគោលបំណងរៀបចំឥណទានឡើងវិញ ស្របពេលដែលក្រុមហ៊ុនយក្សមួយនេះកំពុងរួមរឹតដោយបំណុលសរុប ៣០០ប៊ីលានដុល្លារអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ប្រភពខាងលើបានឱ្យដឹងថា លោក Xia មានវត្តមាននៅហុងកុងជាង ២ខែមកហើយ។ ក្រុមហ៊ុន Evergrande នេះមានទ្រព្យសម្បត្តិជាច្រើននៅដែនដីស្វយ័តនេះ។
ក្រៅពីនិយាយរឿងបំណុល ប្រភពខាងលើបានចុះផ្សាយថា លោក Xia ក៏បានពិភាក្សារឿងលក់ទ្រព្យសម្បត្តិរបស់ក្រុមហ៊ុនមួយចំនួនដូចជា ផ្នែកសេវាកម្ម និងផ្នែកយានយន្តអគ្គិសនី ដើម្បីរៃអង្គាសប្រាក់ឡើងវិញ។
ខាងក្រុមហ៊ុន Evangrande កំពុងតែលក់ចំណែកនៃបុត្រសម្ព័ន្ធផ្នែកសេវាកម្មអចលនទ្រព្យរបស់ខ្លួនទៅកាន់ក្រុមហ៊ុនអចលនទ្រព្យ Hopson Development ចំនួន ៥១% ដែលមានតម្លៃប្រមាណ ២,៥ប៊ីលានដុល្លារ។
មន្ត្រីធនាគារកណ្ដាលចិនមួយរូបបានលើកឡើងកាលពីថ្ងៃសុក្រថា ផលប៉ះពាល់បណ្ដាលមកពីបញ្ហាបំណុលរបស់ក្រុមហ៊ុន Evergrande អាចគ្រប់គ្រងបាន ខណៈហានិភ័យពីសំណាក់ស្ថាប័នហិរញ្ញវត្ថុនានាមានមិនធំប៉ុន្មាននោះទេ៕
ប្រភព៖ Reuters