ចិនព្រមានមន្ត្រីលីទុយអានី និងអឺរ៉ុប ពាក់ព័ន្ធទំនាក់ទំនងជាមួយតៃវ៉ាន់
លោក Wang Wenbin អ្នកនាំពាក្យក្រសួងការបរទេសចិនបានលើកឡើងថា ចិនធ្វើការប្រឆាំងយ៉ាងដាច់អហង្ការទៅលើ គំនិតរបស់អាជ្ញាធរកោះតៃវ៉ាន់ក្នុងការបង្កើត «ចិនចំនួនពីរ» ឬ «ចិនមួយ តៃវ៉ាន់មួយ» នៅលើពិភពលោក ហើយក៏ប្រឆាំងដាច់អហង្ការចំពោះទំនាក់ទំនងផ្លូវការណាមួយរវាងប្រទេសដែលមានទំនាក់ទំនងនឹងចិន ជាមួយនឹងអាជ្ញាធរតៃវ៉ាន់។
ក្នុងឆ្នាំ២០២១នេះ ប្រទេសលីទុយអានីបានប្រកាសទទួលការិយាល័យតំណាងពីកោះតៃវ៉ាន់ ហើយមិនត្រឹមតែដាក់ឈ្មោះ ការិយាល័យតំណាង «ក្រុងតៃប៉ិ» ដូចប្រទេសផ្សេងទៀតនៅអឺរ៉ុបទេ តែដាក់ឈ្មោះថាជា ការិយាល័យតំណាង «តៃវ៉ាន់» តែម្ដង។ បន្ថែមពីនេះទៅទៀត ខាងលីទុយអានីក៏គ្រោងនឹងបើកការិយាល័យតំណាងនៅតៃវ៉ាន់ផងដែរ។ ចិនឆ្លើយតបវិញដោយកោះហៅទូតរបស់ខ្លួនពីលីទុយអានីមកវិញ ហើយក៏អញ្ជើញទូតលីទុយអានីចេញពីប៉េកាំងផងដែរ។
ពាក់ព័ន្ធនឹងរឿងនេះ លោក Wang បានឆ្លើយតបទៅវិញថា៖ «យើងជំរុញឱ្យរដ្ឋាភិបាលលីទុយអានីគោរពតាមការប្ដេជ្ញាចិត្តនយោបាយរបស់ខ្លួននៅពេលបង្កើតទំនាក់ទំនងការទូតជាមួយចិន និងចៀសឱ្យផុតពីកំហុសដែលមិនអាចកែត្រលប់បាន»។
ជាមួយគ្នានេះដែរ កាលពីពេលថ្មីៗនេះ មានលិខិតរួមមួយពីសំណាក់ប្រធានក្រុមប្រឹក្សាអឺរ៉ុបលោក Charles Michel និងប្រធានគណៈកម្មការអឺរ៉ុបអ្នកស្រី Ursula Von Der Leyen ដែលបានបញ្ជាក់ប្រាប់សមាជិកសភាអឺរ៉ុបថា លីទុយអានីមិនបានធ្វើផ្ទុយពី គោលនយោបាយគាំទ្រ «គោលការណ៍ចិនតែមួយ» របស់សហភាពអឺរ៉ុបទេ។
ប្រមុខអឺរ៉ុបទាំងពីររូបនេះបានចាត់ទុកថា ចំណាត់ការរបស់ចិនទៅលើលីទុយអានីមានភាពហួសហេតុ និងមិនសមាមាត្រ ហើយក៏បន្តថា បើកាលណាទំនាក់ទំនងរវាងចិន និងលីទុយអានីមានបញ្ហា នោះទំនាក់ទំនងអឺរ៉ុប ជាមួយចិនក៏មានបញ្ហាដែរ។
នៅចំពោះមុខនឹងរឿងនេះដែរ ខាងចិនក៏បានឆ្លើយតបទៅវិញថា «ខាងអឺរ៉ុបគួរតែប្រកាន់ខ្ជាប់នូវជំហរមួយត្រឹមត្រូវ និងចៀសវាងបង្អាក់ទំនាក់ទំនងល្អជាមួយចិន»៕
ប្រភព៖ Reuters
