ប្រៃសណីយ៍ថៃតេស្តបញ្ជូនថ្នាំពេទ្យឲ្យអ្នកជំងឺ តាមដ្រូន
ក្រុមហ៊ុន Thailand Post ឬ ប្រៃសណីយ៍ថៃ ធ្វើបានសាកល្បងបញ្ជូនទំនិញ តាមដ្រូន ជាលើកដំបូង កាលពីថ្ងៃទី២០ តុលា ម្សិលមិញ ជាមួយនឹងការចាប់ផ្តើមផែនការចែកចាយសម្ភារបរិក្ខាពេទ្យទៅជូនអ្នកជំងឺ ដែលពិបាកទទួល តាមពេលធម្មតានោះ។
ការសាកល្បងនេះធ្វើឡើង នៅមហាវិទ្យាល័យ Sing Buri Technical College ដោយបញ្ជូនដ្រូនផ្ទុកកញ្ចប់ថ្នាំពេទ្យ ទៅកាន់គោលដៅ ដែលមានចម្ងាយប្រមាណ៥០០ម៉ែត្រ។ ខេត្ត Sing Buri គឺជាទីតាំងត្រូវបានជ្រើសរើសដើម្បីសាកល្បង ខណៈដែខេត្តនេះគឺជាខេត្តមួយក្នុងចំណោមខេត្តផ្សេងៗ ដែលជន់លិចដោយសារទឹកជំនន់ ពិបាកក្នុងការផ្គត់ផ្គង់ទំនិញ នេះបើតាមន្ត្រីរបស់ Thailand Post ។ យ៉ាងណាក៏ដោយ មិនទាន់ត្រូវបានដឹងពីពេលវេលា ដែលត្រូវប្រើប្រាស់សេវាកម្មនេះ ពេញលេញនៅឡើយទេ។
គួរបញ្ជាក់ថា Thailand Post គឺជាក្រុមហ៊ុនដែលធ្លាប់ត្រូវបានមន្ទីរពេទ្យជាង៤០០កន្លែង ជ្រើសរើស សម្រាប់ចែកចាយថ្នាំពេទ្យឲ្យអ្នកជំងឺនៅតាមផ្ទះ ក្នុងពេលផ្ទុះកូវីដ។
នាយករដ្ឋមន្ត្រីថៃ ប្រាយុទ្ធ ចាន់អូចា បានអះអាង ក្នុងពិធីសាកល្បងថា ការតេស្តដ្រូននេះ គឺនឹងផ្តល់សេវាកម្មដឹកជញ្ជូនកាន់តែល្អប្រសើរ លើផ្នែកសុខាភិបាលនេះ៕
