ពលរដ្ឋអាហ្វហ្គានីស្ថានបង្ខំចិត្តលក់កូនរបស់ពួកគេដើម្បីសងបំណុល ខណៈភាពក្រីក្រកើនឡើង
ឪពុកម្ដាយអាហ្វហ្គានីស្ថានមួយចំនួនបានបង្ខំចិត្តលក់កូនរបស់ពួកគេដើម្បីសងបំណុល ខណៈពេលដែលភាពក្រីក្រកំពុងកើនឡើងក្នុងប្រទេសអាហ្វហ្គានីស្ថាន បន្ទាប់ពីការចូលកាន់អំណាចរបស់ក្រុមតាលីបង់ នេះបានតាមការរាយការណ៍របស់កាសែត The Wall Street Journal។
ជាឧទាហរណ៍កាសែត WSJ បានលើកឡើងអំពីករណីស្ត្រីសម្អាតផ្ទះមួយរូបឈ្មោះសាលេហា ដែលបានលក់កូនស្រីអាយុបីឆ្នាំទៅឱ្យម្ចាស់បំណុល ដើម្បីដោះស្រាយបំណុល ៥៥០ ដុល្លារ។ លោកស្រីសាលេហាមានចំណូល ៧០ សេនក្នុងមួយថ្ងៃពីការងារ ហើយស្វាមីរបស់លោកស្រីគឺគ្មានការងារច្បាស់លាស់ទេ។ រីឯម្ចាស់បំណុលឈ្មោះខាលីដ អាម៉ាដវិញបាននិយាយថាលោកក៏មិនមានប្រាក់ដែរ ហើយគ្មានជម្រើសអាចដោះស្រាយបំណុលនេះក្រៅពីការយកកូនស្រីរបស់សាលេហា។
កាលពីខែមុន កម្មវិធីអភិវឌ្ឍរបស់អង្គការសហប្រជាជាតិ (UDNP) បាននិយាយថាប្រទេសអាហ្វហ្គានីស្ថានគឺកំពុងឈានទៅរក «ភាពក្រីក្រសកល» បន្ទាប់ពីការចូលកាន់អំណាចរបស់ក្រុមតាលីបង់ ដោយមានការព្យាករណ៍ថាក្នុងរយៈពេលមួយខាងមុខនេះអត្រាភាពក្រីក្រនឹងកើនដល់ ៩៧ ទៅ ៩៨ ភាគរយ។
កត្តាជាច្រើនបានបង្កឱ្យមានវិបត្តិក្រីក្រនេះ។ កត្តាដ៏ធំមួយនោះគឺការសម្រេចរបស់រដ្ឋាភិបាលអាមេរិកក្នុងបង្កកទ្រព្យបម្រុងរបស់ធនាគារកណ្ដាលអាហ្វហ្គានីស្ថានប្រមាណ ១០ ពាន់លានដុល្លារ ដែលគេសង្ស័យថាត្រូវបានផ្ញើនៅនៃធនាគារកណ្ដាលអាមេរិកសាខាទីក្រុងញូវយ៉ក។ រដ្ឋាភិបាលអាមេរិកបានធ្វើបែបនេះដើម្បីដាក់កំណត់លើធនធានរបស់តាលីបង់ ប៉ុន្តែអ្នករិះគន់ជាច្រើនបាននិយាយថាការសម្រេចចិត្តនេះចុងក្រោយនឹងប៉ះពាល់ប្រជាជនអាហ្វហ្គានីស្ថានដោយផ្ទាល់៕
ប្រភព៖ Yahoo News
