ចិន និងរុស្ស៊ីបញ្ជូននាវាចម្បាំងឆ្លងកាត់ជប៉ុន ខណៈពួកគេបង្ហាញពីកិច្ចសហប្រតិបត្តិការ
ក្នុងការបង្ហាញពីកិច្ចសហប្រតិបត្តិការ ប្រទេសចិន និងរុស្សីបានធ្វើសមយុទ្ធប្រឆាំងនាវាមុជទឹក ហើយបានធ្វើដំណើរឆ្លងកាត់ច្រកសមុទ្រស៊ូហ្គារូនៃប្រជុំកោះជប៉ុន ដែលជាសកម្មភាពមួយត្រូវបានអ្នកវិភាគចាត់ទុកថាជាការប្រឆាំងនឹងសម្ពាធពីសហរដ្ឋអាមេរិក និងសម្ព័ន្ធមិត្តពួកគេ។
ក្រសួងការពារជាតិជប៉ុន បានបញ្ជាក់ថាកាលពីថ្ងៃចន្ទនាវាចម្បាំងចិនចំនួន ៥ គ្រឿង និងនាវាចម្បាំងរុស្សីចំនួន ៥ គ្រឿង បានធ្វើដំណើរឆ្លងកាត់ច្រកសមុទ្រស៊ូហ្គារូ ដែលស្ថិតនៅរវាងកោះហុកកៃដូ និងជប៉ុនដីគោក។ នេះគឺជាលើកដំបូងដែលជប៉ុនបានបញ្ជាក់ថានាវាចម្បាំងចិន និងរុស្ស៊ីបានឆ្លងកាត់ច្រកនេះ។
ដោយមានទទឹងត្រឹមតែ ១៩ គីឡូម៉ែត្រនៅចំណុចតូចបំផុត ច្រកសមុទ្រស៊ូហ្គារូមានផ្លូវទឹកអន្តជាតិមួយនៅចំកណ្ដាល ដោយកាលពីសម័យសង្គ្រាមត្រជាក់ប្រទេសជប៉ុនបានសម្រេចចិត្តកំណត់ដែនទឹករបស់ខ្លួនត្រឹម ៣ ម៉ាយពីឆ្នេរ ដែលស្មើនឹងមួយភាគបួននៃដែនកំណត់ពេញសិទ្ធ ១២ ម៉ាយ។ ការធ្វើបែបនេះគឺដើម្បីអនុញ្ញាតឱ្យនាវាចម្បាំង និងនាវាមុជទឹកប្រដាប់អាវុធនុយក្លេអ៊ែរឆ្លងកាត់ ដោយមិនចាំបាច់រំលោភច្បាប់ប្រឆាំងអាវុធនុយក្លេអ៊ែររបស់ជប៉ុន។
ដំណើរឆ្លងកាត់កាលពីថ្ងៃចន្ទ ធ្វើឡើងបន្ទាប់ពីចិន និងរុស្សីបញ្ចប់សមយុទ្ធប្រឆាំងនាវាមុជទឹកនៅសមុទ្រជប៉ុន ដែលក្នុងនោះកងទ័ពជើងទឹកទាំងពីរបានធ្វើការហ្វឹកហាត់រួមគ្នាដើម្បីពង្រឹងសមត្ថភាពប្រយុទ្ធ។ អ្នកវិភាគបានយល់ស្របថាសមយុទ្ធចុងក្រោយនេះ គឺស្របទៅតាមទំនាក់ទំនងខិតកាន់ជិតរវាងក្រុងប៉េកាំង និងក្រុងមូស្គូ ដើម្បីប្រឆាំងនឹងអាមេរិក និងសម្ព័ន្ធមិត្តរបស់ពួកគេ។
កាសែតបក្សកុម្មុយនិស្តចិន Global Times បានសរសេរថាការសមយុទ្ធខាងលើនេះអាចប្រទេសទាំងពីរឆ្លងកាត់ការឡោមព័ទ្ធដឹកនាំដោយអាមេរិក និងអាចប្រឆាំង AUKUS ដែលជាសន្ធិសញ្ញារវាង អាមេរិក អង់គ្លេស និងអូស្ត្រាលី ដើម្បីជួយអូស្ត្រាលីសាងសង់នាវាមុជទឹកដើរដោយថាមពលនុយក្លេអ៊ែរ។
បើតាមការផ្សាយរបស់សារពត៌មានចិន Global Times ក្រុងប៉េកាំងបានដាក់ពង្រាយនាវាចម្បាំងជំនាន់ថ្មី Type 055 ជាលើកដំបូងក្នុងសមយុទ្ធខាងលើ។ ដោយចូលបម្រើការកាលពីឆ្នាំ នាវានេះគឺក្នុងចំណោមនាវាចម្បាំងធំជាងគេនៅអាស៊ីខាងកើត ហើយមានតួនាទីការពារនាវាដឹកយន្តហោះ។
ជាផ្នែកមួយនៃភាពជាដៃគូយុទ្ធសាស្ត្រគ្រប់ជ្រុងជ្រោយនៃការសម្របសម្រួល ដែលជាកម្រិតទទួលស្គាល់ការទូតខ្ពស់បំផុតរបស់ក្រុងប៉េកាំង ចិន និងរុស្ស៊ីបានសហការជាទៀងទាត់ក្នុងសមយុទ្ធយោធាចាប់តាំងពីឆ្នាំ ២០១២ ដោយមិនរាប់បញ្ចូលកាលពីឆ្នាំមុនដោយសារជំងឺរាតត្បាតកូវីដ -១៩។ ចាប់តាំងពីឆ្នាំ ២០១៩ មកប្រទេសទាំងពីរបានធ្វើការល្បាតតាមអាកាសប្រចាំឆ្នាំរួមគ្នាលើសមុទ្រចិនខាងកើត និងសមុទ្រជប៉ុន។
រដ្ឋាភិបាលចិន និងរុស្ស៊ីបាននិយាយថាកិច្ចសហប្រតិបត្តិការសន្តិសុខរបស់ពួកគេមិនផ្តោតលើប្រទេសទីបីឡើយប៉ុន្តែក្រុមអ្នកវិភាគបានយល់ស្របថាការល្បាតរួមគ្នានៅថ្ងៃចន្ទតាមរយៈច្រកសមុទ្រស៊ូហ្គារូ គឺជាសារព្រមានទៅកាន់ជប៉ុន ដែលជាសម្ព័ន្ធមិត្តដ៏សំខាន់របស់អាមេរិក និងជាម្ចាស់ផ្ទះរបស់មូលដ្ឋានយោធាអាមេរិកធំជាងគេក្នុងតំបន់។
ទាំងទីក្រុងប៉េកាំង និងទីក្រុងមូស្គូគឺមិនគាំទ្រការពង្រីកភាពជាដៃគូសន្តិសុខរបស់តូក្យូ ដែលត្រូវបានរចនាឡើងដើម្បីបំពេញបន្ថែមពីលើសម្ព័ន្ធភាពជាមួយអាមេរិក។ ប្រទេសជប៉ុនគឺជាផ្នែកមួយនៃសម្ព័ន្ធ Quad ជាវេទិកាសន្តិសុខរវាងជប៉ុន អូស្ត្រាលី ឥណ្ឌា និងអាមេរិក។ ក្រុងប៉េកាំងមើលឃើញថា Quad គឺជាផ្នែកមួយនៃយុទ្ធសាស្ត្រឡោមព័ទ្ធរបស់អាមេរិក។ កាលពីខែមុន ជប៉ុនក៏បានធ្វើជាម្ចាស់ផ្ទះរបស់ក្រុមនាវាដឹកយន្តហោះ HMS Queen Elizabeth របស់ចក្រភពអង់គ្លេសផងដែរ៕
ប្រភព៖ SCMP
