ភ្នំពេញ ៖ រថយន្តកាមរីហាយប្រ៊ីក មួយគ្រឿងបានពន្លះរបាំងថ្មពុះចែកទ្រូងផ្លូវពេញទំហឹង បណ្ដាលឲ្យក្រឡាប់ផ្ងារជេីងយ៉ាងច្រង៉ាង បង្កការភ្ញាក់ផ្អេីលដល់អ្នកដំណេីរកាលពីវេលាម៉ោង១រំលងអាធ្រាត្រ ឈានចូលថ្ងៃទី ២៣ ខែតុលា ឆ្នាំ ២០២១ នៅក្បែរស្ទុបបូកគោ តាមបណ្ដោយផ្លូវម៉ៅសេទុង កែងផ្លូវ១០៥ ក្នុងសង្កាត់សង្កាត់បឹងត្របែក ខណ្ឌចំការមន រាជធានីភ្នំពេញ ។
យោងតាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុ គេឃេីញរថយន្តម៉ាក កាមរីហាយប្រ៊ីក ពណ៌ស ពាក់ស្លាកលេខ ភ្នំពេញ 2AE-8191 បានធ្វេីដំណេីរតាមបណ្ដោយផ្លូវម៉ៅសេទុង ទិសដៅពីលិចមកកេីតក្នុងល្បឿនលឿន ខណៈមកដល់ចំណុចកេីតហេតុក៏ជ្រុលចង្កូតបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យរថយន្តបង្កក្រឡាប់ផ្ងារជេីងទ្រមេឃ ឯរបាំងថ្មខូចខាតពីរផ្ទាំង ។ ខណៈនោះក៏ឃេីញមានមនុស្សប្រុស៣នាក់ និងស្រីម្នាក់លូនចេញពីរថយន្ត ដោយស្ថានភាពរបួសស្រាល ។
ក្រោយកេីតហេតុ តៃកុងរថយន្តបង្កនិងអ្នកដំណេីរបានចាកចេញពីកន្លែងកេីតហេតុទុករថយន្តចោល ឲ្យសមត្ថកិច្ចជំនាញធ្វេីការវាស់វែងយករថយន្តទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយនាពេលក្រោយ ៕ ដោយ ៖ ជីម ភារ៉ា