IMF កាត់បន្ថយព្យាករណ៍កំណើនសេដ្ឋកិច្ចអាស៊ី ព្រមានពីហានិភ័យបញ្ហាខ្សែចង្វាក់ផ្គត់ផ្គង់
កាលពីថ្ងៃអង្គារ ទី១៩ មូលនិធិរូបិយវត្ថុអន្តរជាតិ (IMF) បានទម្លាក់ការព្យាករណ៍កំណើនសេដ្ឋកិច្ចនៅអាស៊ីសម្រាប់ឆ្នាំនេះ ហើយបានព្រមានថារលកឆ្លងជំងឺកូវីដ-១៩ បញ្ហារំខានខ្សែចង្វាក់ផ្គត់ផ្គង់ និងសម្ពាធអតិផរណា បង្កហានិភ័យដល់ទស្សនវិស័យ។
នៅក្នុងរបាយការណ៍ចក្ខុវិស័យប្រចាំតំបន់អាស៊ី IMF បានកាត់បន្ថយការព្យាករណ៍កំណើនសេដ្ឋកិច្ចនៅអាស៊ីនៅឆ្នាំនេះមកត្រឹម ៦.៥% ដែលធ្លាក់ចុះ ១.១% ពីការព្យាករណ៍របស់ខ្លួននៅក្នុងខែមេសា ខណៈពេលដែលការរីករាលដាលវីរុសបម្លែងដែលតា ធ្វើឱ្យប៉ះពាល់ដល់តម្រូវការ និងទិន្នផលរោងចក្រ។ បើទោះជាយ៉ាងនេះក៏ដោយ IMF បានបង្កើនការព្យាករណ៍សម្រាប់ឆ្នាំ ២០២២ ទៅដល់ ៥,៧ % កើនពី៥,៣%នៅខែមេសា ដើម្បីឆ្លុះបញ្ចាំងវឌ្ឍនភាពការចាក់វ៉ាក់សាំងនៅជុំវិញពិភពលោក។
សេដ្ឋកិច្ចរបស់ប្រទេសចិននឹងកើនឡើង ៨,០% នៅឆ្នាំនេះនិង ៥,៦% នៅឆ្នាំ ២០២២ ប៉ុន្តែការងើបឡើងវិញនៅតែ«មិនមានតុល្យភាព» ដោយសារការផ្ទុះឡើងនៃជំងឺកូវីដ-១៩ម្ដងហើយម្ដងទៀត និងការរឹតបន្តឹងសារពើពន្ធដែលកាត់បន្ថយតម្រូវការ។
ប្រទេសអាស៊ានដូចជាឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី និងថៃ នៅតែប្រឈមនឹង «បញ្ហាធ្ងន់ធ្ងរ» ពីការងើបឡើងវិញនៃជំងឺកូវីដ-១៩ និងតម្រូវការខ្សោយ។
ស្ថាប័នហិរញ្ញវត្ថុ IMF អះអាងថាការព្យាយាម «ធ្វើឱ្យគោលនយោបាយប្រក្រតីឡើងវិញនៅខុសពេល ឬការប្រស្រ័យទាក់ទងគោលនយោបាយមិនច្បាស់លាស់» ណាមួយដោយធនាគារកណ្ដាលអាមេរិក អាចធ្វើឱ្យទុនហូរចេញយ៉ាងខ្លាំង ហើយធ្វើតម្លៃនៃការខ្ចីទន់កើនឡើងសម្រាប់ប្រទេសកំពុងអភិវឌ្ឍនៅអាស៊ី៕
ប្រភព៖ Reuters
