លោកបៃដិនប្រាប់ប្រធានាធិបតីបារាំងថា អាមេរិកឆ្គាំឆ្គងក្នុងការដោះស្រាយកិច្ចព្រមព្រៀងនាវាមុជទឹកនុយក្លេអ៊ែរ
ប្រធានាធិបតីអាម៉េរិកលោក ចូ បៃដិន (Joe Biden) និយាយកាលពីថ្ងៃសុក្រសប្ដាហ៍មុនថា រដ្ឋបាលរបស់លោកមានការឆ្គាំឆ្គងក្នុងការដោះស្រាយកិច្ចព្រមព្រៀងនាវាមុជទឹកនុយក្លេអ៊ែររបស់ខ្លួនដែលធ្វើឱ្យមានការលុបចោលកិច្ចសន្យាការពារជាតិរាប់ពាន់លានដុល្លាររបស់បារាំង។
ការអត្ថាធិប្បាយបែបនេះធ្វើឡើងក្នុងអំឡុងកិច្ចប្រជុំទ្វេភាគីដែលមានការចូលរួមពីសមភាគីប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) នៅទីក្រុងរ៉ូមមុនកិច្ចប្រជុំប្រទេស G-២០ ដើម្បីជួសជុលទំនាក់ទំនងដែលបាក់បែកបន្ទាប់ពីមានការប្រេះឆាលើកិច្ចព្រមព្រៀងផ្តល់នាវាមុជទឹកឱ្យអូស្ត្រាលី។
លោកបៃដិននិយាយថា លោកមិនច្បាស់នោះទេថា ប្រទេសបារាំងត្រូវបានជូនដំណឹងអំពីចេតនារបស់អូស្ត្រាលីក្នុងការលុបចោលកិច្ចសន្យាតម្លៃ ៩០ ប៊ីលានដុល្លារជាមួយក្រុមកងនាវាចរបារាំង មុនពេលកិច្ចព្រមព្រៀងនាវាមុជទឹកដើរដោយថាមពលនុយក្លេអ៊ែរ AUKUS ត្រូវបានប្រកាសជាសាធារណៈនោះទេ។
យ៉ាងណាមិញ លោក Scott Morrison នាយករដ្ឋមន្រ្តីអូស្រ្តាលីនិយាយក្នុងកិច្ចប្រជុំG-២០កាលពីថ្ងៃសៅរ៍ដែលទាស់ពីការអះអាងរបស់លោកបៃដិនថា ប្រទេសអូស្ត្រាលីធ្វើការសម្រេចចិត្តត្រឹមត្រូវ ដោយការលុបចោលកិច្ចសន្យានាវាមុជទឹករបស់បារាំង ទោះបីជាវាធ្វើឱ្យបារាំងខឹងសម្បារក្ដី។ លោកថា លោកតែងតែជូនដំណឹងចុងក្រោយៗដល់រដ្ឋបាលបៃដិនពីស្ថានភាពនៃការសន្ទនា និងការពិភាក្សាជាមួយរដ្ឋាភិបាលបារាំង។
កាលពីខែមុន សហរដ្ឋអាមេរិក ចក្រភពអង់គ្លេស និងអូស្ត្រាលីបានប្រកាសពីភាពជាដៃគូថ្មីដែលរួមមានការផ្តល់ជំនួយដើម្បីជួយអូស្ត្រាលីក្នុងការអភិវឌ្ឍន៍នាវាមុជទឹកដើរដោយថាមពលនុយក្លេអ៊ែរ ជាកិច្ចព្រមព្រៀងដែលបារាំងនិយាយថា ធ្វើឡើងដោយចាក់ពីក្រោយខ្នង និងធ្វើឱ្យប៉ះពាល់ដល់កិច្ចសន្យាតម្លៃរាប់ពាន់លានដុល្លារដែលមានស្រាប់រវាងបារាំង និងអូស្រ្តាលី។
ភាពប្រេះឆាកើនឡើងដល់ចំណុចដ៏កម្រ រហូតដល់ប្រទេសបារាំងកោះហៅឯកអគ្គរដ្ឋទូតប្រចាំអាម៉េរិករបស់ខ្លួនជាបណ្ដោះអាសន្ន ហើយសូម្បីតែលោកបៃដិនក៏ភ្ញាក់ផ្អើលចំពោះរបៀបដែលមន្ត្រីបារាំងខឹងសម្បារលើបញ្ហានេះដែរ។ លោកនិយាយថា៖ «អ្វីដែលយើងបានធ្វើគឺឆ្គាំឆ្គង»។
លោកបៃដិនហៅបារាំងថាជាដៃគូដ៏មានតម្លៃ និងមានអំណាចបំផុតមួយ។ លោកបន្ថែមថា៖ «ពួកយើងបានធ្វើកិច្ចការជាមួយគ្នា ឈឺចាប់រួមគ្នា អបអររួមគ្នា និងឱ្យតម្លៃជាមួយគ្នា ដើម្បីអ្វីអាចដោះស្រាយបញ្ហាបាន។ អ្វីៗកំពុងផ្លាស់ប្តូរ។ យើងស្ថិតនៅចំណុចមួយក្នុងចំណោមចំណុចបំផ្លិចបំផ្លាញរបស់ប្រវត្តិសាស្ត្រពិភពលោក»។
ចំណែកឯលោកម៉ាក្រុងវិញនិយាយថា៖ «យើងបានបញ្ជាក់រួមគ្នានូវអ្វីដែលយើងត្រូវបញ្ជាក់»។ លោកនិយាយបែបនេះជាការឆ្លើយតបទៅនឹងសំណួរថាតើបារាំងសប្បាយចិត្តឬយ៉ាងណានៅពេលដែលទំនាក់ទំនងរវាងក្រុងវ៉ាស៊ីនតោន និងប៉ារីសត្រូវបានជួសជុលឡើងវិញ។
លោកបន្ថែមថា៖ «ឥឡូវនេះ អ្វីដែលសំខាន់គឺត្រូវប្រាកដថា ស្ថានភាពបែបនេះនឹងមិនអាចទៅរួចសម្រាប់អនាគតរបស់យើងទេ»។ លោកម៉ាក្រុងសង្កត់ធ្ងន់ថា អ្វីដែលសំខាន់នៅពេលនេះ គឺជាអ្វីដែលប្រទេសទាំងពីរនឹងធ្វើរួមគ្នាក្នុងប៉ុន្មានសប្តាហ៍ ខែ និងឆ្នាំខាងមុខ។
មន្ត្រីរដ្ឋបាលជាន់ខ្ពស់ម្នាក់ដែលប្រាប់អ្នកយកព័ត៌មានបន្ទាប់ពីកិច្ចប្រជុំនិយាយថា លោកម៉ាក្រុងមិនបានធ្វើសំណើបន្ថែមណាមួយពីប្រធានាធិបតីអាម៉េរិកក្នុងអំឡុងពេលកិច្ចប្រជុំនោះទេ។ មន្រ្តីដដែលនិយាយជាអនាមិកថា៖ «លោកប្រធានាធិបតីម៉ាក្រុង ពិតជាមិនបានធ្វើសំណើអ្វីនៅក្នុងប្រជុំនេះទេ ដោយសារតែយើងបានធ្វើការឆ្លងកាត់ ក្នុងរយៈពេលប៉ុន្មានសប្តាហ៍ចុងក្រោយនេះ ពីរបៀបវារៈរួម ប្លង់មេ ផែនទីបង្ហាញផ្លូវសម្រាប់ការងារដែលសហរដ្ឋអាមេរិក និងបារាំងនឹងធ្វើរួមគ្នាឆ្ពោះទៅមុខរួមគ្នា»។
សេចក្តីថ្លែងការណ៍រួមមួយរបស់សហរដ្ឋអាមេរិក និងបារាំងដែលចេញផ្សាយបន្ទាប់ពីកិច្ចប្រជុំនិយាយថា៖ «[លោកបៃដិន និងលោកម៉ាក្រុង]គូសបញ្ជាក់អំពីភាពរឹងមាំនៃទំនាក់ទំនងដ៏យូរអង្វែង និងជាប្រវត្តិសាស្ត្ររវាងសហរដ្ឋអាមេរិក និងបារាំង ដែលគាំទ្រដោយតម្លៃប្រជាធិបតេយ្យរួមរបស់យើង ទំនាក់ទំនងសេដ្ឋកិច្ច និងកិច្ចសហប្រតិបត្តិការការពារជាតិ និងសន្តិសុខ»។
កាលពីពាក់កណ្តាលខែកញ្ញា មេដឹកនាំទាំងពីរបាននិយាយគ្នាតាមទូរស័ព្ទ ដើម្បីបន្ធូរបន្ថយភាពតានតឹងខ្លះជុំវិញកិច្ចព្រមព្រៀងនាវាមុជទឹកចម្រូងចម្រាស។ ក្នុងអំឡុងកិច្ចសន្ទនាប្រហែល ៣០ នាទី លោកបៃដិនហាក់ដូចជាទទួលស្គាល់កំហុសឆ្គងអំពីរបៀបដែលរដ្ឋបាលរបស់លោកចូលរួមក្នុងកិច្ចព្រមព្រៀង។ សេចក្តីថ្លែងការណ៍រួមនាពេលនោះកត់ត្រាថា៖ «មេដឹកនាំទាំងពីរបានសម្រេចចិត្តបើកដំណើរការនៃកិច្ចពិភាក្សាស៊ីជម្រៅ សំដៅបង្កើតលក្ខខណ្ឌសម្រាប់ការធានានូវទំនុកចិត្ត និងស្នើវិធានការជាក់ស្តែងឆ្ពោះទៅរកគោលដៅរួម»។
ជំនួបកាលពីថ្ងៃសុក្រត្រូវបានគេមើលឃើញថាសំខាន់ផងដែរសម្រាប់បារាំង ក្រោយកិច្ចសន្យានាវាមុជទឹកដែលត្រូវលុបចោលបង្កើតរឿងឈឺក្បាលផ្នែកនយោបាយជាច្រើនសម្រាប់លោកម៉ាក្រុងដែលនឹងត្រូវប្រកួតប្រជែងក្នុងការបោះឆ្នោតប្រធានាធិបតីអណត្តិថ្មីនៅឆ្នាំក្រោយ។
អ្នកស្រី Célia Belin អ្នកធ្វើទស្សនកិច្ចនៅមជ្ឈមណ្ឌលសហរដ្ឋអាមេរិក និងអឺរ៉ុបនៅវិទ្យាស្ថាន Brookings និយាយថា កិច្ចប្រជុំទ្វេភាគីកាលពីថ្ងៃសុក្រ គឺជាឱកាសមួយសម្រាប់ការពិគ្រោះយោបល់ទាំងនោះដើម្បីឈានទៅរកការប្រកាសជាក់ស្តែង។
យ៉ាងណាមិញ ការខឹងសម្បាររបស់រដ្ឋាភិបាលក្រុងប៉ារីសជុំវិញកិច្ចព្រមព្រៀង ត្រូវមន្រ្តីមួយចំនួនរបស់ក្រុងវ៉ាស៊ីនតោនច្រានចោល ហើយត្រូវអ្នកស្រី Belin សម្ដែងការមិនជឿជាក់ថាសហរដ្ឋអាមេរិក និងបារាំងមើលឃើញភាគហ៊ុននៃកិច្ចប្រជុំកាលពីថ្ងៃសុក្រតាមរបៀបដូចគ្នានោះទេ។
អ្នកស្រីនិយាយថា៖ «មួយគឺមហាអំណាច ខណៈមួយទៀតគឺមានអំណាចមធ្យមដ៏រឹងមាំ។ សម្រាប់ប្រទេសបារាំង ការមានទំនាក់ទំនងល្អ ឬមានទំនាក់ទំនងច្បាស់លាស់ជាមួយអាមេរិក ក៏ជាលក្ខខណ្ឌមួយដែរឧទាហរណ៍សម្រាប់ឥទ្ធិពលនៅអឺរ៉ុប»។
ប្រភព៖ CNN