កូរ៉េខាងត្បូងសាកល្បងមីស៊ីលអវកាសថ្មី ខណៈការប្រកួតប្រណាំងសព្វាវុធនៅអាស៊ីកើន
កាលពីថ្ងៃព្រហស្បតិ៍ ទី២១ តុលាប្រទេសកូរ៉េខាងត្បូងបានបាញ់សាកល្បងមីស៊ីលអវកាសថ្មី Nuri ដែលត្រូវបានអភិវឌ្ឍ និងផលិតក្នុងស្រុក ជាការបង្ហាញការលោតផ្លោះបច្ចេកវិទ្យាអវកាសរបស់ប្រទេសនេះ ដែលអាចប្រើសម្រាប់គោលបំណងស៊ីវិល និងយោធា។
មីស៊ីល Nuri ដែលមានសមត្ថភាពដឹកជញ្ជូនផ្កាយរណបទម្ងន់ ១,៥ តោនទៅកម្ពស់ ៦០០ គីឡូម៉ែត្រ ត្រូវបានកូរ៉េខាងត្បូងមើលឃើញថាជាការពង្រឹងសមត្ថភាពប្រកួតប្រជែងរបស់ខ្លួនក្នុងប្រព័ន្ធទំនាក់ទំនង 6G នៅពេលអនាគត ហើយជួយដាក់ពង្រាយភ្នែកឃ្លាំមើលនៅលើមេឃ ខណៈពេលដែលកូរ៉េខាងជើងពង្រីកទំហំសព្វាវុធរបស់ខ្លួន ដែលរួមមានមីស៊ីលផ្លោងអន្តរទ្វីប (ICBM)។
ការបាញ់សាកល្បងនេះ ធ្វើឡើងប៉ុន្មានខែបន្ទាប់ពីសហរដ្ឋអាមេរិកសម្រេចចិត្តដកដែនកំណត់លើសមត្ថភាពផលិតមីស៊ីលរបស់កូរ៉េខាងត្បូងដែលត្រូវបានដាក់កាលពីសម័យសង្គ្រាមត្រជាក់។ កាលពីខែមុនកូរ៉េខាងត្បូងបានធ្វើការសាកល្បងមីស៊ីលផ្លោងបាញ់ចេញពីនាវាមុជទឹក (SLBM) ធ្វើឱ្យប្រទេសនេះក្លាយជាប្រទេសគ្មានអាវុធនុយក្លេអ៊ែរដំបូងដែលសាកល្បងបច្ចេកវិទ្យាមីស៊ីលនេះ។
ខណៈពេលដែលប្រទេសកូរ៉េខាងត្បូងគ្មានអាវុធនុយក្លេអ៊ែរ អ្នកជំនាញបាននិយាយថាមីស៊ីល Nuri ដែលឥឡូវនេះប្រើប្រាស់តែសម្រាប់វិស័យស៊ីវិល អាចត្រូវបានកែច្នៃយ៉ាងងាយស្រួលឱ្យទៅជាមីស៊ីលផ្លោងអន្តរទ្វីបដើម្បីដឹកជញ្ជូនគ្រាប់នុយក្លេអ៊ែរ។ បន្ថែមពីលើនេះបេក្ខជនប្រធានាធិបតីកូរ៉េខាងត្បូងលោកហុងជុន-ភ្យ៉ូ ដែលជាអ្នកនយោបាយអភិរក្សនិយម បាននិយាយថាឥឡូវនេះដល់ពេលកូរ៉េខាងត្បូងមានអាវុធនុយក្លេអ៊ែរដោយខ្លួនឯងហើយ៕
ប្រភព៖ The Straitstimes
