អ្នកផ្សព្វផ្សាយសាសនាអាមេរិក ១៧ នាក់រួមទាំងកុមារ ត្រូវបានក្រុមទំនើងចាប់ជំរិតនៅហៃទី
មន្រ្តីសន្តិសុខហៃទីនិយាយថា ក្រុមអ្នកផ្សព្វផ្សាយសាសនាគ្រឹស្តជនជាតិអាមេរិកាំងចំនួន ១៧ នាក់ និងក្រុមគ្រួសាររបស់ខ្លួនរួមទាំងកុមារផង ត្រូវបានក្រុមក្មេងទំនើងចាប់ជំរិតនៅក្នុងរដ្ឋធានីព័រអូប្រាំងកាលពីថ្ងៃសៅរ៍ចុងសប្ដាហ៍មុន។
ហេតុការណ៍កើតឡើងនៅពេលដែលបេសកជនមួយក្រុមនេះ ជិះឡានក្រុងចេញមណ្ឌលកុមារកំព្រាមួយ ហើយធ្វើដំណើរទៅកាន់ព្រលានយន្តហោះដើម្បីទម្លាក់សមាជិកខ្លះរបស់ខ្លួន។ ទីភ្នាក់ងារសារព័ត៌មាន AFP ស្រង់សម្ដីមន្រ្តីសន្តិសុខដែលនិយាយថា ក្រុមទំនើងដែលចាប់ជំរិតក្រុមបេសកជនគឺជាក្រុមប្រដាប់អាវុធមានជាប់ពាក់ព័ន្ធធ្វើសកម្មភាពលួច និងចាប់ជំរិតនៅក្នុងតំបន់រវាងរដ្ឋធានីព័រអូប្រាំង និងព្រំដែនជាមួយសាធារណរដ្ឋដូមីនីក។
ទីភ្នាក់ងារសារព័ត៌មាន Associated Press ចុះផ្សាយថា ក្រសួងជំនួយគ្រីស្ទានដែលមានមូលដ្ឋាននៅសហរដ្ឋអាមេរិកបានផ្ញើសារទៅបេសកកម្មសាសនាផ្សេងៗដោយនិយាយថា ក្រុមដែលត្រូវបានចាប់ជំរិតកំពុងសាងសង់មណ្ឌលកុមារកំព្រាមួយនៅហៃទី។ សាររបស់ក្រសួងនិយាយថា៖ «នេះគឺជាការដាស់តឿនឱ្យមានការអធិស្ឋានពិសេស។ សូមអធិស្ឋានឲ្យសមាជិកក្រុមទំនើងមករកការប្រែចិត្ត»។
អ្នកនាំពាក្យរដ្ឋាភិបាលអាមេរិកម្នាក់និយាយថា ពួកគេបានដឹងអំពីរបាយការណ៍ស្តីពីការចាប់ជំរិតនេះ។ អ្នកនាំពាក្យដដែលនិយាយដោយបដិសេធមិនធ្វើអត្ថាធិប្បាយវែងឆ្ងាយថា៖ «សុខុមាលភាព និងសុវត្ថិភាពរបស់ពលរដ្ឋអាមេរិកនៅបរទេស គឺជាអាទិភាពមួយក្នុងចំណោមអាទិភាពខ្ពស់បំផុតរបស់ក្រសួងការបរទេស»។
ហៃទីកំពុងជួបការលំបាកជាថ្មីម្តងទៀតជាមួយនឹងការចាប់ជំរិតទាក់ទងនឹងក្រុមក្មេងទំនើងដែលថយចុះបន្ទាប់ពីលោកប្រធានាធិបតី Jovenel Moise ត្រូវបានគេធ្វើឃាតកាលពីថ្ងៃទី ៧ ខែកក្កដា និងបន្ទាប់ពីការរញ្ជួយដីកម្រិត ៧,២ រ៉ិចទ័រដែលសម្លាប់មនុស្សជាង ២ ២០០ នាក់កាលពីខែសីហា។
យោងតាមរបាយការណ៍របស់មជ្ឈមណ្ឌលវិភាគ និងស្រាវជ្រាវសិទិ្ធមនុស្សដែលជាក្រុមសង្គមស៊ីវិលមានមូលដ្ឋាននៅរដ្ឋធានីព័រអូប្រាំង មនុស្សជាង ៦០០ ត្រូវបានចាប់ជំរិតក្នុងត្រីមាសទី ៣ នៃឆ្នាំ ២០២១ បើប្រៀបធៀបទៅនឹង ២៣១ នាក់ក្នុងរយៈពេលដូចគ្នាកាលពីឆ្នាំមុន។
ប្រភព៖ Aljazeera