នាយករដ្ឋមន្ត្រីវៀតណាមសន្យាមុខសភាថា សេដ្ឋកិច្ចនឹងងើបវិញ ពីវិបត្តិកូវីដ
ការនាំចេញរបស់វៀតណាមទំនងជានឹងកើនឡើង ១០.៧ភាគរយ ក្នុងឆ្នាំ២០២១នេះ ដោយអតិផរណាប្រចាំឆ្នាំត្រូវបានរំពឹងថា ទាបជាង ៤% ។ នាយករដ្ឋមន្ត្រីវៀតណាម Pham Minh Chinh បាននិយាយបែបនេះ នាថ្ងៃទី២០ តុលា ២០២១ ដោយសន្យាថា នៅចំពោះមុខសភាថា សេដ្ឋកិច្ចជាតិនឹងងើបឡើងវិញ។
លោកប្រាប់សភាថា វៀតណាមដែលធ្លាប់ជាប្រទេសមួយក្នុងចំណោមប្រទេសរីកចម្រើនយ៉ាងលឿនផ្នែកសេដ្ឋកិច្ច ប្រចាំតំបន់អាស៊ីនោះ ត្រូវបានវាយប្រហារធ្ងន់ធ្ងរពីជំងឺរាតត្បាត ដែលធ្វើឲ្យប៉ះពាល់ដល់ខ្សែច្រវ៉ាក់ផលិតកម្ម និងបុគ្គលិក កម្មករ ក្នុងវិស័យឧស្សាហកម្មដ៏មានសារៈសំខាន់។
ប៉ុន្តែលោក Pham Minh Chinh បានថ្លែងរំពឹងថា GDP នឹងកើនពី៦.៩ភាគរយទៅ ៦.៥ភាគរយ នៅឆ្នាំបន្ទាប់ ដោយរដ្ឋាភិបាលគ្រោងនឹងបន្ទាប អតិផរណា នៅត្រឹម៤ភាគរយ៕
