មនុស្សយ៉ាងហោចណាស់ ២៦ នាក់ស្លាប់ដោយសារគ្រោះទឹកជំនន់នៅភាគខាងត្បូងប្រទេសឥណ្ឌា
មន្រ្តីក្នុងតំបន់ឥណ្ឌានិយាយថា មនុស្សយ៉ាងហោចណាស់ ២៦ នាក់ស្លាប់ដោយសារគ្រោះទឹកជំនន់ និងការរអិលបាក់ដីនៅរដ្ឋ Kerala ភាគខាងត្បូងប្រទេសឥណ្ឌា បន្ទាប់ពីមានភ្លៀងធ្លាក់ជោគជាំបណ្តាលឱ្យទឹកទន្លេហូរកាត់ផ្តាច់ទីក្រុង និងភូមិកាលពីចុងសប្ដាហ៍មុន។
ក្មេងប្រាំនាក់ស្ថិតក្នុងចំណោមអ្នកស្លាប់ ហើយចំនួនអ្នកស្លាប់អាចនឹងកើនឡើងបន្ថែមទៀតដោយសារមនុស្សជាច្រើនកំពុងបាត់ខ្លួន ខណៈផ្ទះជាច្រើនខ្នងក្នុងស្រុក Kottayam ដែលមានមនុស្សជាប់នៅក្នុង ត្រូវបានទឹកអូសនាំយកទៅ។ ស្រុក Kottayam និង Idukki គឺជាស្រុកពីរដែលរងផលប៉ះពាល់ធ្ងន់ធ្ងរបំផុតនៅក្នុងរដ្ឋដែលមានភ្លៀងធ្លាក់ច្រើនថ្ងៃបណ្តាលឱ្យមានការរអិលបាក់ដី។
មនុស្សរាប់ពាន់នាក់ត្រូវបានជម្លៀសចេញ ហើយជំរុំជួយសង្គ្រោះចំនួន ១៨៤ ត្រូវបានបង្កើតឡើងនៅទូទាំងរដ្ឋ Kerala ដែលមានមនុស្សជាង ៨ ០០០ នាក់កំពុងត្រូវបានផ្តល់អាហារ ទីជម្រក និងសម្លៀកបំពាក់។ រដ្ឋាភិបាលឥណ្ឌា ក៏បានប្រកាសផ្តល់ជំនួយហិរញ្ញវត្ថុដល់អ្នកដែលបាត់បង់ផ្ទះសម្បែង និងផលដំណាំផងដែរ។
កាលពីថ្ងៃច័ន្ទ ទំនប់វារីអគ្គិសនីមួយចំនួននៅទូទាំងរដ្ឋ Kerala ត្រូវបានបើកដើម្បីកាត់បន្ថយហានិភ័យនៃទឹកជោរជន់។ នៅឆ្នាំ ២០១៨ មនុស្សជិត ៥០០ នាក់បានស្លាប់នៅក្នុងរដ្ឋ Kerala នៅពេលទឹកជំនន់ដ៏អាក្រក់បំផុតវាយប្រហាររដ្ឋនេះ។ កាលនោះ មានភាពចម្រូងចម្រាសជាច្រើនជុំវិញការពិតដែលថា ទំនប់វារីអគ្គិសនីត្រូវបានបើកដោយគ្មានការព្រមានដល់ប្រជាជនដែលរស់នៅតំបន់ទំនាបខាងក្រោម។
នាយកដ្ឋានឧតុនិយមឥណ្ឌានិយាយថា ភ្លៀងធ្លាក់ខ្លាំងជោគជាំកាលពីចុងសប្ដាហ៍មុន បណ្តាលមកពីតំបន់សម្ពាធទាបមួយនៅសមុទ្រអារ៉ាប់ភាគអាគ្នេយ៍ និងរដ្ឋ Kerala ហើយថយចុះមកវិញនៅថ្ងៃច័ន្ទ។ ការិយាល័យអាកាសធាតុនិយាយថា នៅភាគខាងជើងប្រទេសឥណ្ឌា រដ្ឋមួយចំនួនរួមទាំងតំបន់ហិមាល័យនៃរដ្ឋ Uttarakhand និងរដ្ឋ Himachal Pradesh នឹងមានភ្លៀងធ្លាក់ខ្លាំងរហូតដល់ជោគជាំក្នុងរយៈពេលពីរទៅបីថ្ងៃខាងមុខនេះ។
ប្រភព៖ BBC
