មេដឹកនាំពិភពលោកជំរុញអោយ “ជួយសង្គ្រោះមនុស្សជាតិ” នៅក្នុងកិច្ចប្រជុំកំពូលស្តីពីអាកាសធាតុ COP26
ក្លាកូវ៖ ព្រះមហាក្សត្រីអង់គ្លេស Elizabeth II នៅថ្ងៃចន្ទសប្តាហ៍នេះ បានធ្វើការអំពាវនាវអោយមេដឹកនាំពិភពលោកចាត់វិធានការរួមគ្នា ដើម្បីដោះស្រាយបញ្ហាប្រែប្រួលអាកាសធាតុ ក្នុងអំឡុងពេលបិទបញ្ចប់ថ្ងៃដំបូង នៃកិច្ចប្រជុំកំពូល COP26 ក្នុងទីក្រុងក្លាកូវ ប្រទេសស្កុតឡែន។
នៅក្នុងវីដេអូផ្ញើទៅកាន់អង្គសន្និសិទ ព្រះមហាក្សត្រិយានីបានមានព្រះបន្ធួលបន្ថែមថា ប្រសិនបើស្ថានភាពនៃការបំពុលពិភពលោក មិនត្រូវបានចាត់ទុកជា រឿងសំខាន់នៅពេលនេះទេ… វាប្រាកដណាស់ថា ស្ថានភាពនឹងក្លាយទៅជាមិនអាចស្រោចស្រង់បានកាន់តែខ្លាំងឡើងក្នុងរយៈពេលដ៏ខ្លី។ ប្រសិនបើយើងបរាជ័យក្នុងការទប់ទល់នឹងបញ្ហាប្រឈមនេះ បញ្ហាផ្សេងទៀតទាំងអស់នឹងក្លាយទៅជារឿងមិនសំខាន់។ បើតាមការរំពឹងទុកនោះ ក្រុមមេដឹកនាំពិភពលោក COP26 នឹងចុះហត្ថលេខាលើកិច្ចព្រមព្រៀងធំលើកដំបូងក្នុងកិច្ចប្រជុំកំពូលស្តីពីអាកាសធាតុនៅថ្ងៃអង្គារនេះ នៅពេលពួកគេសន្យាបញ្ឈប់ការកាប់បំផ្លាញព្រៃឈើត្រឹមឆ្នាំ២០៣០។ ប្រទេសហត្ថលេខីនៅទីក្រុងក្លាកូវ នឹងរាប់បញ្ចូលទាំងប្រេស៊ីលដែលមានព្រៃឈើ Amazon ដ៏ធំត្រូវបានកាប់បំផ្លាញ។ ប្រទេសជាង១០០បាននិយាយថា ពួកគេនឹងចុះហត្ថលេខាលើកិច្ចសន្យាដែលគ្រប់ដណ្តប់លើព្រៃឈើទូទាំងពិភពលោកប្រហែលជា៨៥%។ រដ្ឋាភិបាលនៃប្រទេស២៨ ក៏នឹងប្តេជ្ញាចិត្តលុបបំបាត់ការបំផ្លាញព្រៃឈើពីពាណិជ្ជកម្មម្ហូបអាហារជាសកល និងផលិតផលកសិកម្មផ្សេងៗដូចជាប្រេងដូង សណ្តែកសៀង និងកាកាវជាដើម។
ជាមួយគ្នានេះ នាយករដ្ឋមន្ត្រីអង់គ្លេសលោក បូរីស ចនសុន ដែលរៀបចំធ្វើម្ចាស់ផ្ទះកិច្ចប្រជុំអាកាសធាតុសកលនេះ ក៏នឹងអំពាវនាវអោយមានកិច្ចព្រមព្រៀងជាប្រវត្តិសាស្ត្រ ដើម្បីការពារ និងស្តារព្រៃឈើឡើងវិញនៅលើផែនដីផងដែរ៕ ប្រភព៖ CNA និង BBC
