នាយករដ្ឋមន្ត្រីអង់គ្លេស៖ ឱកាសនៃភាពជោគជ័យពីកិច្ចប្រជុំកំពូលអាកាសធាតុ COP26 មានត្រឹមតែ៦/១០ប៉ុណ្ណេះ
នាយករដ្ឋមន្ត្រីអង់គ្លេសលោក បូរីស ចនសុន (Boris Johnson) និយាយកាលពីថ្ងៃសៅរ៍សប្ដាហ៌មុនថា លោកប៉ាន់ស្មានលទ្ធផលជោគជ័យចំពោះកិច្ចប្រជុំកំពូលស្តីពីការប្រែប្រួលអាកាសធាតុរបស់អង្គការសហប្រជាជាតិ COP26 ថាមានត្រឹមតែ ៦/១០ ប៉ុណ្ណេះ។
ការអត្ថាធិប្បាយរបស់មេដឹកនាំរូបនេះធ្វើឡើងក្នុងការជួបជុំជាសកលលើកដំបូងនៅទីក្រុងរ៉ូមរបស់ក្រុមប្រទេស G-២០ តែប្រមាណបួនថ្ងៃក្រោយលោកលើកឡើងកាលពីសប្ដាហ៍មុនថា កិច្ចប្រជុំកំពូលអាកាសធាតុអាចនឹងប្រព្រឹត្តទៅដោយភាពមិនសូវមានផ្លែផ្កា។
ចក្រភពអង់គ្លេសសង្ឃឹមថា កិច្ចប្រជុំកំពូលនៅទីក្រុង Glasgow ហើយបានចាប់ផ្តើមកាលពីថ្ងៃទី ៣១ ខែតុលានេះ នឹងអនុម័តផែនការដើម្បីជួយឱ្យខិតទៅជិតគោលដៅនៃការកំណត់ការកើនឡើងនៃសីតុណ្ហភាពសកលជាមធ្យមត្រឹម ១,៥ អង្សាសេលើសពីកម្រិតមុនបដិវត្តន៍ឧស្សាហកម្ម និងដើម្បីសម្រេចបាននូវការបំភាយកាបូននៅកម្រិតសូន្យ ឬអព្យាក្រឹត្យកាបូននៅឆ្នាំ ២០៥០។
លោក ចនសុននិយាយថា៖ «យើងនឹងមិនបញ្ឈប់ការប្រែប្រួលអាកាសធាតុទេ។ យើងប្រាកដជានឹងមិនអាចបញ្ឈប់វាក្នុងកិច្ចប្រជុំកំពូល COP នៅសប្តាហ៍ក្រោយនោះទេ។ តែអ្វីដែលយើងត្រូវធ្វើគឺត្រូវប្រាកដថា នៅក្នុងកិច្ចប្រជុំកំពូល COP នៅសប្តាហ៍ក្រោយ មេដឹកនាំពិភពលោកនឹងមកជួបជុំគ្នា និងធ្វើការប្តេជ្ញាចិត្តដែលចាំបាច់»។
ក្រុមប្រទេសអភិវឌ្ឍ G-២០ ទទួលខុសត្រូវលើការបំភាយកាបូនជាសកលប្រមាណ ៨០ ភាគរយ ហើយកិច្ចប្រជុំនាទីក្រុងរ៉ូមកាលពីចុងសប្ដាហ៍នេះ ត្រូវបានគេមើលឃើញថាមានសារៈសំខាន់ណាស់ចំពោះភាពជោគជ័យនៃ COP26 ដែលជាសន្និសីទអាកាសធាតុដ៏ធំបំផុតចាប់តាំងពីកិច្ចប្រជុំកំពូលប៉ារីសឆ្នាំ ២០១៥ ក្នុងការប្ដេជ្ញាចិត្តពីប្រទេសនីមួយៗឱ្យសម្រេចបានគោលដៅ។
ប្រភព៖ Reuters