ប្រធានគណបក្សខ្មែររួបរួមជាតិ រំលឹកពីខួប៣០ឆ្នាំនៃកិច្ចព្រមព្រៀងសន្តិភាពក្រុងប៉ារីស ២៣ តុលា
ភ្នំពេញៈ លោកញឹក ប៊ុនឆៃ ប្រធានគណបក្សខ្មែររួបរួមជាតិបានលើកឡើងថា កិច្ចព្រមព្រៀងសន្តិភាពក្រុងប៉ារីស ២៣ តុលា ១៩៩១ ជាសមិទ្ធផលប្រវត្តិសាស្ត្រ ។ជាមូលដ្ឋានកសាងនូវទំនុកចិត្តដល់ភាគីជម្លោះ និង បដិបក្ខខ្មែរយើងអាចផ្សះផ្សារជានា និងរួបរួមជាតិឡើងវិញដោយនាំមកនូវសន្តិភាព ស្ថិរភាព បើកឱកាសសម្រាប់ការអភិវឌ្ឍ ស្តារនិងកសាងហេដ្ឋារចនាសម្ព័ន្ធរូបវ័ន្ត សេដ្ឋកិច្ច សង្គម វប្បធម៌ អរិយធម៌ ។ល។
ក្នុងសារលិខិតអបអរសាទរទិវារំលឹកខួបលើកទី៣០នៃកិច្ចព្រមព្រៀងទីក្រុងប៉ារីស(២៣តុលា១៩៩១-២៣តុលា២០២១) នៅថ្ងៃទី២២ ខែតុលា ឆ្នាំ២០២១នេះលោក ញឹក ប៊ុនឆៃ បានបញ្ជាក់ថា ដើម្បីឧត្តមប្រយោជន៍ជាតិ ខ្មែរគ្រប់រូប ទាំងនៅក្នុងប្រទេស ទាំងនៅក្រៅប្រទេសទាំងអ្នកដែលធ្លាប់បានឆ្លងកាត់សម័យកាលដ៏អាក្រក់បំផុតនៃភ្លើងសង្គ្រាមជាបន្តបន្ទាប់ អ្នកដែលធ្លាប់ទទួលនូវបទពិសោធន៍ នៃការរងទុក្ខលំបាកវេទនាបណ្តាលពីជម្លោះផ្ទៃក្នុង ទាំងយុវជនជំនាន់ក្រោយ គប្បីត្រូវយកចិត្តទុកដាក់ថែរក្សាការពារ សមិទ្ធផលដ៏ថ្លៃថ្លានេះឲ្យស្ថិតស្ថេរគង់វង្សជាអំណឹះតទៅ ។មិនត្រូវឲ្យមហិច្ឆិតា ការលោភលន់ ផលប្រយោជន៍ ផ្ទាល់ខ្លួន បក្ខពួកខ្លួនអូសទាញឲ្យធ្លាក់ចូលក្នុងគន្លងប្រវត្តិសាស្ត្រអាប់អួរនៃជម្លោះរហូតដល់បែកបាក់សាមគ្គីជាតិ នាំនូវភ័យន្តរាយ រហូតដល់ជម្លោះប្រដាប់អាវុធ និងភ្លើងសង្គ្រាមជាដាច់ខាត។
ក្នុងសារដដែលលោក ញឹក ប៊ុនឆៃ បានសម្តែងនូវការគោរពដឹងគុណដែលគ្មានថ្ងៃបំភ្លេចបានជូនចំពោះអតីតយុទ្ធមិត្តរួមឧត្តមគតិ ដែលបានបូជាជីវិតនិងធ្វើពលីកម្មដ៏ខ្ពង់ខ្ពស់មិនអាចកាត់ថ្លៃបានចូលរួមយ៉ាងស្វិតស្វាញតស៊ូរួមរស់ជាមួយគ្នាឆ្លងកាត់ការលំបាកលំបិនឥតគណនា។
លោកបន្តថា រយៈពេល៣០ឆ្នាំកន្លងទៅកម្ពុជាកសាងបានច្បាប់ជាច្រើន ដើម្បីជាមូលដ្ឋានធានាយុត្តិធម៌សង្គមដែលជាកត្តា ចម្បងដ៏សំខាន់ នៃការបញ្ចៀសឈ្នួនកំហឹង និងនាំទៅរកអំពើប្រទូស្តរាយ។ បើយើងនាំគ្នាគោរព និងអនុវត្តតាមច្បាប់ ដោយប្រកាន់ខ្ជាប់ជានីតិរដ្ឋនោះបញ្ហាទំនាស់ផ្ទៃក្នុងនឹងត្រូវកាត់បន្ថយ នាំឲ្យមានសុខដុម រមណីយសង្គម ធានាស្ថិរភាព សុវត្ថិភាព។
តាមរយៈសារចំនួនពីរទំព័រ លោកញឹក ប៊ុនឆៃ ក៏បានអំពាវនាវដល់បងប្អូនជនរួមជាតិជាទីស្នេហាប្រកាន់ខ្ជាប់នូវស្មារតីជាតិនិយម ខ្ពង់ខ្ពស់រួបរួមគ្នាដង្ហែអង្គព្រះមហាក្សត្រជាទីគោរពសក្ការៈជាអម្ចាស់ជីវិតតម្កល់លើត្បូងដែលព្រះអង្គគង់ប្រថាប់ជាព្រះនិម្មិតរូបនៃឯកភាពជាតិ សាមគ្គីជាតិជាតិខ្មែរ៕ដោយៈពលជ័យ